Apostolo 14:1-15

¹Paulo ani Banabasine Ikonio neḡano onamirotene, iḡaiḡa haḡaeꞌeteꞌe teige Iuda azaḡa kuru neḡano diuḡiro, ebu eꞌea faifairu haramadu, Iuda azaḡa zu Giriki azaḡa ḡehaḡa bagaḡaniꞌa Iesu mazao fiiro.

²Rehano Iuda azaḡa, Iesu mazao mene fiiroteꞌeꞌa, Iuda mene azaḡa zama ḡunuḡununiro. Ebu Paulo duḡuru agirezouga veize Iuda mene azaḡa zama aro.

³Paulo zu Banabasiꞌe eꞌea faḡa hune radadu, Zuhiꞌa Boro veize inare haramiro. Ebu Zuhiꞌa Boroꞌa ḡahunofiꞌuma hariḡaꞌe ḡoeꞌa huga reifine, Zuhiꞌa Boroꞌa apostolo azaḡa ꞌevore hina ane tahi gigiꞌa haḡaiḡa zu zaguzagaꞌuma haḡaiḡa haḡao ziniro.

⁴Rehano eꞌe neḡa azaḡaniꞌe rovotadu, nuꞌe Iuda azaḡa mone reiro, u nuꞌe apostolo azaḡa mone reiro.

⁵Ebu Iuda mene azaḡa nu zu Iuda azaḡa nuꞌa zeḡe ne ibito ziniꞌeteꞌe azaḡa teite tiburanadu, hadi hina apostolo azaḡa zimi sausauzoga veize, neneḡaniro.

⁶Rehano Paulo zu Banabasiꞌe eꞌe hariḡa igirotene, eꞌe neḡa modadu Lukaonia habaꞌa ferau onamiro. Ebu Lusitera zu Derebe neḡano zu eꞌe uhiḡa uhiḡa habaꞌano

⁷hari manoḡa harame onaminu.

⁸U Lusitera neḡano odaḡa sauꞌa vazeḡa ꞌahoganiꞌa ehore radiunu. Aniꞌe ꞌouge fureniro, ebu mene hune zu edau onaminu.

⁹Ani Pauloꞌa haramiroteꞌe igi radiro. Ebu Pauloꞌa ḡiane runirotene, ani Badiꞌa mazao fieꞌe ꞌahine, Badiꞌaꞌa odaḡa fainiꞌuma rae zamariro.

¹⁰Ebu Pauloꞌa ḡihau ḡoreneꞌenaꞌa, “Iḡune edanoꞌi!” rae niro. Ebu ani zogone rafate iḡunadu edau ragaviro.

¹¹Ebu vaze ḡuḡuvaḡaniꞌa, Pauloꞌa haḡairoteꞌe haḡaiḡa horonirotene, ze Lukaonia ḡoeꞌano huaro, raenaꞌa, “Badiꞌaꞌa vaze radu emeḡe vaḡe ovaeha.”

¹²Ebu Banabasiꞌe Dio reiro, u Pauloꞌe Hereme reiro, mazaḡa Paulo ani iḡaiḡa haramido ꞌahine.

¹³Dio dibuꞌo neḡaꞌe Lusitera neḡa enogano. Eꞌea dibuꞌo hauꞌeteꞌe vazeḡaniꞌa, vaze ḡuḡuvaḡa teite boromakau nu zu ḡeḡene haḡairoteꞌe kakaḡa Lusitera neḡa ibihetaḡa odohe onairo. Ebu apostolo azaḡa dibuꞌo zinihi reiro.

¹⁴Rehano Banabasi ani Paulone, ne azaḡaniꞌa nagini haḡaihi raꞌeteꞌe igirotene, mene haḡaiꞌuma haḡaiḡa radu zamaze adudanadu, dabuaze zigiro. Ebu vaze ḡuḡuvaḡa ḡunuḡano dure diuḡeꞌenaꞌa, huau ḡoeriro, raenaꞌa,

¹⁵“Nego nabudi, za nougadu ꞌuguḡa haḡaiḡa haḡaeꞌohe? Emeḡe zuni vaze tauḡi, zae teite idaḡa. Eme zae mazao hari manoḡa haramifine onaeha, zaeꞌa huga oꞌoꞌa haḡaiḡa eꞌe modadu, hubehune radiuꞌeteꞌe Badiꞌaḡa vaḡe onaifine. Aniꞌe adure, raha zu davara haḡairo, ebu eꞌea radiuꞌeteꞌe ḡauḡa niduꞌa haḡairo.