Aposoul 2:15-34

¹⁵O tamatasine ahik pah ka popouluana me inum, ngohina kung naman tagin pe inggoum. Gine daan aliuo harah, inggono song re 9 kiloko puk.

¹⁶Bo a puhene ke kotpokosene daan, inggono ke mene tauete ponoin Joel ger propeit sioun, ke kula pe pare,

¹⁷God ke kula pare, ‘Tar uadouhinar marein, inggo u turung uauoun tasir mamang tamatalik tenag Iabena Dedeil. O bung tamamiuoum, o kuah, doho bulout ra turung mene tauete tonogo uelhireo ngohina tasir propeit. Doh nomio bulout kalanioum ra turung banga tar inete ngohina tar borborian, doho mahoho ra turung borboriana tar bureher borborian.

¹⁸Doh tar binakon, Inggo u turung uauoun tenag Iabena Dedeil tosnogo tamatang kalekinale, o bulout doho kuah. Tar mareininin Inggo u turung dingiha tenag Iabena Dedeil tasisin, doh gisina ra turung mene sira tasir propet.

¹⁹Inggo u turung uatouo tar bureher inet, kara uaparok i Heuen, doh gane i kot, doh tar binakon a deuating, karo hue doho diku uleik o turung pokos.

²⁰A pisar e turung kitup, doha bialok e turung kubara sira tar deuating, i muduhia song re kotpokoso na mareinir Tamata Noman ger tampopokoho tun.

²¹Doh mais ra turung kila ualeik tar hanganar Tamata Nomana me nipoul, gisina tera turung udeil.’”

²²Doh Pita ke mene ualatumana poluk pare, “Inggoum ro uanotougener Ju mu ualongoro uaia tun tar puhene. Iesu ger peng Nasaret, a tamata giamehe sioko tun, doh inggono teke uamatotoin God tar laha tagigeig, ke me ualasira pe tar uaparok, kare guata tar nitou tar ualasira tena nitampopokoho God. Doh inggoum kung siokor ate manas.

²³A tamatonene ke heir sira manasampehain God tena nimalar, doh na niate, doh inggoum menia tenas nipoulur tamata uasa, kung tung pous tatanon, ke me mate pe tar korose.

²⁴Bo God puk ke uatua tapokis tatanon, ke kale liu tur pe tatanono tar uelmahinging mat, teeit o mat o matoto leue tar kuse uanono tatanon.

²⁵Ngohina sira ke mene uatuha pono pe Debit tatanon, ke kula pe pare, ‘Inggo ku bang huara tar Tamata Noman e uangoul uahuhut dede totoguo. Inggo ahik pahu sokor, karu por, teeit inggon e uangoul tabara totoguo.

²⁶Temaeit inggo u uaha tun ru mene pe, doh inggo u turung pepe uangoul sira keip tar nitagorong mana hope ke ualapagah pe God.

²⁷Teeit ingga ahik paho turung uamaluana totoguo u turung mate dede, doh ahik pono paho turung uamaluana tenang tamatang kalekinale ger dedeil, e benga to tar keu.

²⁸Ingga ko ualasira manasa totoguo teru kale tar nitua gere moko dede. Ge inggo pe u kale tar niuaha uleik tar uangoul tagu totomua.’”

²⁹“Ro bung kaloug, uauia geru uakalahara bako pare, tubugigeig Debit ger mahoho uleik ke mate doh ka keuin, doh na keuion e moko harampe e tuka daan.

³⁰Bo inggono puk a propeit, ke ate baka ke ualapagah katongo pe God tatanono pare, e turung guata me tang siokor bubungunon e tabila palih tono tabtabilon.

³¹Debit ke ate uoum tar inete re turung pokos, inggono ke mene tauete tang Kristo e turung tua tapokis. God ahik pahe turung uelsakil tatanon mare mate dede, doh ahikir tukununa pahe turung beng.”

³²“God ke uatua tapokis tang Iesu, doh inggeim uakapene teking siokor banga tun tar matamiu.

³³Iesu ka kale kai taroin i Heuen, kare la tabila tar pang makoso tang God. Doh God ger tamanono ke heir tatanono tar Iabena Dedeil geke ualapagahain pare, e turung heir, doh Iesu teke dingiha tar Iabena Dedeil, doh inggon, teene kung bangaioum, karung longor.

³⁴Debit ahik pah teka kale kai taroin i ran, bo teke mene tauete puk pare, ‘A Tamata Nomana ke kula pare tenag Tamata Nomano, Tabilane tar pang makoshia totoguo e tuka tar binaka ru guato tosnongo uelmatana ra pehuarais, kara uangoul i kukulebanga tenang nikaueke ingga.’”