Apostolo 13:30-47

³⁰God ghe mene totuela tale nimate

³¹me oroieili nau, ghe otuotula ta lo atoa laghe kasu teeiela eGalilii tani sae eJerusalem nau maulue ia. Ila lo atoa laghe taraiela, ghaine la aaulia ngaotu ta kapuita taumattu ngatoa.

³²“Me angalu aauliaa masi kiukiu etaimim: Sa ateva God ghe aulieiniela tale inangari nialokoi ta tuvuita atoa

³³ang ghe ghelei eroorooaala etaita, nau ghe totula Iesu. Nongina laghe piti elokoila ta aiaaghalua ateva Sam, va “‘Io natughu io, Ghaine nge tamami ieghila.’

³⁴Koronna inangari va God ghe totuela tale nimate, karika aue emene mate, nongina ghe auliaala tale isaa toko inangari, va “‘Aue atau aatu etaimim niarangise ateva manga ia me koronna ia tale inangari nialokoi aghe auliaala ta Deivit.’

³⁵Nongina ghe auliaala tale mene kateva inangari va, “‘Karika aue utau velu kapum taumattu ngateva manga ia va emauu.’

³⁶“Nau eteva Deivit ghe ruula tani ghelei uunguaane God tale unna ateva vituu, ghe matela; me laghe kaieiniela nongina tuvuna atoa me vilikina ghe mauula.

³⁷Me lo ateva taumattu God ghe totuela tale nimate karika ghe mauula.

³⁸“Liuna avalua o, kapughu etoa, aghaloanna tani aulia ngaotu me am kila va ta Iesu, God aue ekkaluaa kaluita ssavoto.

³⁹Ta ngetana lo atoa la ghaikaaiaa aue egheleila va karika righi kaluira ssavoto. Isaa avalua o me inangari nipaopao kanna Moses karika erooroo tani asaangiem tale kaluimim ssavoto.

⁴⁰Am paniem! Saa voto God ghe auliaala ta propete atoa erau lutu etaimim, laghe uela va,

⁴¹“‘Am tarala, lo atoa taumattu am aattara nonga tani sama, aue am soghiaa sa ateva aue agheleia, me aue am mate, Tale nau oia aue aghelei kasina voto, karika aue am nnaa va koronna, arongona ta marova kasina taumattu aue eauliaa poi etaimim!’”

⁴²Nau eteva Pol me Banabas angilalu ghe kasukasu vuli ale nivelu eitaua ngateva, taumattu ngatoa laghe mene aloannailaluela va lalu mene ppooaa isaa oia voto tale lo ateva too nau manga.

⁴³Nau eteva lo atoa laghe mae sio tani velu eitauaa laghe kasu reerekatala, oroi aJiu etoa me mene katoa taumattu avirina laghe vira aiesoaala tee aJiu etoa, laghe usilaa Pol me Banabas. Lalu ghe tani aippooaa teeila tale inangari niaisausiaa tani poso parasi maamasinaane God.

⁴⁴Tale mene kateva nau manga, ghaisa ngarighi me taumattu ngakapa atoa tale lo ateae o masaliki taatara laghe velu eitauaala tani nongo inangarina ateva Vau ngepona ateva.

⁴⁵Nau eteva aJiu etoa laghe tarala oroieili taumattu, me angila ghe nannaa saasakiaa me angila ghe aauliaa tee Pol me saa voto ghe aauliaa.

⁴⁶Pol me Banabas, karika lalu ghe matautula, lalu ghe liula me lalu ghe uela etaira va, “Ami tani ppooaa inangarina ateva God akasina etaimim. Ta am, am ghe ratiela me eaapasunga va God karika ghe suitoongainiemla tani ghaa maulue ateva etokatoka liu. Liuna avalua o, koti ami lao ta tau ngeleka atoa.

⁴⁷Vau ngepona ghe uela ta kateva kateva etaingalua va, “‘Aghe gheleiola va io mallanga io ta taumattu ngeleka atoa, me urooroo tani sausila tani ghaa niasaangi tale kosa akapa ateva.’”