Aposotolo Adi Hewau 21:4-14

⁴Tauawaabiena headi nei eai ai eooidi, aridi eai aie mia, asubena haligigi‐labui: isi Earua debana eai Paulo se heriba si ene tabu i sae Ierusalema.

⁵Asubenadi e se ohi, abo ai laugabaedi, ema adau wa ai adauei; isi gamagaridi se healatumai dobila eai, ma monediyao, ma nanatudiyao se hesaguemai, i lau e eanua ai laugabaei: aie dobi salagomgom eai arinai ai turibonogogo, ai lau‐uura eo ai lauaioniedi.

⁶Abotai aie geru, na isi se uiouio edi eanua.

⁷Turo ai gerugabaei, abo aie duna Tolemai eai, tauawaabiena ai aitoiedi, asubena esega maedamaiyao aie mia.

⁸Mara‐ie‐tom ai abo ai geru ai lage Kaisarea: ai awasae Pilipo ena numa eai, ia ede wasa lolo tauguguiaina lahinae tatao haligigi‐labui wa esau ede ia; maedamai aie mia.

⁹Teina tau ta ia nanatunayao hasara hasi, nige se tawasora, isi hinage tau‐peroveta.

¹⁰Nei eai ai miamia e eawalana, peroveta esau esana ede Agabu, Iudea eai i dobima.

¹¹Ia i lagema arimai eai, Paulo ena turituri i iairihai, iabom nimana eo aena i auuioidi, abo i ene, “Earua Tabuna ie riba, ‘Turituri ta tanuagana abo Iudea tataodi Ierusalema eai se au, doha ede teina, abo hinage se moselaei Murimuri‐tataodi nimadi eai.’”

¹²Teina riba ta ai ataiedi, ai eo isi nei asa ne tataodi, ai riba nuahi, ai aibodai ai ene tabu i sae Ierusalema.

¹³Paulo mo ema riba i heuioiama i ene, “Au sahasaha au doudou ta, eo aruagu au lauheloi? Ea nonohao taba se augu taiede, taba Ierusalema eai se unuigu Guiau Iesu debana eai, hinage taiede.”

¹⁴Ema ribanuahi nige i ataiei, arinai ai riba lautom, ai ene, “Besi, Guiau iabom nuana i lauei.”