Apostolo 13:31-52

³¹Muri i bele balaka kupo ne ria e huriki ri laho muga turana, ra ri malaga o Galili, ri laho sike lakea o Ierusalem turana. Pali ngane ri vakalongo e huriki a Israel ne Isu.

³²“Mi vakalongo mua vona a Velenga Kamumu, ra ngava a Vure i ta muholi vona hosi ne huriki a gare ne hita,

³³ngane i bele muholi na matane hita e huriki a hamone ria. I bele muholi na tahuna i vakamahuri mulea na matenga e Isu. A ngava iea ni here na ruana sapta na Linge, i ta maea, ‘Ioe e Tugu. Mona a vakasiri e huriki ne iau e Tamamu.’

³⁴A Vure i vakamahuri mulea na matenga, i uka ma i bera. I manga a ngava ni here puru hosi, i maea, ‘Ga rata kamumu mua, ga vakabagetu mua, i manga a ngava a ta muholi ne Davit a hariki.’

³⁵A nita tara na Hinere i ta maea, ‘I uka ma go matataroa a bakovi o vulakia ge rata a leho vomu ge mavuru na lovo.’

³⁶Hosi, na tahuna e Davit i made na malala, i rata lobo a leho a Vure i habi vona. Muri i mate, ni tanu turana e huriki a viri vona. Muri a podana i bera.

³⁷Pali a viri a Vure i vakamahuri mulea na matenga i uka ma i bera.

³⁸“Mua o huriki a turagu, a ngaru mu gu lohoka vona, miri vakalongo mua vona a Vure bara i puga vuroki a naro hale ne mua na tahuna mu luhoi torea e Isu.

³⁹A vinara ne Moses i uka ma i puga vuroki a naro hale legelege ne mua, ge rata mua mu malamala na matana Vure. Pali e rei a viri i luhoi torea e Isu, bara i puga vuroki a naro hale lobo vona, i ratea i malamala na matana Vure.

⁴⁰Mu matadoko, ma ge bele muholi ne mua a ngava hosi ne huriki a propet, i maea,

⁴¹‘Mua o huriki a bakovi ni nongo vaki! Bara mu turutu, muri mu mate, a vuhuna Iau ga ratea tara maki ge bele ne mua. Bara a viri i taki mua vona a maka maki ga ratea, i uka ma mu gu longo maia.’”

⁴²Na tahuna e Paulus i taki lobo a ngava nga, ru pesi rike e Barnabas, ta ru gu vano, lakea e huriki ri nana tora rua ru gu hamule valai tabu girira na Parava Nimalo tara, ru gu vara tabu vona a ngava iea.

⁴³I lobo ngane a vaponga, e huriki ri vapida. Muri e huriki ranga ri ramai rua, e huriki a Iuda turana e huriki i uka ma ria a Iuda, ra ri dili na lotu na Iuda ri muri ne rua. Lakea ru ta turane ria, ru vakatora a niluhoi ne ria, ri gi pesi tora ni luhoi torea a Vure ge rata kamumu ria.

⁴⁴Na Parava Nimalo muri, e huriki lobo na tanga dagi ri vapopo ni longo a nitane Bakovi Dagi.

⁴⁵Na tahuna e huriki a Iuda ri matai e huriki ala kupo ri bele, i madihi a hatene ria, ri hehea, ri harogia e Paulus vona a ngava i taki.

⁴⁶Lakea e Paulus e Barnabas ru koli paga paga kunana, i uka ma ru mangenge, ru ta maea, “A Vure i ngaru maria miri gi vakalongo muga ne mua a nitana. Pali mu marikoi vona a nita iea. Mu vakasiri mua, i uka ma mua a viri kamumu ni bole a nimahuri vakaroro. Ngane miri gi matataro mua, miri gi lakea ne huriki i uka ma ria a Iuda.

⁴⁷Miri gi rata mavonga, a vuhuna e Bakovi Dagi i vakuku maria maea, ‘Iau a rata ioe, ioe a nipara ne huriki i uka ma ria a Iuda, go vakasiri a dala na nimahuri vakaroro ne huriki lobo na malala.’”

⁴⁸Na tahuna e huriki i uka ma ria a Iuda ri longoa a ngava ne Paulus, ri vivi, ri togoa a nitane Bakovi Dagi. Lakea e huriki i vulaki ria a Vure, ri gi bole a nimahuri vakaroro, e huriki nga ngane ri luhoi tora.

⁴⁹A nitane Bakovi Dagi i rere na tabeke lobo vonga.

⁵⁰Pali e huriki a Iuda ri piurike e huriki a bakovi dagi na tanga dagi turana e huriki a ngatavine dagi i uka ma ria a Iuda, pali ri togoa a Vure. Ri piu rike ria, ri vakamadihi e Paulus e Barnabas, ri lili tala rua na tabeke vonga.

⁵¹Lakea ru kurudu pasi na vahane rua a habulo ru gu vakasiri ria a Vure ge pelekado ria. Muri ru vano, ru lakea o Ikonium.

⁵²Pali e huriki a murimuri ri vivi hateka, a Hanu Kiripiripi i tuhori ria.