Aposotolo Adi Hewau 21:17-38

¹⁷Aie lage Ierusalema eai, tauawaabiena se eogaisinimai, ma kodedi.

¹⁸Mara‐ie‐tom maedamai Paulo ai awasae Iamesi arinai; babada gamagaridi metai se bawagogo.

¹⁹Ia i lautoiedi, abo ginauri gamagamagari Eaubada i ginauridi Murimuri‐tataodi aridi eai, ena guguia debana eai, i heriba komakomanidi.

²⁰Isi riba wa se ataieyao, Guiau se hedebasaei, se ribalau ia arinai si ene, “Ema tau e, u itayao, Iudea tataodi moutuadi gamagamagari se ataiwatai; hinage nuadi se gigibori laugagaeo se abiwatai,

²¹eo gamagaridi wasam se ataiei, Iudea tataodi gamagaridi Murimuri eai se miamia, bena u heaheatadi Mose abo se nuagabaei, u ene nanatudiyao tabu se heperitomedi, laulau gamagaridi hinage tabu se abiabiwataidi.

²²Ita abo saha ta ginauri? Wau u laoma ta wasana abo se ataiei, moutuadi abo se oigogoma.

²³Ai heribam ta hage u lauwatai ede. Tatao hasi arimai eai ede se aigorayao.

²⁴isi u woeaidi maemyao u heaauioim, urudi tau’om’om oabom abo u hemaisadi, tatao gamagaridi arinai abo se ita, wasam wa se ataiei nige mamohoina, na oa hinage laugagaeo sogohina eai u laulau.

²⁵Na Murimuri tauawaabiena tataodi wa enadi ai uriurio, ai ene teina laulau mo taba se abiwataidi, ginauri se heaitalasamdio oitau aridi eai tabu se abilau, osina hinage, eo gado se lamosidi hinage, eo tabu se itaitadio.”

²⁶Mara‐ie‐tom Paulo tatao wa i woeaidi, maenayao i heaauioi abo se awasae esega dubu tabuna alona eai, se hemasaraha edi huia heasisi auiana i lautom, eo esau esau edi ainauia abo se tore.

²⁷Wau edi asubena haligigi‐labui wa i hanahanau abo se lautom, Iudea tataodi Asia eai se laoma, ia dubu alona eai se ita, tatao gamagaridi se heasiwolewoledi, abo se abilau ia arinai se toai.

²⁸Isi se eabayabaei, si ene, “Isaraela tataomiu e! Au saguimai! Teina tau ta, tatao gamagamagari eanua gamagamagari eai ia taulauheataedi, eda eanua tataodi, eo laugagaeo, eo dimo ta, hinage i lauguduguduidi: Heleni tataodi i woeaidi dubu alona eai, teina dimo tabuna ta i hebii.”

²⁹Paana isi eanua dobilana esau eai Paulo se itayao, maena Toropimo, Epeso tauna, ia i hesaguei, to isi si ene bena Paulo tau wa i woeaiyao dubu alona eai.

³⁰Eanua maudoina se moiugogo, gamagaridi se aitautaugogoma: Paulo se toai, se niurilaei dubu murimurina eai, dobila abo se lauguduidi.

³¹Isi se aipate ia bena se unui, iala tanuagana wasana i ataiei Ierusalema tataodi gamagaridi se hetalagegagega.

³²Iala tanuagana wa, iala tataodi maedi senturion headi i woeaheuheulaidi se aitautaugogo, se lau tatao aridi eai: isi iala tanuagana eo iala tataodi, se itadi Paulo se pidiri lautom.

³³Iala tanuagana i laoma, Paulo abo i toai, i hetaladuidi, maina poasi labui arinai ia abo se au; ia abo i oimuri, ia ede eai eo ia saha ie abi?

³⁴Moutuana boeadi eai, headi si eoga ina doha, headi nei doha, se eaba mo: edi hetalagegagega mata paana nige i lobai, arinai i hetaladuidi ia se bahei iala tataodi edi numa lailai eai.

³⁵Se lage bena se awasae paipeo eai iala tataodi ia se baheisini, paana tatao se hemahemanabara ariri;

³⁶paana moutuana gamagamagari se hemuriwataidi, se eabayabalau si ene, “Au aiduiei!”

³⁷Paulo se woeai numa lailai wa alona eai, i ribalau iala tanuagana arinai i ene, “Bena riba esau enam ea riba, e nige’e?” Ia i ene, “Oa arina Heleni ue ata, wa?

³⁸Oa Aigupito tauna, e nige’e, nabada tatao tausani hasi u woeaidi barabara eai, isi Tauaiaiunu wa?”