Aposotolo Adi Hewau 17:1-24

¹Isi taudi labui Amepipoli, eo Apolonia se dio, abo se lulage Tesalonia eai, Iudea edi sunago esau nei eai.

²Paulo ia kamakamanina i awasae isi aridi eai asubena sabati haiona uriuri tabuna ribana maedi se ribaribaei,

³i ribahemasaraha, eo i ribariba headidiri, i ene Keriso taba i amamna, mate eai hinage taba i torouioma, i ene “Teina Iesu ta, ia ribana ea guguiaimiu ta, ia Keriso ede.”

⁴Isi headi se ataiwatai abo se patulaoma Paulo eo Sila aridi eai; Heleni tataodi Eaubada taunanabuena moutuana lailai hinage, eo sinesinebadao begana se gamagari.

⁵Iudea tataodi isi nige se ataiwatai wa se aiaromagigiri, tatao gaibu sanapu baaea tataodi headi se heoigogoidi eanua wa se heasiwolewole: Iasona ena numa se hailopai, taudi labui se eooidi bena se laedi murimuri eai tatao aridi eai.

⁶Isi nige se lobaidi, arinai Iasona eo tauataataiena headi se ahaladi se laedi eanua tanuagadi aridi eai, si ene, “Teina tatao ta, tanoubu se heasibui, isi ede se lagema inai hinage,

⁷Iasona i abitaumanaidi: isi gamagaridi Kaisara ena laugagaeo ribadi se utusidi, si ene, Wasawasa esau ede Iesu.”

⁸Teina riba ta se ataiei, eanua tataodi, eo tanuagadi hinage aruadi se loi.

⁹Se riba paodi, Iasona maena sasaguyao se toreyao, isi abo se iairigabaedi.

¹⁰I maiona abo tauataataiena Paulo eo Sila se hetamariheulaidi se lau Berea; isi se lage nei eai se awasae Iudea edi sunago alona eai.

¹¹Tatao Iudea inai se lolo, nige doha tataodi wa Tesalonia eai, paana ede riba wa se ataiei ma nuagigiboridi, asubena gamagamagari uriuri tabuna se eooidi, bena riba wa se hemamohoiedi.

¹²Arinai gamagaridi se ataiwatai, Heleni sisine saesaedi headi, eo tatao headi gamagaridi hinage.

¹³Iudea tataodi taumia Tesalonia wa, wasana se ataiei Paulo Eaubada ena riba Berea eai i lauguguiai, se hemuriwataidima nei eai, tatao se heasiwolewoledi eo se hesohesomdi.

¹⁴Arinai tauataataiena Paulo se hetamari heulai bena i dobi geregere eai; na Sila maena Timoteo se mia.

¹⁵Isi Paulo tauwoeaina wa ia se laei Atenai eai; i lauhesomdi, i ene Sila maena Timoteo bena se heuheulama ia arinai; arinai isi wa abo se torohai se lau.

¹⁶Paulo Atenai eai i bagibagiedi, eanuana ie ita, oitau i monau, arinai nuana i auauedi,

¹⁷arinai ede maenayao Iudea eo Eaubada taunanabuena headi, sunago alona eai riba se haihaiawayagaraei, eo abauneune eai asubena gamagari aidobudi nei eai i lobaidi maena se oioiriba.

¹⁸Tatao sonogadi headi esadi se ribaedi Epikuro peledi eo Sitoiko peledi, maedi Paulo se oiriba, na headi si ene, “Hage taugigigimasina ta abo i ene edoha?” Headi hinage si ene, “Ia eanua udoi eaubadadi tauguguguiaidi,” paana ede Iesu eo ena torouio i ribahemasarahadi.

¹⁹Isi ia abo se abilau, se woeai se laei Areopago eai, si ene, “Wau riba harihariuna u ribaei wa, taba ai ataiei?

²⁰Paana riba udoi ina u leama beamai eai; ai henua aniona ai ita.”

²¹Kamanidi Atenai tataodi eo taulaolaoma nei eai se miamia, edi laulau esaga mo, riba harihariudi bena se ataataiedi eo se ribaribaedi.

²²Paulo abo i toro Areopago duaduarina eai i ene: “Atenai tataomiu e, ea itamiuo emi aigora se gamagari ariri.

²³Ea baeawaemiu emi abatabaohu gamagaridi ea itadi, aitalasam hatahatana esau hinage ea iita, uriurina ina doha se pusai si ene, “NUATUPA EAUBADANA ENANA”; ia au tabaohui, na au hekau wa, ia ede ea ribahemasaraha arimiu eai ta.

²⁴Eaubada tanoubu tauginaurina, eo ginauri gamagaridi boeana eai, ia galewa eo tanoubu Guiauna, tatao dubu se ginauridi nimadi eai taba nige ena abamiahai meta,