Aposotolo Adi Hewau 14:5-24

⁵Murimuri‐tataodi, eo Iudea tataodi, eo adi tanuagao maediyao, bena se heamamnadi eo se lauwe’uidi,

⁶isi se ataiei, se dago, se lau Lukaonia eanuadi eai esadi Luseta eo Derebe, eo dimodi ne se tau‐hetaiiridi.

⁷Nei eai isi wasa lolona se guguia‐hemasaraha.

⁸Tau esau Luseta eai ie bawa aena se megomego, ia sinana bogana eai aena se baaea, nige i dadadahai.

⁹Ia Paulo ena riba i ataiei: Paulo ia i itadidini, eo ia nuana i ita ena sunuma eai abo i mauri,

¹⁰i arina lailai, i ene, “U toro dudurai aem eai.” Ia abo i lamposi, i laulau.

¹¹Tatao Paulo ena gigibori se ita, se eoga lailai arina Lukaonia eai, si ene, “Eaubada se dobima arida eai, adi ao doha tatao!”

¹²Isi Banaba esana se torebui Dia, eo Paulo esana se torebui Hereme, paana ede ia i laulauguguiasom.

¹³Dia ena kohena tauna, eanua baubauna eai, bulumakau eo oeagi liasidi inodi i ledima dobila eai, bena tatao maenayao abo se aitalasam.

¹⁴Aposotolo ne Banaba eo Paulo, se ataiei, edi lulu se purisidi, se aitautau tatao boeadi eai, se eaba lailai,

¹⁵si ene, “Tautaubadao e, saha aue abi? Ai hinage tatao, nuamai, doha omi, wasa lolona ai leama omi enamiu, teina nuatu eauyauredi ta bena au nuagabaedi na au sinibui Eaubada maumaurina arinai, ia ede galewa, eo tanoubu, eo gabogabo, eo ginauri gamagamagari boeadi eai tau hetubudi ede.

¹⁶Isidi bagubagunadi eai, basileia gamagaridi isibom edi laulau se lauwataidi,

¹⁷ia mo nei huiana ne hinage, heiheinoina se masaraha, ena abi se lolo, eda nabu i hetaruyama, eo masuri i hetare, arinai nuada se lolo, bogada se sese, ta kode.”

¹⁸Ina riba ta arinai tatao se nuahidi, aitalasam nuatuna wa arinai abo i lautom.

¹⁹Iudea tataodi headi Anetioka eo Ikonio eai se laoma, tatao se lauhesomdi, isi Paulo se lauwe’ui abo se niurilagei eanua murimurina eai, edi nuatu si ene bena i mate aririo.

²⁰Tauataataiena ia se toro‐hetaiiri, abo i toro, ie uio eanua eai: maraitom maena Banaba eanua se laugabaei se lau Derebe eai.

²¹Nei eanua eai ne wasa lolona se guguiaidi eo gamagaridi se heatadi, abo se uio Luseta, eo Ikonio, eo Anetioka eai.

²²Tauataataiena nuadi se headidiridi, eo se henuapaipaidi edi sunuma bena se sogohididini, eo si ene amamna gamagamagari aridi eai abo ta lulau Eaubada ena basileia eai.

²³Ekalesia gamagamagari aridi eai babadadi se hetorodi, maediyao se lau‐uura, eo se aiaiudi hinage, abo enadi se lau‐uura Guiau arinai, ia wa se nuatudidini.

²⁴Isi Pisidia se diogabaei se lage Pamepulia eai.