Apostel 17:1-21

¹Tana Amphipolingu ja Apolloniangu matja palkingana, tana Thessalonichingu wokarana wonti, woderi Juda kanaia jaura punga nganana wonti.

²Worderu Paululu milingeru, jeruja nau bakana tanangu wirina wonti, ja tanangunto Sabbat ditji parkulani ngankamalina wonti.

³Jaurandru nulu tanangu mildiri ngankana wonti, ja kurana wonti, Cliristus ketjaketjananto ja narindru jiritjinanto, ja Naupini Cliristus Jesus nganai, ninaia ngato jurangu kaukaubai.

⁴Ja palpali tanangundru morlalu ngundrana wonti, ja paulungu ja Silangu ngokana wonti, ja Griekala Godandru japali marapu, ja kana widla pirna wata ngalje.

⁵Juda kana, tana wata morlalu ngundrana wonti, milkirina wonti, ja tana jurborini pirindru materi madlentji palpa patana wonti, ja mapaterina wonti, ja ngura patijiritjibana wonti; ja tana Jason pungani tidnantani terkakana wonti, ja wontjana wonti, tanana kana wolarani wapalkala.

⁶Tanali tanana wata mankamankanani, tanali Jason ja ngatata palpa nguraia kaparani parumana wonti ja maritjina wonti: “Tanapini, tanali mita maru patijiritjibana warai, bakana ninkida wokarana warai;

⁷Tananapini Jasonili ngamalkai, ja tanali pratjanali mitaia kaparaia jirijiribani jaurani delkiai, ngangau tanana kurai, Kulno nguru Kapara nganai, Jesus.

⁸Tanali kana wolara ja nguraia kapara, tanali jenia matja ngaranani, patijiritjibana wonti.

⁹Ja tanali Jasoningundru ja ngurundru morlalula matja manina, tanali tanana worani patana wonti.

¹⁰Ngatatajeli nurujeli tinkani Paulus ja Silas Beröangu jinpana wonti, ja pudla naka matja wokarana, pudla Juda kanaia jaura pungani wirina wonti.

¹¹Tanalipini morla ngumu ngundrana wonti Thessalonichalani, ngangau tanali jaura manjujeli patana wonti, ja ditji pratjanani Godaia jaurani wontina wonti, tanapini jeruja nganai kara.

¹²Jeruja marapujeli tanangundru morlalu ngundrana wonti, ja bakana Griekala kana pirna widla ja materi wata ngaljejeli,

¹³Thessalonicha Juda kanali matja ngarana, bakana Beröani Paululu Godaia jaura kaukaubai, tana wokarana wonti, bakana naka kana wolara patijiritjibala.

¹⁴Nurujeli ngatatajeli Paulus jinpana wonti, nau panto pirnaia dirkalajelu palkananto; Silas ja Timotheus naka ngamantina wonti.

¹⁵Tana Paulungu jela wapana, tanali nina Athenilu wapalkana wonti, ja tanali jirijiribani jaura matja manina, Silas ja Timotlieus nurujeli nunkangu wokarananto, tana tarpina tikana wonti.

¹⁶Paulus Atheningu kalkaterinani pudlangu, nau jaola jerkina wonti, ngangau nulu najina wonti, ngurani Goda mudlamalka marapu paranani.

¹⁷Nulu jaura pungani Juda kanani, ja tanangu Godandru japali, ngankamalina wonti, ja jurborini pirini ditji pratjanani tanangu, tana jerra wokarana wonti.

¹⁸Palpali epicuräa ja stoika kana kirieli nunkangunto jatamalina wonti; ja palpa jatana wonti: “Mina naupini jatajatanietja jertapateriai jatala?” Palpa nguru: “Ngaiani ngundrai, nulia kaukaubanietja Goda pilkindru nganai;” Ngangau nulu tanangu ngantjani jaura Jesungundru, ja tepi terkakanani, kaukaubana wonti.

¹⁹Ja tanali nina patana wonti, ja nina Areopagani wapalkana wonti ja jatana wonti: “Ngaiani ngujamananto, mina ngujangujara naupini nganai, ninaia jundru kaukaubai?

²⁰Ngangau jundru ngaianingu talpani palpa tula wirilkai, ngaiani ngantjai milkila nganala, mina jenia nganai.”

²¹Athenalali, ja tana tidnapalarali, naka ngamanani, wata pilki ngundrana wonti, a-ai, windri milingeru palpa marra jatala ja ngarala.