Aposotolo Adi Hewau 27:1-41

¹Isi se ribaribamaoda, abo si ene ai abo ai geru ai lau Italia, Paulo eo tatao‐auaudi headi hinage se moselaedi tau esau esana Iuliu arinai, ia senturion Aoguso peledi esau.

²Adaramatiu wagana esau i totorohai, arinai aie geru ai lau, Asia bena se adau hasari maemai tau esau esana Aritako, Makedonia tauna, Tesalonia tehana.

³Mara‐ie‐tom aie duna Sidona eai. Iuliu i riba maheasisina Paulo arinai, i ene, “Oabom ena ehamyao bena u itadi u pesa u itadi eo se taubigaim.”

⁴Arinai abo Sidona ai gerugabaei, Kuperu ubuna eai ai heurisi paana ede ama mana i baaea.

⁵Ai Kilikia eo Pamepulia gabogabona eai ai adauawasi abo aie duna Mura eai, Lukia oeana eai.

⁶Nei eai Alesana wagana esau senturion i lobai abo i lau Italia, arinai i hegeru‐awasimai.

⁷Asubena gamagamagari ai adaadau taubiga mo na sora ma adaumai Kenido ubuna eai, mana i iuhipipinimai nige gonoamai ai lau, arinai Kereta ubuna eai mo aie lau, Salamoni hasarina eai.

⁸Ai hadidi benai‐benai e ai giuri, abo ai lage arotau esau arinai, esana ede Gadoalolodi, hanahanauna eai ne eanua esana Lasea.

⁹Huia lohaloha ai gabaeyao, adau huiana i baaea paana aiudi huiana i lautomo. Paulo abo i ribahesanapuedi

¹⁰i ene, “Tautaubada e, ea itayao eda adau ta nuana abo i baaea, gogo hinage abo ta gabaei, ibai, abo ta mate, e nige’e?”

¹¹Na Senturion wa waga kapenana eo waga tanuagana mo edi riba i ataiei, Paulo ena riba i otaotaei.

¹²Paana arotau wa aba‐lona i baaea, arinai tatao gamagaridi nuadi bena ai torohaiuio, ai aipate ai lage Peniki eai ai lo, arinai ai mia e waeauna i lautom. Peniki ede Kereta arotauna esau, tupo esau i italau ealasi, tupo esau i italau eawana.

¹³Eawana abo ie toa, i waeawaeauma, isi edi nuatu si ene, adi mana lolo arinai lo se tabei se ue, se geru Kereta hasarina eai.

¹⁴Se geruo nige baeaona mana lailai ie toa, mana wa esana Mana‐ealasi, oea eai i toa‐adidirima;

¹⁵mana wa waga i iuhipipini, nige gonoamai to ai boboeo mo ai lau.

¹⁶Bonabonarua esau esana Kauda ai boboeo ai lau ubuna eai, woeona eai ai hesahesabadaoi ema waga gagirina bena ai ueisini:

¹⁷si ueisini nonohai, maina se abi se saisaini, se matausi ata i pipinisaemai malapota eai, arinai worewore se aunoudi, se heoheopari.

¹⁸Wowori lailai se hetahetaipileaririemai, arinai mara‐ie‐tom waga gogona se gabagabadobi.

¹⁹Asubena hehaionana eai waga ginauridi gamagaridi aibom nimamai eai ai gabagabadobi.

²⁰Huia lohaloha mahana eo ipora nige ai itadi, mana lailai hinage otana, ema mauri ai sunumagabayao.

²¹Huia lohaloha nige se aiai, Paulo abo i toro isi duaduaridi eai, i ene, “Tatao e, lahinae egu riba wa taba au ataiei Kereta nige ta uegabaei, wau baaea wa, eo gogo au gabaeheohidi taba nige ta hearodi.

²²Eau ea riba headidirimiu, nuamiu bena se taru, arida eai taba nige esau i mate, waga mo abo ta gabaei.

²³Paana Eaubada, tanuagagu ede, eau hinage ena heaheari, ia ena aneru ina maiona ta i totoro gegesigu eai,

²⁴i ene, ‘Paulo e, tabu u matausi, Kaisara matana eai oa abo se woealaem: Eaubada hinage am sasaguyao maedamyao aue geru me abo i lediwa.’

²⁵Ehei tatao e, au nuaadidiri, Eaubada ena riba eau ea sunumaei, doha i ribaei wa abo hinage ie tubu.

²⁶Abo ta dunasae bonabonarua esau eai.”

²⁷Maiona hesaudoudoina i lageo, ai Aderia gabogabona eai ai alealele mo, waga tauhaiwawarina edi nuatu si ene oea ai hanahanaui.

²⁸Gabogabo se liei, liena tau‐i‐mate; se taulau begana abo se lieuioi, liena saudoudoi‐haligigi.

²⁹Se matausi ata banabanari eai aie duna, arinai lo hasi ai tu‐dobedi waga tupo lalakina eai, ema gadosisi mo taba mara‐i‐tom sasari.

³⁰Waga tau haiwawarina bena waga se dago‐gabaei, waga gagirina se hedawedobei gabogabo eai, se boraauridi, si ene, lo esau waga tupo kikiu eai bena se tudobei.

³¹Paulo senturion, eo iala tataodi i heribadi, i ene, “Ena nige se bawa waga eai, taba nige au mauri.”

³²Arinai abo iala tataodi waga wa ana maina se tomgabaei, abo i beudobi.

³³Mara i iuiari Paulo gamagaridi i riba‐henuapaipaidi, i ene, “Wau ta asubena hesaudoudoi‐hasina omi au aidabu, nige aiai begana au ai.

³⁴Arinai ea awanorimiu ta, aiai begana abo au ai; abo au adidiri: urumiu maiawadi taba nige esau ie motu.”

³⁵Ina doha ena ribariba, ia falawa i abi, isi gamagaridi matadi eai Eaubada i aihelahui: ie ihi abo ie ai.

³⁶Arinai abo isi gamagaridi nuadi se taru, isi hinage aiai begana se ai.

³⁷(Ai gamagarimai waga tau‐geruina tataomai handere labui eo tatao‐haiona‐si‐mate‐saudoudoi‐haligigiesega.)

³⁸Isi si aiai lautom, waga se hemamala, sitona se gabagabadobi gabogabo eai.

³⁹Mara‐ie‐tom oea wa se hekau: saga esau geregerena se ita edi nuatu si ene, nuana gonoana waga abo se hedunalau nei eai.

⁴⁰Lo se tom‐gabaedi se otawa, gabogabo eai eaisi ana maina se iairidi, tupo lalaki woreworena se uei, geregere wa se boboeowatai.

⁴¹Butubutu nei eai i laoma, inai i lau, abo se haioioi, waga wa abo se hetatadunaduna; tupo kikiu ie duna ie ota mo arinai, na bagodu lailaidi tupo lalaki se eatugorugoru.