Aposotolo Adi Hewau 20:1-13

¹Se hetalagegagega lautom Paulo tauawaabiena i eogaidima, i alagoiedi, i lauaioniedi, abo i laugabaedi i lau Makedonia eai.

²Ie lau nei tupo gamagamagari ne aridi eai, i ribahenuapaipaidaoiedi, abo i lage Heleni eai.

³Nawalai haiona nei eai maedi se mia. Ia bena i geru i lau Suria, Iudea tataodi headi se oiriba se wesei, arinai abo i uio Makedonia dobilana i lauwatai.

⁴Headi ia se hesaguei maenayao se lau Asia eai, Sopata, Piru natuna, Berea tauna; eo Tesalonia tataodi headi hinage, Aritako eo Sekuna: eo Gaio, Derebe tauna, eo Timoteo; Tukiko eo Teropimo, Asia tataodi hinage.

⁵Isi se bagunaimai, Toroa eai se bagibagiemai.

⁶Areto‐Nige‐i‐Sese mataasi huiadi se lautom, abo Pilipi ai gerugabaei; asubena haligigi abo ai duna Toroa eai isi aridi eai, hinage asubena haligigilabui nei eai aie mia.

⁷Sabati asubenana bagubagunana eai, tauataataiena se oigogo, areto se ihi, Paulo i guguianonohaidi, mara‐ie‐tom bena abo i laugabaedi; ena riba i heloha, i lau e bulinuana eai.

⁸Lamepa gamagaridi si healasidi ema aba‐oigogo eai, biri pota eai.

⁹Hewari esau, esana ede Eutuko tomlapai eai i babawa, i eno mate. Paulo ma guguialohalohana, arinai abo hewari wa matana se enoeno ariri, numa isi haiona i beuhemuridi, tano eai ia se abi’sini, i mateo.

¹⁰Paulo abo i pesadobi, i salaoba dobi, i labaisiniama, i ene, “Tabu nuamiu se baaea, ena mauri ma otana tuiatuiana eai.”

¹¹Ia abo i awaseuio, eo areto ie ihi, se aiai eo riba, i riba heloha i lau e mara‐ie‐tom, arinai abo i laugabaedi.

¹²Hewari wa se woeaiama i mauri uio, eo nuadi abo se taru komakomani.

¹³Ai aie geru baguna waga eai, ai lau Aso eai, arinai abo Paulo ai bagibagiei doha i hetaladuimai, ia i henua i lauyona.