APOSTOLO 13:38-52

³⁸Mái Paulo a sopasun kán worwor mák parai ngo, “Má ngorer, rang buhang, iau ri suri ngo gama talas suri minái. Kabin i táit ákte longoi á kálámul minái, ki giur arwat suri bit gam ngo ái Káláu na pah palai kamu sápkin.

³⁹Nagogon si Moses kápate artálár suri na asengsegeng pas gam tili sápkin. Mái sár ái koner a ruruna i Iesu, ákte sengsegeng alari kán tan sápkin.

⁴⁰Gama ololoh kuluk, na káp ian támin uri gam á worwor káián bos tám worwor tus er di parai ngoromin,

⁴¹‘Gama alongra! Gam er gam lu tartar retret mai worwor si Káláu, iau akeng i gam. Kápte gam ruruna i worwor a parai ái Káláu. Páksiai ngo te kálámul da parai si gam, káp gama te ruruna on. Mái sár ngo kamu tu liu be, táit a parai ái Káláu na hut muswan. Gama mákái má na pil i mansin i gam má gamák mat.’”

⁴²Má ngo ái Paulo mái Banabas diar eran suri so pas tili rumán lotu, matananu di sung diar ngo i bungán aunges erei mul diara kaleng má diarák sopasun mul i kándiar worwor suri táit diar má te kákwái parai si di.

⁴³Má namur matananu án lotu, ngo dikte arsagil tili rumán lotu, marán Iudáiá mái rung tili risán di lu lotu tiklik di murwa pas Paulo mái Banabas. Má ngorer diar má worwor mam di má diar má inau i di suri da tur dik mai bál pasi artangan si Káláu uri narsá di.

⁴⁴On á bungán aunges i wik erei, a ngoro na rah sang á matananu tili bimán rum er di rut suri da longrai worwor si Káláu.

⁴⁵Má ngo bos tátáil kán tan Iudáiá di mákái lala matananu, di káng mai lala bálsák taladeng má ding kip arsobin i worwor si Paulo má dik ot bilingnai mul.

⁴⁶Ái Paulo mái Banabas diar longrai ngorer, ki diar má mangan mai kos di ngoromin, “Kán nemnem ái Káláu ngo gam sang á kán matananu gama mulán kipi á pinpidan. Mái sár gam pukpukwai. Má kabin gamáte holhol sirereh on á midán ái Káláu, ngorer gam inngas tar gam ngo káp kamu te kuir on á liu áklis. Má inái giura han pas má alar gam, má giurák han uri narsá di ái rung tili risán má giurák arbin ur si di mai midán ái Káláu.

⁴⁷Giura longoi ngorer kabin ái Konom ákte timla giur mák parai si giur ngorer a parai sur Iesu tungu ngoromin, ‘Iakte timla iáu ngorer i talas uri atalsai rung tili risán, má talas erei na inngas tari araliu uri narsá di á matananu i naul matmatngan pokon no.’”

⁴⁸Má ngo ái rung tili risán di longrai worwor si Paulo mái Banabas, ki ák lala gáu i bál di, má dik lu parai ngo pinpidan káián ái Káláu a tuan alal má a tuan nimnim mul. Má ái rung erei ái Káláu ákte ilwa pas di suri liu áklis, dik ruruna.

⁴⁹Má pinpidan káián ái Konom a han arkaliut tangrai boh kuir no i balis erei.

⁵⁰Mái sár tan tátáil kán tan Iudáiá di bit sokoi bál tan tasim er di lotu uri narsá Káláu má bos konom án malar. Dik apturi arabilbiling uri narsá Paulo mái Banabas, má dik akelkel pala diar tili kándi balis.

⁵¹Má ngorer diar má tinra palai rah tili kik diar suri akiláng i di ngo bál mos si Káláu a kis i di, ki diar má han pas urada Ikoniám.

⁵²Má bos tám ruruna til Antiok di káng mai laes má mai Tanián a Pilpil.