Apostel 1:3-24

³Tanangupini Nauja bakana tepila wondraterina wonti nunkani ketjaketjanani ngadani malka marapujeli, ja Nauja tanangu pira kulno ja ditji marapratjana wondraterina wonti, ja tanangu Godaia mililandru kaukaubana wonti.

⁴Ja Nauja tanangu jela matja jurborina, Nulia tanangu jirijiribana wonti, tana wata Jerusalemingundru puntinanto, a-ai, tanali Ngaperaia talpadakani kalkananto, nina jura ngakangundru ngarala wiri.

⁵Ngangau Johannili ngapali multibana wonti; jura Jaolali kulikirieli multibanila manila nganai, tanangupini ditjini ngadani wolja.

⁶Tana matja jurborina, tanali ninaia jakalkana wonti ja jatana wonti: “Kaparajai! Jundru nunkangupini miljarani milila nakaldra ngankijiribala nganai Israelaia?”

⁷Nauja tanangu jatana wonti: “Wata juranguta jenia parai miljaru kara ditji kara ngujamala, a-ai, nina Ngapili kurana wonti ngurulali nunkanali muntali;

⁸Jura ngurula manila nganai, jurangu Jaola kulikiri matja ngarina, ja jura tinkari ngankanietja ngakani nganala nganai Jerusalemingu ja bakana Judaiani paruparu ja Samariani ja mitaia wondirajelu.”

⁹Ja Nauja jenia matja jatana, tanali ninaia najina wonti taranani, ja talara palkujeli ninaia manina wonti tanangu milki kantjini.

¹⁰Ja tanali ninaia ngurutalpana najina taranani pariwilpani, ja mai, materi mandru kati warujeli tanangunto terkana wonti,

¹¹Pudla bakana jatana wonti: “Jura Galilaiala materi worajai! Minani jura terkai ja pariwilpani najiai? Naupini Jesus, Nauja jurangundru pariwilpani tarana warai, nakaldru jeruka jeri tikala nganai, worderu jura ninaia najina warai pariwilpani taranani.”

¹²Ngadani tana Jerusalemia tikana kurana wonti mar dawonpandru, tala nunkani maninindri mardawonpa nau Jerusalemingu karakara parai, windri Sabbat palto kulnuni worita.

¹³Ja tana matja wirina, tana punga piri miria tarana wonti, woderi tana ngamana wonti: Petrus ja Johannes ja Jakobus ja Andreas, Philippus ja Thomas, Bartholomäus ja Matthäus, Jakobus Alphäuni ngatamura ja Simon Zelotes ja Judas Jakobuni ngatamura.

¹⁴Tanapini pratjana wonki kulnukulnuni nganana wonti ngatjila, widlali jelalu, ja bakana Maria Jesuni ngandri, ja ngatata nunkani jela.

¹⁵Ja tanangupini ditjini Petrus milini terti terkana tarana wonti ja jatana wonti — Naka kana wolara jeia ngamana wonti 120 kara —:

¹⁶Jura materi ja ngatata worajai! Naupim jaura morlalu pantjinanto, nina ngopera Jaolali kulikirieli Davidani manali talpadakana wonti Judasangundru, nau palto wondranietja pantjina paraia tanangu, tanali Jesus patana paraia;

¹⁷Ngangau nau ngaianangunto jelarina wonti, ja ngaianangunto ninapini Ngamalkijiribani manina wonti.

¹⁸Nulupini mita buru burungankana paraia tjikatjikala kalalali, ja nau purina ngarina paraia, ja terti wokarina ja raia, ja kudna nunkani pratjana balapurina paraia

¹⁹Jenia, tinkari pantjina paraia pratjanani, tana Jerusalem ngamanani, jeruja tanali nina mita buru tanani talani dikai: Akeldama, jenia wondrai: Kumari mita.

²⁰Ngangau Psalma jaurani dakanala parai: “Nunkani punga ngurawalpa parananto, ja wata kulno nunkangu ngamananto,” ja: “Nunkani ngamalkijiribani kulno nguru maninanto.”

²¹“Jeruja tanangu materandru kulno, tanaia ngaianangunto wirarinala nunkangupini miljaruwirdi, nunkangu Jesus ngaianangu dunkanala ja wirinala,

²²Johannini multibanandru nunkanipini ditjielu, Naujangaianangundru tarala wiri, tinkari ngankanietja pantjinanto nunkani tepi terkakanaia.”

²³Ja tanali mandru terkibana wonti, Joseph, nina tanali dikai Barsabas, ja bakana Justus tala ngokana, ja Matthias.

²⁴Ja tana ngatjina wonti ja jatana wonti: “Jidni Kaparajai, jidni pratjanaia ngaraia ngujamanietja, wondramai pudlangundru kulno, worana jundru kalkalkana warai,