Apostolo 13:14-50

¹⁴Zeꞌe Perega neḡanonoꞌo onamo, Pisidia habaꞌano Antioka neḡano feuriro. Ebu Bana Madaḡa madaḡano, Paulo zu Banabasiꞌa Iuda azaḡa kuru neḡa diuḡadu ehoriro.

¹⁵Ebu goro ḡoeꞌa zu peroveta azaḡa ḡoere meꞌodiroteꞌe enogano, Iuda azaḡa kuru neḡa ḡianeꞌeteꞌe azaḡaniꞌa, Paulo duḡuru veize ḡoere tuḡuriro. “Negofe duḡuru, za emeḡe veize inara ḡoeꞌa eꞌe roꞌidene, haramine idaḡa hehe?”

¹⁶Paulo ani iḡunadu ꞌevoꞌa mae ḡihiniro, zeḡeꞌa ḡoeꞌa ego hanoga veize. Ebu ḡoeꞌa ḡadaheniro, raenaꞌa, “Isaraela azaḡa, zu Iuda mene azaḡa Badiꞌa gubaneꞌeteꞌe, egoꞌi!

¹⁷Isaraela azaḡa Badiꞌaꞌa, aḡife duḡuru meiro, ebu zeḡeꞌa Izipi habaꞌano radiunuteꞌea, Badiꞌaꞌa danazeꞌenaꞌa ḡehararo zu inariro. Ebu Badiꞌaꞌa ane gigiꞌa boro hina Izipi habaꞌanonoꞌo tutuze buziro.

¹⁸Ebu muri ḡae ḡazaḡa gaubanana (40) haba bohaꞌano onamiroteꞌe zamaḡano, zeꞌe Badiꞌa ḡoere mene ego haunu rehano, Badiꞌaꞌa mene muhiziro.

¹⁹Kanana habaꞌano haba fuꞌo zu aheu fare (7) azaḡaꞌe, Badiꞌaꞌa zimi hauḡadu, habazeꞌe Isaraela azaḡa ziniro.

²⁰Muri maḡa ḡazaḡa zu ḡae fuꞌo gaubanana (450) zamaḡano, ꞌouge haḡainu. Eꞌebuꞌu Badiꞌa ani, Isaraela azaḡa boꞌaḡanonoꞌo Isaraela azaḡa ibito ziniꞌuma azaḡa tiba tiba ohoze onaminu. ꞌOuge haḡae onamo peroveta vazeḡa Samuelaꞌa fureraro.

²¹Eꞌebuꞌu Isaraela azaḡaꞌe, kini ꞌahoganiꞌa ibito zenoga uratiro. Eꞌanoꞌo Badiꞌaꞌa Saulo ohoniro. Aniꞌe Kisa ubuga, Beniamini iduhu vazeḡa. Ani, muri ḡae ḡazaḡa gaubanana (40) Isaraela azaḡa ibito ziniro.

²²Rehano Badiꞌa ani, Sauloꞌe kini gauḡanonoꞌo mae vaḡinadu, Davida madu kini iḡuꞌano ohoniro. Aniꞌe Badiꞌaꞌa raenaꞌa, 'Iese ubuga Davidaꞌe, eḡe zamaꞌa urato hauꞌeteꞌe vazeḡa. Aniꞌe eḡeꞌa urateꞌeteꞌe gauḡa niduꞌa haḡaiꞌuma.' reiro.

²³Badiꞌa ani, ibite rae tiroteꞌe ibiḡano, Davida mariganonoꞌo vaze ḡaboziꞌuma vazeḡa fureno ziniro, ebu ani Isaraela azaḡa mazao tuḡuniro. Niḡaꞌe Iesu.

²⁴Ani ꞌizema onaogano, Ioane Babatisoꞌa Isaraela azaḡa niduꞌa mazao haramiro, raenaꞌa, “Sauꞌanonoꞌo ḡihuradu, bapatizo moꞌi!” reiro.

²⁵Ioaneꞌa ane gau hauḡeꞌenogano ꞌahige reiro, raenaꞌa, 'Zaeꞌa zamareꞌetene, eꞌe iniu? Eꞌe mene Keriso. Eꞌe vazeḡaꞌe ariga onaeꞌohe. Eꞌe ane tuḡure vazeḡa radu, tamakaḡa miniḡa fuhiꞌo hanoga zu mene idaḡa. Ani niꞌe eḡe ni vitinoga.' ”

²⁶Ebu hena Pauloꞌa ꞌaune ḡoereꞌenaꞌa, “Nego nabudi, Aberahamo iduhu mariga azaḡa, ebu Iuda mene azaḡa, Badiꞌa gubaneꞌeteꞌe! Emeḡe veize, Badiꞌa ani, vaze ḡaboziꞌuma ḡoeꞌa tuḡuriro.

