Apostel 16:22-36

²²Ja kana wolaraia ngara pudlangu tutututungana wonti; ja kapakaparali jirijiribana wonti, pudlani kati puribala, ja pudlana nandrala.

²³Ja tanali pudlangu nandraui marapu matja jinkina, tanali pudlana kanjangari pungani widmana wonti, ja kanjangari pungaia najinajibanietjani jirijiribana wonti, pudlana jiglerali najinajibala.

²⁴Nulu ninapini jirijiribani jaura matja manina, nulu pudlana kanjangari punga mandrani widmana wonti, ja pudlani tidna workamandrana wonti pitani ngurunguru.

²⁵Tinka tertini karakara Paululu ja Silasili ngatjina wonti ja Goda jurakokana wonti; ja kanjangarilali pudlana ngarana wonti.

²⁶Nurujeli mita wiltjiwiltjina pirna pantjina wonti, jeruja kanjangari pungaia wotini wijawijabaterina wonti, ja nurujeli kanjangari pungaia mana pratjana walturina wonti, ja pratjanaia kanjangari dukaraterina wonti.

²⁷Kanjangari pungaia najinajibanietja mukandru matja jiritjina, ja kanjangari pungaia mana walto ngananani najina, nulu mardakirra dukarana wonti, ja jertapaterina wonti munta nari ngankaterila, ngangau nulu ngundrana wonti, kanjangarila kutingana warai.

²⁸Paulus ngaiala pirnali karkana wonti ja jatana wonti: “Wata madlentji ngankateriau! Ngangau ngaiani pratjana ninkida nganai.”

²⁹Nulu praitji karkana wonti, ja mindrina wirina wonti ja ngarrana wonti, ja Paulungu ja Silangu tidnani woraterina wonti.

³⁰Ja nulu pudlana dunkalkana wonti ja jatana wonti: “Kapara wulujai, mina ngato ngankananto kulkani manila?”

³¹Pudla jatana wonti: “Kaparani Jesungu Christungn morlalu ngundrau, jeruja jundru ja jinkani pungalali kulkani manila nganai.”

³²Ja pudla Kaparaia jaura nunkangu, ja pratjanani tana pungani nunkanani ngamanani, kaukaubana wonti.

³³Ja nulu pudlana nunkangupini tinkaia ditjini patana wonti, ja pudlani tapa kulirkana wonti, ja nurujeli nulu ja nunkani pungalali multibanila manina wonti.

³⁴Ja nulu pudlana nunkani pungaia taralkana wonti, ja pudlangu buka kurana wonti ja mankina wonti, ngangau nulu nunkani pungalantali Godani morlalu ngundrana pantjina warai.

³⁵Matja ditjirina, kapakaparali nguraia mili jinpana wonti ja jatana wonti: “Pudlanapini kana jinpau!”

³⁶Kanjangari najinajibanietjali tananapini jaura Paulungu kaukaubana wonti: “Kapakaparali jinpana warai judlana kurakananto; karari wapalumai, ja murlanto palkalumai!”