Aposotolo Adi Hewau 26:7-24

⁷iaede eda asa saudoudoi‐labui ribahesunuma ta se nuanuatui, maiona to asubena edi tabatabaohu eai. Guiau Ageripa e, teina sunuma ta debana eai Iudea tataodi se hegiru‐napaigu ta!

⁸Taumatemate Eaubada abo i hetorouioidi, omi paana saha nige gonoamiu au awa mamohoiei?

⁹“Eau hinage nabada wa egu nuatu ea ene i lolo laulau gamagamagari ea abidi Iesu Nasareta esana hinage bena ea hebaaea.

¹⁰Egu laulau hinage meta doha ea abidi Ierusalema eai; hetabu tataodi gamagamagari numa masigiri eai ea tutuguduidi, kohena lailaidi se hetorogu; isi se unuhematedi, eau hinage ea ribasaguidi.

¹¹Sunago gamagamagari eai ea aiaipidiridi Eaubada bena se arina baaeai, eo egu ouyalayala lailai eai ea hebaaea‐aririedi, arinai ede se dago se lau hari eanua hari eanua.

¹²“Arinai ede ea lalau Damaseko, kohena lailaidi se hetorogu eo se hetamarigu edi uriuri ea laedi.

¹³Guiau e, asuasubenalai eai marana ea ita galewa eai i sinadobima, i mara ariri, nige doha mahana marana, eau eo isi hinage agu sasaguyao maeguyao i sinahetaiiri‐esegaimai.

¹⁴Ai gamagarimai ai guridobi tano eai, arina esau ea ataiei, arina Heberu eai i heribaguma i ene, ‘Saulo e, Saulo e, ue saha u hegadotoagu ta? I amamna ena aem nuri eai u aitutuidaoi mo.’

¹⁵Eau ea ene, ‘Guiau e, oa hede eai?’ ia i ene, ‘Eau Iesu ina u hegadotoagu ta.’

¹⁶Na u toro u torohai; arinai ede ea hemasarahaaurim ta, ea hetorom oa heaheari tauna, ginauri gamagaridi arigu eai ue ita, eo sora aridi eai abo ea hemasarahauioigu, oa abo tauwasaduaiedi,

¹⁷em eanua tataodi eo Murimuri‐tataodi ea hetamarim u lau aridi eai, ena se hebaaeam eau abo ea hemaurim.

¹⁸Isi matadi abo se helaladi, masigiri eai abo se itaitabui marana eai, Satani ena gigibori abo se otaotaei se lau Eaubada arinai, edi baaea abo se nuatugabaedi, isi enadi abo se abi tauhetabu maediyao, isi tausunusunumaegu wa.’

¹⁹“Arinai Guiau Ageripa e, wau galewa ribana wa nige ea awaeyagaraei.

²⁰Isi taumia Damaseko, eo abotai abo isi taumia Ierusalema, eo Iudea oeana eai taumiaina hinage, eo Murimuri‐tataodi ea heribadi, bena isi nuadi abo se buidi abo se itaitalau Eaubada arinai, hinage henuabui laulaudi abo se abiwataidi.

²¹Paana ede meta Iudea tataodi numa tabuna eai se toaigu, eo agu mata se eooi bena se unuigu.

²²Eaubada mo i saguigu i laoma e teina asubena ta, arinai ea totoro ta, tatao eo babada aridi eai riba ta ea hemasarahadi, nige saha ea ribaei na ginauri gamagamagari peroveta eo Mose si ene abo se tubu, meta mo ea ribaedi ede;

²³ribana ede: Keriso ia abo i amamna, eo ia tau bagubagunana mate eai abo i torouio, eda tataoyao eo Murimuri‐tataodi ia marana abo i heitadi.”

²⁴Nei doha ma‐ribaribana, Peseto i riba lailai i ene, “Paulo e, oa doha u koakoarere; em ata gamagamagari se heyauyaurem.”