Aposotolo Adi Hewau 15:1-12

¹Tatao headi Iudea eai se dobima tauataiena se heatadi, si ene, “Omi ena taba nige au peritome, doha Mose ena laulau, taba nige au mauri.”

²Paulo eo Banaba isi maedi se lulu, eo se haiawayagara, arinai ede Paulo eo Banaba se hetamaridi eo headi hinage maediyao, se sae Ierusalema eai aposotolo eo babada aridi eai teina riba ta bena se hesioei.

³Ekalesia dobila eai se woeaidi, isi Ponikea eo Samaria se dio, Murimuri‐tataodi se henuabuidi wa ribana tatao se heribadi: arinai tauataiena gamagamagari se kode ariri.

⁴Isi se lage Ierusalema eai, ekalesia, eo aposotolo eo babada se abidi, Eaubada ena abiabi gamagamagari isi aridi eai se ribaedi.

⁵Tauataiena headi, isi Parisea peledi, se toro si ene, “Taba se heperitomedi i lolo, isi taba se lauhesomdi hinage Mose ena laugagaeo bena se sogohidi.”

⁶Aposotolo eo babada se oigogo ina riba ta se oiribaei.

⁷Isi se haihaiawayagara daoi, Petero abo i toro i ribalau aridi eai, i ene, “Tatao e, eo egu tataoyao e, omi au itayao, nabada wa Eaubada i hineridao bena eau awagu eai Murimuri‐tataodi wasa lolona ribana se ataiei, abo se abiwatawatai.

⁸Eaubada nuadi i itadio ia ena heiheinoi ede Earua Tabuna, hinage i mosei aridi eai, doha hinage i leama arida eai.

⁹Ita ede ina, isi ede nei, nige i abiudoiedi, edi sunuma eai nuadi i deuri‐heaadi.

¹⁰Omi aue saha Eaubada au nohoi, bena ina oibahe ta au toresaei tauataataiena gedugedudi eai, tamadayao edi adidiri eo ita eda adidiri nige gonogonoana.

¹¹Na ta nuatui, Guiau Iesu Keriso ena ainauia eai mo abo ta mauri, doha hinage isi.”

¹²Gamagaridi oigogo eai wa isi nige ariarinadi, Banaba eo Paulo edi riba se ataieikomakomanidi, gigiboridi eo noodi Eaubada i hemasarahadi nimadi eai wa, Murimuri‐tataodi boeadi eai, taudi labui se ribaribaedi.