Aposotolo Adi Hewau 18:2-20

²Ia Iudea tauna esau maena se hailobai esana ede Akula, Ponoto eai se labasi, ia ma monena esana ede Peresila, Italia eai se laolaoma (paana ede Kalaudia Iudea tataodi gamagamagari i lauhesomdi, isi Roma se laugabaei), Paulo ie lau i itadi;

³ia eo isi edi nima‐paisoa esega, arinai i miamia aridi eai eo se paisoa, adi paisoa wa numa‐lulu tauginaginauri,

⁴Sabati gamagamagari sunago alona eai i lauheataidi, Iudea tataodi eo Heleni tataodi i nuaoihetaiiridi.

⁵Abotai Sila eo Timoteo Makedonia eai se lagema, Paulo lauguguia arinai ie mode Iudea tataodi aridi eai i ribaribahemasaraha, ede Keriso iaede Iesu.

⁶Isi se riba gudugudui eo se arina baaeai, arinai ana lulu i oiluiluidi i ribalau aridi eai i ene, “Omibom mo osinamiu potamiu eai! Eau taba nige agu giru. Ina abo ea lau Murimuri‐tataodi aridi eai.”

⁷To nei eai i laugabaedi, i awasae tau esau ena numa eai, tau wa esana Tito Iuseto, Eaubada tauaihelahuina esau, ia ena numa eo sunago se haitore‐siribebe.

⁸Kirisipo, sunago tanuagana, abo Guiau i nuatuwatai, maenayao ena numa tataodi gamagaridi; Korinito tataodi moutuana Paulo ena riba se ataiei Guiau se nuatuwatai hinage, eo se bapatiso.

⁹Maiona esau Guiau Paulo i he‐enosuai, i ribalau ia arinai, i ene, “Tabu u matausi, u riba, tabu u monomonou,

¹⁰eau maidam, taba nige tau esau i abilaowa, i hebaaeam: paana ina eanua eai ta egu tatao se gamagari.”

¹¹Ia nei eai ie mia borimai esega, eo nawalai haligigi‐esega Eaubada ena riba i laulauheatai isi boeadi eai.

¹²Na huiana ne Galio se hetoro Akaia tehana eai i hemala gavana, Iudea tataodi nuadi esega bena Paulo se toai, ia abo se laei tauhedudurai matadi eai,

¹³si ene, “Tau ta tatao i nuaoihetaiiridi, bena Eaubada se aihelahui nige doha ema laugagaeo eai ribana.”

¹⁴Paulo bena awana i dabari, Galio i ribalau Iudea tataodi aridi eai, i ene, “Iudea tataomiu e, taba laulau ponori, e laugagaeo utusina lailaina esau, matapaana gonoana abo emi riba ea ataiei;

¹⁵na ina emi laugagaeo ribadi eo esadi au haihesabaedi, besi, omibom au eooi; eau taba nige ina ginauri ta ea hedudurai.”

¹⁶Abahedudurai abababawana eai ne i aiduiedi.

¹⁷Isi gamagaridi Sosene, sunago tanuagana wa, se toai, aba‐hedudurai numana awamatana eai se pidiri. Na Galio laulau ta nuana nige se lauedi.

¹⁸Murina eai Paulo i miatahitahi aridi eai, abotai tauataiena i lauaioniedi, ie geru ie lau Suria, Peresila eo Akula ia maenayao: Kenekerea eai i uru’om, paana ede ia i aigora.

¹⁹Epeso eai se lage metai i laugabaedi: iabom i awasae sunago alona eai Iudea tataodi maenayao se ribariba.

²⁰Isi ia se awanori bena i miatahitahi aridi eai, nige nuana mia;