Apostel 16:14-22

¹⁴Ja widlla kulnujeli, tala nankani Lydia, nani kati maralje jinkinietja Tliyatira ngurandru, nani Godandru japali nganana wonti, ngarana wonti; ja nana ngara Kaparali kalupakibana wonti jenia ngundrala, mina Paululu kaukaubana wonti.

¹⁵Nandru ja nankani pungalali matja multibanila manina, nana ngaianana kurukurubana wonti ja jatana wonti: jura ngundranani, ngato Kaparani morlalu ngundrai, ngakani pungani wirianau ja jerra ngamanau.” Ja nandru ngaianana mararibana wonti.

¹⁶Jendranguta ngaiana ngatjila wapanani, widla mili ngaianangu mandurina wonti, nandru kutjia talpadakani jaola ngamalkana wonti, nandru nankani kaparani kalala marapu jinkina wonti talpadakandru.

¹⁷Nani Paulungu ja ngaianangu wapantina wonti ja maritjina wonti ja jatana wonti: “Tanapini kana Goda pirnaia mili nganai, tanali jurangu murlaia palto kaukaubai.”

¹⁸Jenia nandru ditji marapuni ngankana wonti. Paulus kalapankarina wonti ja karitjinawontikana wonti ja jaolani jatana wonti: “Ngato jinkangu Jesuja Christuja talani jirijiribai, jidni nankangundru dunkananto!” Ja nau dunkana wonti nunkangupini ditjini.

¹⁹Nankani kaparali matja najina, tanani manginia kalkanani matja dunkana, tanali Paulus ja Silas patana wonti, ja pudlana jurborini piria parumana wonti ngaraia kaparani,

²⁰Ja pudlana kapakaparani wapalkana wonti ja jatana wonti: “Pudlalipini kanali ngura ngaianani patijiritjibai, ja Juda kana nganai.

²¹Ja pudlali jenia mangini kaukaubai, tanali ngaiani wata patananto ja wata ngankananto, ngangau ngaiani Romala nganai.”

²²Ja kana wolaraia ngara pudlangu tutututungana wonti; ja kapakaparali jirijiribana wonti, pudlani kati puribala, ja pudlana nandrala.