²⁷Ierusalema azaḡa zu zeḡe ibito ziniꞌeteꞌe azaḡa, zeꞌe Iesuꞌe Keriso rae mene zamarinu, zu Bana Madaḡa Madaḡa niduꞌa, peroveta azaḡa ḡoere meꞌodidoteꞌe, eꞌe hugaꞌe mene ederinu. Rehano zeḡeꞌa Iesu kotanadu runeo tuḡunirotene, eꞌe ḡoeꞌa haḡae huniro.

²⁸Zeꞌe Iesu runeo tuḡuniteꞌe mazaḡa mene horoniro rehano, satauroneadu rudanoga veize Pirato uminiro.

²⁹Ebu buka zaḡoḡano tiroteꞌe ḡoeꞌa niduꞌa ane mazao haḡae hauḡirotene, satauroonoꞌo mae bunadu, idu zamaḡano tiro.

³⁰Rehano Badiꞌaꞌa runeonoꞌo bare ḡaboniro.

³¹Ebu Iesu ani ibite Galilea habaꞌanonoꞌo ane teite Ierusalema neḡa itiroteꞌe azaḡa mazao mada ḡehaḡa zamaḡano fureraudo. Ebu ze izidi ꞌize Isaraela azaḡa mazao eꞌe hariḡa meꞌode fureneꞌohe.

³²Eme izidi, ꞌada hari manoḡa rae fureneꞌohe: Badiꞌaꞌa amahi vouḡafe mazao rae tiroteꞌe ḡoeꞌaꞌe,

³³vouḡafe mariga emeḡe mazao aneꞌa haḡae huneha. Eꞌe haḡaiḡaꞌe Iesu runeonoꞌo bare ḡaboniro. ꞌAdiꞌe Salamo aheuḡa (second) zamaḡano Iesu hariḡa tiroteꞌeꞌa hudaneha, raenaꞌa, 'Ḡaꞌe eḡe Ubude. Izidi eꞌe, ḡa Mogo raha.' (Salamo 2:7)

³⁴Badiꞌaꞌa Iesu runeonoꞌo bare ḡaboniro, zu ahiꞌaꞌe mene ruhuraꞌuma reiroteꞌe haḡaiḡaꞌe buka zaḡoḡano ꞌahige touga. Badiꞌaꞌa raenaꞌa, 'Eꞌe, Davida mazao ziniꞌuma rae tiroteꞌe ḡahugoneḡa manoḡa zae ziniꞌuma. Eꞌe ḡahugoneḡaꞌe zaḡoḡa, zu eꞌe ḡoeꞌaꞌe hudau huniꞌuma.' (Isaia 55:3)

³⁵Ebu Salamo ꞌahogano zuni ꞌahige tiro. Davidaꞌa Badiꞌa ninaꞌa, 'Ḡaꞌe, ḡae Vaze Zaḡoḡa ahiꞌaniꞌa ruhuranoga veize iduo mene modiꞌuma.' (Salamo 16:10)

³⁶Ḡoere ꞌadiꞌe Davida hariḡa mene tiro, mazaḡa Davida aniꞌe, ane radone madaḡano Badiꞌa ura gauḡa haḡae hauḡirotene, rudaro. Ebu ane zuni vouḡaḡa idu habaꞌano ḡuriro, ebu ahiꞌaꞌe ruhuraro.

³⁷U Badiꞌaꞌa runeonoꞌo bare ḡaboniroteꞌe vazeḡaꞌe ꞌahiꞌa mene ruhuraro.

³⁸Eꞌanoꞌo nego nabudi, ꞌadi ederoꞌi! Emeꞌe, Badiꞌaꞌa zae haḡai sauꞌa aḡutu modiꞌuma ḡoeꞌaꞌe, Iesuꞌa nagini haḡaofiroteꞌeanoꞌo zae mazao harameꞌohe.

