7Ja mai, Kaparaia angela kulno karakararina wonti, ja praitji kanjangari pungani mintjina wonti: Nulu Petrungu pankitiri nandranandrana wonti, nina jiritjibana wonti ja jatana wonti: “Nurujeli jiritjiau!” Ja kanjangari nunkani marandru purina wonti.
8Ja angela nunkangu jatana wonti: “Ngampiau, ja tidnaputa jinkani widmateriau;” ja nulu jeruja ngankana wonti. Ja nau nunkangu jatana wonti: “Kati pirna jinkani jurkamateriau, ja ngakangu karipateriau.”
9Ja nau dunkana wonti, ja nunkangu karipaterina wonti, ja ko nganana wonti, jenia kantji nganai, mina angelandru pantjiai, a-ai, nulu ngundrana wonti, nulu mudlamalka najiai.
10Pudla najinajibanietja ngoperalani ja mandrunila matja wiringana, pudla marda manani wokarana wonti, nulu nguraia padakai, naupini munta pudlangu piririna wonti; ja pudla dunkana wonti ja paltuwirdi kulno wapana wonti, ja nurujeli angela nunkangundru danina wonti.
11Ja Petrus matja tjuruwilparina, nau jatana wonti: “Karari ngani morlalu milkila, Kaparali angela nunkani jinpana warai, ja ngana kulkana warai Herodes marandru ja Juda kana wolaraia kalkaterina pratjanandru.”
12Nulu jenia matja ngujamana, nau Marianankani, Johannini ngandria, nina tanali dikai Markus, pungani wokarana wonti, woderi marapu mapaterina wonti ngatjila.
13Petrulu manaia pirnani manani nandranandranani, mili widla, tala nankani Rhote, wokarana wonti ngarala.
14Ja nandru Petruni ngaiala ngujamana, nandru mankinandru mana wata walto ngankana wonti, a-ai, nani wirina mindrina wonti ja kaukaubana wonti, Petrus manani terkala wapaia.
15Tanali nankangu jatana wonti: “Jidni jirijiri nganai;” Nandru morlalu kurana wonti, jenia jeruja nganai. Tana jatana wonti: “Jenia angela nunkani nganai.”
16Petrulu milingeru nandranandrana wonti. Tanali matja walto ngankana, tanali nina najina wonti ja pirna ngaruparana wonti.
17Nulu tanana marali daudauana wonti tana ngapurinano, ja tanangu kaukaubana wonti, worderu Kaparali nina kanjangari pungandru dunkalkana warai. Ja nau jatana wonti: “Jenia Jakobuugu ja ngatata worangu kaukaubanimai.” Ja nau dunkana wonti ja piri kulnuja wapana wonti.
18Matja ditjirinani, tana juljaia mili wata ngalje ngaratutututu ngana wonti, mina Petrungu pantjina warai.
19Herodili nina matja wontina ja wata mankamankana, nulu najinajibanietjani kalala kurana wonti, ja jirijiribana wonti tanana wapalkala naria. Ja nau Judaiandru Cäsareaja ngarina wonti, ja naka ngamana wonti.
20Herodes Tyrusalani ja Sydonalani tiririna wonti; tana kulnukulnuni mapaterina wonti nunkangu, ja tanali mitaia kaparaia poto ngamalkijiribanietja Blastus matja karkarkana tana murla ngatjina wonti, ngangau tanani mitali nunkani buka mitaia kaparaia mitandru tajina wonti.
Apostel 12
Apostel 12:7-20