Apostolo 10:6-23

⁶Ia a mosi ne Simon, a mari ni rata a maki na kulina bulmakau. A roho vona i pesi tabukoi na dari.”

⁷Na tahuna a agelo i vano pali, e Kornelius i gale a vora vona ala rua turana nugumaheto. A nugumaheto iea, i made tabukoi ne Kornelius vakaroro, i matakaria. I luhoi torea a Vure.

⁸E Kornelius i taki tou vona a maki i bele vona. Muri i rudu tou, to lakea na tanga e Iopa.

⁹Na parava muri, na kuru haro, to ngalai lokovonga e Iopa. Na tahuna iea, e Petrus i rike na mapana ruma ge vasileki.

¹⁰I vitolo, i ngaru ni kani. Na tahuna e huriki ri tarangai a maki ni kani vona, i vurena.

¹¹I masia a hunu i mata ka, i masia a maki tara i manga a lavalava dagi ni vakatavore puru. A maki tara i nugutata a harena i va, ni vakatavore puru na malala.

¹²A lavalava iea i vonu vona a maka livoa, a tabele bako, a kadirovo.

¹³Muri a lohona viri i ta maea, “Petrus, o pesi rike, o rabalaki, o kani a maki nga!”

¹⁴Pali e Petrus i koli, i ta maea, “Bakovi Dagi, i uka liu! Iau i uka ma kani kilala a maki muto.”

¹⁵A lohona viri i ta tabu, i ta maea, “A ra maki a Vure i ratea i bele kabakaba, naha ni takia ta i katoki.”

¹⁶A maki iea i bele balaka tolu. Muri ni lalu rike malaviriri na hunu.

¹⁷E Petrus i loho viliha vona ra maki i masia na vurena, i navai a pelegona. Na tahuna i tabana ni luhoi viliha, a bakovi ala tolu, re Kornelius i rudu, to mata visi pali a ruma e Simon, to pesi na poridala.

¹⁸To gale, to nana, “I tahoka tara mosi i made koea, a rana e Simon Petrus?”

¹⁹E Petrus i tabana ni luhoi kadoa a maki i masia na vurena, lakea a Hanu Kiripiripi i takia, “Simon, a bakovi ala tolu to matakana ioe.

²⁰O pesi rike o puru mai tou. Naha ni koi, o vano turane tou, a vuhuna iau kunana a rudu tou to valai.”

²¹Muri e Petrus i puru i taki a bakovi nga, “Iau kunana a bakovi moto matakanea. I navai moto valai?”

²²Lakea to koli, to ta maea, “E Kornelius, a ubu na tara na nugumaheto ala 100, i rudu mateu mete valai. Ia a bakovi malamala, i togoa a Vure. E huriki a Iuda lobo ri ngarua. A agelo na Vure i takia ge taki ioe, go lakea na ruma vona, ge longo ranga ngava go taki.”

²³Muri e Petrus i taki tou to go dili na ruma, i matakari tou vona a rodo iea. Na parava muri i vano turane tou. E huriki a murimuri ranga na tanga e Iopa, ria ranga ri vano.