Apostolo 14:1-21

¹Na tanga e Ikonium e Paulus e Barnabas ru dili na roho na vaponga, i manga a rabune rua ru rata vakaroro. A nivara ne rua i kavakava hateka, lakea e huriki a Iuda ala kupo ri luhoi torea e Kristo. E huriki a bakovi a ngatavine ala kupo i uka ma ria a Iuda, ria ranga ri luhoi tora.

²Pali e huriki a Iuda ranga ri koi ni luhoi e Isu, ri piurike e huriki i uka ma ria a Iuda ri gi tepu e huriki ri luhoia e Kristo.

³I mavonga e Paulus e Barnabas ru made na parava i kupo vonga. I uka ma ru mangenge. Ru vara pagapaga ne Bakovi Dagi. Na tahuna ru vara, e Bakovi Dagi i vakasiri e huriki vona a ngava ru taki na naro kamumu vona i muholi hateka, i habi a nitora ne rua ru rata a maka nivakasiri.

⁴E huriki vonga na tanga dagi ri vapida na niluhoi. E huriki ranga ri taga ne huriki a Iuda. Pali e huriki ranga, ri taga ne vikirua, a apostolo.

⁵Lakea e huriki a Iuda, e huriki i uka ma ria a Iuda, turana e huriki a kakaina tanga ri varodo a ngava ri gi ratapile rua, ri gi padi rua na kedo.

⁶Pali ru lohoka vona a naro ta ri gi rata virihi ru vona, lakea ru ha lakea na tabeke ne Likonia na tanga dagi e Listra e Derbe, na maka tanga ri pesi tabukoi ne rua.

⁷Na tahuna ru bele vonga, ru vara na Velenga Kamumu.

⁸A bakovi tara i made o Listra, a vaha hale. A vahana i hale na tahuna ni poda ia vona, lakea i uka ma i laho kilala.

⁹A bakovi iea i made vonga i talangakia e Paulus i vara. Lakea e Paulus i mata tamoro lokovonga vona, i masia i luhoi torea e Isu ge vakamahuria,

¹⁰lakea i gale tala i ta maea, “O pesi rike.” I malaviriri kunana i pesi rike, i vakatubu ni laho.

¹¹Na tahuna ri masia a maki e Paulus i ratea, ri gale tala na nita Likonia, ri ta maea, “A bakovi nga, a vure ru vulo manga bakovi, ru puru valai ne hita!”

¹²E Barnabas ri galea e Seus, e Paulus ri galea e Hermes, a vuhuna ia a viri i habi a ngava.

¹³A roho na vure e Seus i pesi tabukoi, polovavo na tanga dagi. Lakea a prister ne Seus i bole valai na poridala na tanga dagi a maka bulmakau, a hurumade ni basi. Ge a nihabi na apostolo nga.

¹⁴Pali na tahuna a apostolo e Barnabas e Paulus ru longo vona a maki ri ngaru ni ratea, ru rape a varakia ne rua, ru nunu lakea ne ria, ru gale tala, ru ta maea,

¹⁵“I navai mu rata mavonga? Maria a bakovi tavula kunana manga mua! Miri valai koea miri ngaru ni vakalongo mua vona a Velenga Kamumu, mu gu ha taro a maka maki tavula nga, mu gu ramai a Vure mahuri, a viri i ratarike a hunu, a malala, a dari, turana maki lobo i tabuli ne tou.

¹⁶Hosi i matataro e huriki i uka ma ria a Iuda ri ramai kunana a ningaru ne ria.

¹⁷Pali i uka ma i kapiloho liu, ge uka a viri ge lohoka vona. I vakasiri vakaroro a ningaru vona ne mua: I vakaboru vilia na hunu a vala, i rata a maka maki ni kani kamumu ri koru rike, ri ramai a parava ne ria. I habi a maki ni kani i kupo ne mua, i rata mua mu vivi.”

¹⁸Ru rata a ngava nga, pali e huriki ri tabana ri ngaru ni habi a nihabi ne rua.

¹⁹Pali e huriki a bakovi ranga o Iuda ri valai o Antiok o Ikonium, ri piurike e huriki, ri padia e Paulus na kedo. Ri pahaluhoia ta i mate, lakea ri lalu talea na tanga dagi.

²⁰Pali na tahuna e huriki a murimuri ri pesi haluia, i pesi rike, i dili tabu na tanga dagi. Na parava muri i vano turane Barnabas, ru lakea o Derbe.

²¹E Paulus e Barnabas ru vara na Velenga Kamumu na tanga e Derbe, lakea e huriki ala kupo ri luhoi torea e Kristo. Muri ru hamule lakea na tanga e Listra, e Ikonium, e Antiok,