Apostolo 10:12-21

¹²Elome etana asease ghaata kkena atoa me llo erarraa euu me ghila atoa la looloo elomarase.

¹³Vara me lingi ngalo ateva ghe uela va, “Pita! Totu saela me ughuvi emate llo me unama.”

¹⁴Pita ghe liula me ghe uela va, “Karika poi arooroo, Vau ngepona ateva! Karika poi aghe nama righi voto karika raarangisana.”

¹⁵Lingi ngalo ateva ghe mene mae sio ghaluene etana me ghe uela va, “Urau mene ue va karika raarangisana llo God ang ghe ghelei eraarangisanala.”

¹⁶Ghe lutula kotoluaata vara me arovaeaata ta kalio atiulu ghe mene saela epona liu.

¹⁷Nau Pita ghe annaa poi va saa malloeana ia o nitaatara ateae me taumattu Konilies ghe suula laghe tarala alena ateva Saemon me laghe tingina ssola tapaa ngatamana.

¹⁸Laghe kolokolola me laghe kolomila va, “Saemon Pita etokatoka oia?”

¹⁹Pita karika ghe ruu tani nnaa nitaatara ateae me Spiriti eteva ghe uela etana va, “Saemon, taumattu kotolu lotolu paepaeo.

²⁰Tingina saela me usio tarailotolu me urau mene rati tani usilotolu ta aghi asungilotolula.”

²¹Pita ghe siola me ghe uela ta taita kotolu va, “Aghi oia, am paepaeaghi. Vaalua me am mae sio?”