Aposotolo Adi Hewau 16:1-26

¹Ia ie lage Derebe eai, eo Luseta hinage: tauataiena esau nei eai esana ede Timoteo, sine esau natuna, ia Iudea sinena eo ia tauataiena, na ia tamana Heleni tauna.

²Tauataiena gamagaridi Luseta eo Ikonio eai se mia, si ene, ia tau lolo.

³Paulo ia i henua ia maena bena se lau; ia abo i heperitome paana Iudea tataodi nei eai se miamia i nuatuidi, isi gamagaridi se nuatuiyao ia tamana Heleni tauna.

⁴Se tautausi se lau eanua gamagamagari eai, aposotolo eo babada Ierusalema eai se mia wau edi riba wa se moselaedi bena se sogohidi.

⁵Ina doha ekalesia edi sunuma eai se headidiridi, eo asubena gamagamagari se hetadada helailai.

⁶Isi se dio’o Perugia eo Galatia tehadi eai, Earua Tabuna i ribanuahidi tabu riba wa Asia eai se guguiaei.

⁷Abotai abo se lage Musia eai bena se lau Bitunia, na Iesu Earuana nige ie eari.

⁸Arinai Musia se utuhadidi, abo se dobi Toroa eai.

⁹Maiona eai Paulo i enosuai: tau Makedonia esau i totoro i aiaibodai i ene, “U dioma Makedonia eai, u saguimai.”

¹⁰Enosuai eai ie ita maesega bena ai lau Makedonia eai ema dobila ai eooi, ai ene, Guiau i eogaimai, evanelia isi enadi abo ai guguiaei.

¹¹Arinai Toroa eai aie ue, ai boboeo ai dobi Samotake eai, mara‐ie‐tom Neapoli eai aie duna.

¹²Nei eai ai geru‐gabaei ai lau Pilipi eai, Makedonia eanuana ede, nei tupo ne eanua wasawasana, Roma edi asa esau; eanua eai ne hinage asubena headi arinai ai miamia.

¹³Sabati eai eanua ai laugabaei ai lau saga laopana eai, tatao edi aba lau‐uura eai ne; ai bawabigabiga, sisine nei eai se bawagogo ai ribalau aridi eai.

¹⁴Sine esau esana Lidia, ia lulu buiabuia tau‐uneunena, ena eanua esana Tuatira, sinena wa ia Eaubada tauaihelahuina ema riba i ataiedi; Guiau ia nuana i hemalapai, Paulo ena riba abo i ataieikomakomanidi.

¹⁵Ia se hebapatisoiyao, eo ena numa taumiaidi hinage, i awanorimai, i ene, “Ena nuamiu au ene Guiau ea nuatu‐mamohoiniyao, au laoma egu numa eai au miamia.” Ia i nuaoimai.

¹⁶Huia esau ai lau aba lau‐uura eai siu esau i alaalawai maemai ai hailobai ena alaalawai maisadi lailaidi ana tanutanuaga se abiabidi.

¹⁷Paulo maemai i hemuriwataimai, i eabayaba, i ene, “Teina tatao ta, Eaubada Saesaearirina ena heaheari tataodi, isi mauri dobilana tauheitada.”

¹⁸Asubena gamagamagari ena laulau esega mo nei doha. Paulo i tausiololo, ie torobui i ribalau earua arinai, i ene, “Iesu Keriso esana eai ea heribam ta u lulage murimuri eai.” Nei mahana eai ne abo i lulage.

¹⁹Ana tanuagao se ita edi ginauri edi abaabidi i lautom, Paulo eo Sila se taoidi, se niuridi abauneune eai.

²⁰Se woeaidi se laedi abahedudurai tataodi aridi eai, si ene, “Teina tatao ta, Iudea tataodi ina, eda eanua ta se heasiwolewole.

²¹Laulau headi hinage se laulauheataedi, ita Roma tataoda taba nige ta abidi, taba nige ta laulauedi.”

²²Moutuadi se torogogo esega bena se guduguduidi: tau riba‐heduhedudurai tataodi adi lulu se purisihaidi, si lauhesomdi si ene, “Taudi labui me au pidiridi.”

²³Se pidiridi e, se pidiriasayaidi, abo numa masigiri eai se toredi, tauitawataidi se heriba, bena i itawataikomakomanidi.

²⁴Se heriba wa i ataiei isi birigom eai i toredi, aedi aba audi oeagi eai wa i eahisididinidi.

²⁵Bulinuana eai Paulo eo Sila se lau‐uura, eo se wana Eaubada se aihelahui: tatao‐tutututugududi se ataataiei,

²⁶moniinii tano i hetabubu gorigori, numa masigiri paana i he’eo’eo: dobila gamagaridi se tasoegorigori, tatao gamagaridi adi auau se tamotumotugorigori.