Apostel 16:7-19

⁷Tana Mysia wondirani matja wokaranani, tanali wontjana wonti Bithynianaia palkala; ja Jaolali tanangu wata manuni kurana wonti.

⁸Tana Mysiangu matja palkingana, tana Troasangu ngarina wonti.

⁹Ja mudla kulno tinkani Paulungu wondraterina wonti; Macedonia kana kulno naka terkana wonti, ja nunkangu ngatjina wonti ja jatana wonti: “Jera pararau Macedoniaia ja ngaianingu marangokau!”

¹⁰Nulu nina mudla matja najina, ngaiana jertapaterina wonti nurujeli Macedoniaia palkala, ngangau ngaiana morlalu ngujamana wonti, Kaparali ngaianana karkana wonti, tanangu ngantjani jaura kaukaubala,

¹¹Ngaiana Troasangundru pararana wonti ja palto talkuili Samothracengu wokarana wonti, ja ditji kulnuni Neapo lisingu;

¹²Ja nakangundruka Philippingu, naupini nunkanipini Macedonia mitaia buruni ngura ngoperala nganai, ngura kapara. Ngaiana nunkangupini ngurani ditji palpa ngamana wonti.

¹³Ja Sabbat ditjini ngaiana ngurandru palaraia dunkana wonti kaiari kulnuja dirkalani, woderi ngatjini piri nganana wonti, ja ngaiana ngamana ngarina wonti ja widlani kaukaubana wonti, tana naka mapaterinani.

¹⁴Ja widlla kulnujeli, tala nankani Lydia, nani kati maralje jinkinietja Tliyatira ngurandru, nani Godandru japali nganana wonti, ngarana wonti; ja nana ngara Kaparali kalupakibana wonti jenia ngundrala, mina Paululu kaukaubana wonti.

¹⁵Nandru ja nankani pungalali matja multibanila manina, nana ngaianana kurukurubana wonti ja jatana wonti: jura ngundranani, ngato Kaparani morlalu ngundrai, ngakani pungani wirianau ja jerra ngamanau.” Ja nandru ngaianana mararibana wonti.

¹⁶Jendranguta ngaiana ngatjila wapanani, widla mili ngaianangu mandurina wonti, nandru kutjia talpadakani jaola ngamalkana wonti, nandru nankani kaparani kalala marapu jinkina wonti talpadakandru.

¹⁷Nani Paulungu ja ngaianangu wapantina wonti ja maritjina wonti ja jatana wonti: “Tanapini kana Goda pirnaia mili nganai, tanali jurangu murlaia palto kaukaubai.”

¹⁸Jenia nandru ditji marapuni ngankana wonti. Paulus kalapankarina wonti ja karitjinawontikana wonti ja jaolani jatana wonti: “Ngato jinkangu Jesuja Christuja talani jirijiribai, jidni nankangundru dunkananto!” Ja nau dunkana wonti nunkangupini ditjini.

¹⁹Nankani kaparali matja najina, tanani manginia kalkanani matja dunkana, tanali Paulus ja Silas patana wonti, ja pudlana jurborini piria parumana wonti ngaraia kaparani,