Aposotolo Adi Hewau 1:2-18

²i lau e nei asubenana eai ne ena lauhesom i ribaedio Aposotolo i hineridi wa aridi eai, Earua Tabuna debana eai, abotai ia se abiisini.

³Ia i hetaumasarahauioi aridi eai, mamaumaurina ena amamna murina eai, aba‐italobaina heiheinoidi se gamagari ariri, asubena tatao‐labui‐se‐mate sorasoradi eai matadi eai i tautaumasaraha, Eaubada ena basileia ribadi i ribaribaedi.

⁴Maedi se miamiaesega i lauhesomdi i ene Ierusalema tabu se laugabaei, na Tamana ena ribahesunuma bena se bagibagiei mo, iaede i ene, “ea heribamiuo,

⁵ea ene mamohoi Ioane goila eai i hebapatiso, na sora omi nige baeaona abo Earua Tabuna arinai se hebapatisoimiu.”

⁶Arinai huia esau se bawagogo, ia se oimurilau si ene, “Guiau e, huia ta abo Isaraela basileiana u heheliuioi e nige’e, wa?”

⁷I ribalau aridi eai i ene, “Omi nige enamiu bena asubenadi eo huiadi abidi au ata, meta Tamana iabom ena gigibori eai i tauribaedio.

⁸Na omi gigiborina abo au hearo sora Earua Tabuna abo i dobima potamiu eai; eo omi abo tauwasawasaegu, Ierusalema eai, Iudea se hetaiiri, eo Samaria eai i lau e tanoubu sigasigana eai.”

⁹Teina riba ta i ribaedio, ma‐itaitalaudi, na ia se abiisini, eada boeana eai i tauyamui matadi eai.

¹⁰Ma launa, se itaitawataisae galewa eai, na tatao labui hede se totoro gegesidi eai, adi lulu se posiposi ariariri,

¹¹si ene, “Galilaia tataomiu e, saha au totoro au itaitasae galewa? Teina Iesu ta, arimiu eai wau se abiisini galewa eai, sora abo i uioma, ena laolaoma doha wau aue ita ena lau galewa eai ta.”

¹²Abotai abo Oliveta tupina se laugabaei se uio Ierusalema. Oliveta Ierusalema i hanahanau doha hinage asubena sabati lauwasina;

¹³isi se lage, se awasae numa isi‐pota birina eai, Petero, eo Iamesi, eo Ioane, eo Anederea, eo Pilipo, eo Toma, eo Batolomaio, eo Mataio, Iamesi Alepaia natuna, eo Simona Selote, eo Iuda Iamesi ena tau, edi aba miamia.

¹⁴Isi gamagaridi huia gamagari nuadi esega mo se lau‐uura, eo se aiboda, sisine headi maediyao, eo Maria Iesu sinana, eo ena dodogayao hinage.

¹⁵Nei asubenadi ne Petero i toro heaheata boeadi eai (isi esadi se hasiridi tataodi handere esega eo tau‐esega‐i‐mate) i ene,

¹⁶“Egu tataoyao e, teina uriuri tabuna ta se hemamhoiei ede ina, Earua Tabuna Davida awana eai i ribanonohai, Iuda ribana, ia ede Iesu tautoaina tauwoeaidi.

¹⁷Paana ede ia hinage maemai se hasiriesegaimai, teina paisoa ta tupona ia tauabina hinage.

¹⁸(Tau ta oea esau i uneunei, ena abi‐baaea maisana monina eai; abotai ie beu, i hedonapile bogana i taigari, sinaena i dabalalagorigori.