Apostolo 13:43-50

⁴³Ba ra tarai dia vana varbaiai kan ra pal na lotu, mangoro na Iudaia ma diat dia lotu da ra mangamangana Iudaia, dia mur Paulo ma Banaba; ma dir tata ta diat, ma dir vargat diat, ba diat a mur vatikene ra varmari kai God.

⁴⁴Ta ra Bung Sabat mulai, i maravai ba diat par ta nam ra pia na pal, dia ki varurung, upi diat a valongore ra tinata kai God.

⁴⁵Ba ra Iudaia dia gire ra kor na tarai, i puruai ra bala i diat, ma dia buka ma ra kankan, ma dia pue vue ra tinata par ba Paulo i tatike, ma dia varvul.

⁴⁶Ma Paulo ma Banaba dir tatata kapa, ma dir biti: I kat ba di tar tatike ra tinata kai God tadav avat lua. Ma tago ava okole vue kan avat, ma ava kure ba pa na topa avat ra nilaun ba pa na mutu, ave tur tapuku upi ra lavur Tematana.

⁴⁷Tago ra Luluai, i ga tulue avet dari: “Iau ga vaki u upi ra kapa kadiat ra lavur Tematana, Upi u a varvalaun tadav diat ta ra langlangun na rakarakan a gunagunan.”

⁴⁸Ba ra umana Tematana dia valongore dari, dia gugu, ma dia pite pa ra tinata kai God; ma diat di ga kure tar diat upi ra nilaun ba pa na mutu, dia nurnur.

⁴⁹Ma ra tinata kai ra Luluai i vana uraure ta ra gunagunan par.

⁵⁰A Iudaia dia ununue ra vaden dia ru God ma dia uviana bula, ma ra umana luluai ta nam ra pia na pal, upi diat a vangala ra milmilikuan ure Paulo ma Banaba, ma dia korot vue dir kan kadia umana langun.