Aposotolo Adi Hewau 7:14-39

¹⁴Abotai abo Iosepa i hetamaridi se lau tamana Iakobo se heribayama, maena ana bogao gamagaridi, tataodi tatao‐haiona‐se‐mate saudoudoi‐haligigi hinage;

¹⁵arinai abo Iakobo i dobi Aigupito. Nei eai abo ie mate, ia eo tamadayao,

¹⁶abo se baheuioidi se laedi Sekema eai, se toredi bousa eai wa Aberahama moni arinai i uneauriyao Emora nanatunayao aridi eai, Sekema eai.

¹⁷“Huiana Eaubada Aberahama i ribahesunumaei wa i hanahanauma, tatao se hetadada ariri Aigupito eai

¹⁸i lau e edi wasawasa esau ie tubu, ia Iosepa nige i nuatuwatai.

¹⁹Ia ada bogao wa i abibaaeaidi, tamadayao i hetaladuidi nanatudiyao gagiridi se gabagabaedi, ata si mauri.

²⁰Nei huia ne Mose se labasi, ana ao i lolo ariri Eaubada matana eai. Ia nawalai haiona numa eai se hemahemadoyamui;

²¹ia se gabaeyao wa, Parao natuna siu i abiisiniyama, abo i labahai doha himage ia natuna mamohoi.

²²Aigupito edi sonoga gamagamagari Mose i ata heohidio; ena riba eo ena laulau hinage aridi eai i adidiri ariri.

²³“Ena borimai tatao‐labui‐se‐mate se ohi, ia nuana bena i lau ana bogao i itauioidi, Isaraela nanatunayao wa.

²⁴Ia matana eai esau se abi‐baaeai, ia abo i sagui, tau se hebaaea wa i hemauri, Aigupito tauna mo i unui.

²⁵Nuana eai i ene ena tataoyao abo se italobai, Eaubada abo i hemauridi ia nimana eai, na isi nige se nuatui.

²⁶Mara‐ie‐tom abo tatao labui se lululu, abo i taumasaraha bena i laubiriedi, i ene, ‘Tatao e, omi boga esega, aue saha au hebahebaaeauioimiu?’

²⁷Esau wa ehana i hebaaea Mose i heduiahalai, i ene, ‘Eai i ribaei oa ama tanuaga, eo oa tauhekirainomai eai u lau?

²⁸Bena u unuigu wa, doha lahi Aigupito tauna esau u unui wa?’

²⁹Teina riba ta Mose i ataiei abo ie dago, ia Midiana eai i miaheboheboriedi, nei eai nanatunayao labui i hetubudi.

³⁰“Borimai tatao‐labui‐se‐mate se lautom. Guiau ena aneru esau i taumasaraha ia arinai Sinai tupina barabarana eai, aneru wa oeagi alaalasina boeana eai i taumasaraha.

³¹Mose i itaitalau, i noonooei; i lau gegesina eai, bena i itakomakomani, Guiau arinana i laoma ia arinai.

³²I ene, ‘Eau tamamyao edi Eaubada, Aberahama ena Eaubada, eo Isaako ena Eaubada, eo Iakobo ena Eaubada.’ Mose abo i tabutabubu, nige i itaitalau arinai.

³³Guiau abo i ribalau ia arinai i ene, ‘Am ae’um aem eai me u abihaidi: em aba totoro me dimo tabuna.

³⁴Egu tataoyao edi amamna Aigupito eai ea itayao, edi lepalepa ea ataieyao, hinage ea dobima bena ea hemauridi. U laoma, abo ea hetamarim u lau Aigupito.’

³⁵“Teina Mose ta, ia se lauparihibaeyao wa doha si ene, ‘Eai i ribaei oa ama tanuaga, eo tauheduheduduraimai eai abo u lau wa?’ Ia ede Eaubada ia abo i hetamari adi tanuaga, eo tauhemauridi, aneru nimana eai i taumasaraha oeagi alaalasina alona eai.

³⁶Ia i woealaedi, noo ginauridi i ginauridi, eo heiheinoidi Aigupito eai, i heitadi Gabogabo esana Buiabuiana eai hinage, eo barabara eai hinage borimai tatao‐labui‐se‐mate.

³⁷Teina Mose ta ia ede i ribalau Isaraela nanatudiyao aridi eai, i ene, ‘Peroveta esau Guiau emi Eaubada abo i hetoro omi arimiu eai, emi tau esau abo doha eau; ia taba au ataiei.’

³⁸Ia ede ina ekalesia boeadi eai barabara eai aneru maenayao Sinai tupina eai se ribariba, maedi tamadayao hinage; mauri ribadi hinage i abidi abo i ledima arida eai.

³⁹Ena riba ita tamadayao nige se awaabiei, ia se heduiahalai, isi nuadi se uiouio mo Aigupito eai.