³⁹Mose goro ḡoeꞌa haḡaeꞌeteꞌeanoꞌo, za Badiꞌaꞌa za ane ubumao duduḡa rouga mene idararo, mazaḡa vaze haḡaiꞌe sauꞌa daꞌo ꞌahine. Rehano vaze haḡaiḡa sauꞌa eꞌe niduꞌaꞌe, iniuꞌa Iesu mazao fiine, Iesuꞌa nagini haḡaofiroteꞌeanoꞌo Badiꞌaꞌa aḡutu modadu, eꞌe sauꞌaḡanonoꞌo mae vaḡiziꞌuma.

⁴⁰Eꞌanoꞌo peroveta azaḡaniꞌa reiroteꞌe haḡaiḡa zae mazao mene fureranoga veize ḡianoꞌi!

⁴¹ꞌAhige touga, raenaꞌa, 'Ḡianoꞌi! Zaꞌe, Badiꞌa ḡoere heꞌeheꞌene ḡoereꞌeteꞌe azaḡa, zaguzaganoꞌi, ebu rudanoꞌi! Mazaḡa eꞌe, zae radone madaḡano haḡai ꞌahoga fureniꞌuma. Vazeꞌa, naginiꞌa fureraꞌuma rae, zae ihozine zuni, “ꞌUguḡa haḡaiḡaꞌe mene fureraꞌuma.” radu, eꞌe ḡoeꞌa mene mae ḡihiniꞌuma.'” (Habakuku 1:5)

⁴²Paulo ani Banabasine, Iuda azaḡa kuru neḡanonoꞌo buauꞌenogano, eꞌea kuraroteꞌe azaḡaniꞌa umiziro, zeḡe moḡa Madaḡa Zaḡoḡano zuni ḡoere eꞌe ꞌaune bare haramoga.

⁴³Vaze ꞌai rururu ḡourirotene, Iuda azaḡa, zu Iuda mene azaḡa, Badiꞌa mone ḡihuriroteꞌe ḡehaḡaniꞌa Paulo zu Banabasi hegotiro, ebu Paulo zu Banabasiꞌa iraduḡuziro, raenaꞌa, “Badiꞌa ḡahunoneḡa manoḡa zamaḡano fie gigaru onamoꞌi!”

⁴⁴Bana Madaḡa Madaḡa bare meirotene, ne eꞌe azaḡaꞌe nariga niduꞌa Zuhiꞌa Boro ḡoere egoga veize nuꞌoraro.

⁴⁵Rehano Iuda azaḡaniꞌa, vaze ḡehaḡaniꞌa nuꞌoraroteꞌe horonirotene, ze ahiahi meiro, ebu ḡoere sauꞌa hina, Pauloꞌa haramiroteꞌe ḡoeꞌa ꞌueꞌenaꞌa taꞌiro haro.

⁴⁶Paulo zu Banabasiꞌe ḡoere figareꞌenaꞌa, “Eme, ibite zae Iuda azaḡa veize Badiꞌa ḡoere rae fureneha. Rehano izidi zaꞌe Badiꞌa ḡoere hezaho hanadu, zaeꞌa zae bare ḡabone tuḡutuḡu mene meꞌuma azaḡa rae raha. Eꞌanoꞌo eme izidionoꞌo Iuda mene azaḡa veize harame onameꞌeꞌuma.

⁴⁷Mazaḡa Zuhiꞌa Boroꞌa eme ꞌahige rae ifiro. 'E, Iuda mene azaḡa mazao eḡe ḡoere rae fureniteꞌe agaḡa rouga veize ḡa ohoꞌiro, ḡaeꞌa haba niduꞌa zamaḡano Zuhiꞌa Boroꞌa vaze ḡaboziꞌuma hariḡa ihozoga veize.' (Isaia 49:6)

⁴⁸Iuda mene azaḡaniꞌa eꞌe igirotene, zeꞌe matuꞌiro, ebu Zuhiꞌa Boro ḡoere niguniro. Ebu ḡabone tuḡutuḡu mouga veize, Badiꞌaꞌa ohotiroteꞌe azaḡaꞌe niduꞌa ane ḡoere mae ḡihiniro.

⁴⁹Ebu Zuhiꞌa Boro ḡoereꞌe eꞌe habaꞌa niduꞌa zamaḡano ḡehararo.

⁵⁰Rehano Iuda azaḡaꞌe, Iuda roḡae nize boro azaḡa Badiꞌa gubaneꞌeteꞌe zu eꞌe neḡa ibito ziniꞌeteꞌe azaḡa tutuzadu, Paulo zu Banabasi sausauzoga rae haraharaziro. Ebu eꞌe habaꞌanonoꞌo hegoze vaḡiziro.