Apostel 12:4-19

⁴Nulu nina matja patana, nulu nina kanjangari pungani widmana wonti, ja nulu nina pota mandrumandru mitaia kaparaia mili mandrumandruni jinkina wonti, tanali nina najinajibananto, ngangau nulu ngundrana wonti nina Passani ngadani kana wolarani wondralkala,

⁵Tanali Petrus kanjangari pungani najinajibana wonti; ja mili wolarali milingeru wonki nunkangundru Godani ngatjina wonti.

⁶Herodieli jertapaterinani nina wondralkala, nunkangupini tinkani Petrus mukaturarana wonti mitaia kaparaia mili mandruni terti, kanjangari mandrujeli dupudupu, ja najinajibanietja raanani palarani kanjangari punga ngamalkana wonti.

⁷Ja mai, Kaparaia angela kulno karakararina wonti, ja praitji kanjangari pungani mintjina wonti: Nulu Petrungu pankitiri nandranandrana wonti, nina jiritjibana wonti ja jatana wonti: “Nurujeli jiritjiau!” Ja kanjangari nunkani marandru purina wonti.

⁸Ja angela nunkangu jatana wonti: “Ngampiau, ja tidnaputa jinkani widmateriau;” ja nulu jeruja ngankana wonti. Ja nau nunkangu jatana wonti: “Kati pirna jinkani jurkamateriau, ja ngakangu karipateriau.”

⁹Ja nau dunkana wonti, ja nunkangu karipaterina wonti, ja ko nganana wonti, jenia kantji nganai, mina angelandru pantjiai, a-ai, nulu ngundrana wonti, nulu mudlamalka najiai.

¹⁰Pudla najinajibanietja ngoperalani ja mandrunila matja wiringana, pudla marda manani wokarana wonti, nulu nguraia padakai, naupini munta pudlangu piririna wonti; ja pudla dunkana wonti ja paltuwirdi kulno wapana wonti, ja nurujeli angela nunkangundru danina wonti.

¹¹Ja Petrus matja tjuruwilparina, nau jatana wonti: “Karari ngani morlalu milkila, Kaparali angela nunkani jinpana warai, ja ngana kulkana warai Herodes marandru ja Juda kana wolaraia kalkaterina pratjanandru.”

¹²Nulu jenia matja ngujamana, nau Marianankani, Johannini ngandria, nina tanali dikai Markus, pungani wokarana wonti, woderi marapu mapaterina wonti ngatjila.

¹³Petrulu manaia pirnani manani nandranandranani, mili widla, tala nankani Rhote, wokarana wonti ngarala.

¹⁴Ja nandru Petruni ngaiala ngujamana, nandru mankinandru mana wata walto ngankana wonti, a-ai, nani wirina mindrina wonti ja kaukaubana wonti, Petrus manani terkala wapaia.

¹⁵Tanali nankangu jatana wonti: “Jidni jirijiri nganai;” Nandru morlalu kurana wonti, jenia jeruja nganai. Tana jatana wonti: “Jenia angela nunkani nganai.”

¹⁶Petrulu milingeru nandranandrana wonti. Tanali matja walto ngankana, tanali nina najina wonti ja pirna ngaruparana wonti.

¹⁷Nulu tanana marali daudauana wonti tana ngapurinano, ja tanangu kaukaubana wonti, worderu Kaparali nina kanjangari pungandru dunkalkana warai. Ja nau jatana wonti: “Jenia Jakobuugu ja ngatata worangu kaukaubanimai.” Ja nau dunkana wonti ja piri kulnuja wapana wonti.

¹⁸Matja ditjirinani, tana juljaia mili wata ngalje ngaratutututu ngana wonti, mina Petrungu pantjina warai.

¹⁹Herodili nina matja wontina ja wata mankamankana, nulu najinajibanietjani kalala kurana wonti, ja jirijiribana wonti tanana wapalkala naria. Ja nau Judaiandru Cäsareaja ngarina wonti, ja naka ngamana wonti.