Apostolo 14:13-24

¹³Dio dibuꞌo neḡaꞌe Lusitera neḡa enogano. Eꞌea dibuꞌo hauꞌeteꞌe vazeḡaniꞌa, vaze ḡuḡuvaḡa teite boromakau nu zu ḡeḡene haḡairoteꞌe kakaḡa Lusitera neḡa ibihetaḡa odohe onairo. Ebu apostolo azaḡa dibuꞌo zinihi reiro.

¹⁴Rehano Banabasi ani Paulone, ne azaḡaniꞌa nagini haḡaihi raꞌeteꞌe igirotene, mene haḡaiꞌuma haḡaiḡa radu zamaze adudanadu, dabuaze zigiro. Ebu vaze ḡuḡuvaḡa ḡunuḡano dure diuḡeꞌenaꞌa, huau ḡoeriro, raenaꞌa,

¹⁵“Nego nabudi, za nougadu ꞌuguḡa haḡaiḡa haḡaeꞌohe? Emeḡe zuni vaze tauḡi, zae teite idaḡa. Eme zae mazao hari manoḡa haramifine onaeha, zaeꞌa huga oꞌoꞌa haḡaiḡa eꞌe modadu, hubehune radiuꞌeteꞌe Badiꞌaḡa vaḡe onaifine. Aniꞌe adure, raha zu davara haḡairo, ebu eꞌea radiuꞌeteꞌe ḡauḡa niduꞌa haḡairo.

¹⁶Amahi madaḡano bone, habaꞌa habaꞌa azaḡa niduꞌa zeḡe zeḡe edeḡa haḡaiḡa haḡainutene, Badiꞌaꞌa ḡiaze modinu.

¹⁷Rehano vazeꞌa Badiꞌa zamarifine aneꞌa haḡai manoḡa manoḡa fureninu. Zae veize adureonoꞌo irugu tuḡuninu, ogomu madaḡa madaḡa fureninu, ebu ogomu boro zininu, zu matuꞌu hina zamaze iriꞌavoninu.”

¹⁸Ze ꞌouge reiro rehano, ne eꞌe azaḡaꞌe boromakau manadu, ḡahuno zinihi radu teꞌoteꞌaro. Rehano ḡonagano eꞌe haḡaiḡa ꞌuoga idararo.

¹⁹Eꞌe ḡarugano Iuda azaḡa nuꞌa Antioka zu Ikonio neḡanonoꞌo onaadu, eꞌe neḡa azaḡa zama aro. Eꞌanoꞌo zeꞌe Paulo hadi hina maro, ebu ze ꞌane ani rudaneha radu, ne enogano ahase buniro.

²⁰Rehano Zuhiꞌa Boro tahiꞌa tahiꞌaꞌa gabaḡeḡene edauꞌenogano, ani iḡunadu, eꞌe neḡa bare diuḡiro. Irarirotene, Paulo ani Banabasi teite Derebe neḡa onamiro.

²¹Paulo ani Banabasine Derebe neḡano hari manoḡa haramiro, ebu Zuhiꞌa Boro tahiꞌa tahiꞌaꞌa eꞌe neḡano ḡehararo. Eꞌe enogano ze Lusitera, Ikonio neḡa zu Pisidia habaꞌa Antioka neḡa bare onamiro.

²²Ze eꞌea Zuhiꞌa Boro tahiꞌa tahiꞌa inara ziniro, ebu “Iesu mazao fie gigaranoꞌi!” rae inaraziro. Ebu ꞌahige reiro. “Eme aduga ḡehaḡa hidiꞌuduꞌu, Badiꞌaꞌa zuhiꞌafiꞌeteꞌe zamaḡa diuḡiꞌuma.”

²³Paulo ani Banabasine, neḡaneḡa ekalesiaḡano Iesu mazao fieꞌeteꞌe azaḡa ibito zenoga veize vaze nu ohoziro. Ebu ogomu moneo zaḡozaḡeꞌenaꞌa zeḡe veize kuraro. Ebu zeḡeꞌa fieꞌeteꞌe Zuhiꞌaḡa Boro ꞌevorao tiro.

²⁴Ebu Pisidia habaꞌa vitau onamadu Pamufulia habaꞌa bare onamiro.