Aposotolo Adi Hewau 13:35-49

³⁵Arinai hinage Vana esau eai, i ene, ‘Oaem Hetabu Tauna u nuanuaiei ia taba nige i posa’ (Psa. 16.10).

³⁶Paana ede Davida, ana isi i saguidi Eaubada ena nuatu debana eai, ia abo i tubahai, se tore‐esagaidi ma tamanayao, ia abo hinage ie posa:

³⁷na ia, Eaubada i hetorouioi wa, nige i posa.

³⁸Tatao e, eo egu tataoyao e, omi abo au ita, wau tau wa debana eai baaea ribagigirina se guguiaimiu:

³⁹ia debana eai hinage tauataiena gamagamagari se dudurai ginauri gamagamagari aridi eai doha nige au dudurai Mose ena laugagaeo debadi eai.

⁴⁰Arinai au itakomakomani ata meta peroveta se ribaeyao wa au hearo; i ene,

⁴¹‘Iei, omi tauhalanuinui, abo au noo, eo au tatagorigori: emi asubenadi eai paisoana ea paisoa, ena tau esau paisoa wa i riba hasahasaimiu taba nige au nuatui.’”

⁴²Iudea tataodi sunago eai se pesao, abo Murimuri‐tataodi headi se awanorini si ene, “Sabati esau matada eai bena ina riba ta u ribauioidi.”

⁴³Isi tauoigogo se pesagorigori Iudea tataodi eo Eaubada taunanabuena headi se hemala Iudea, isi Paulo eo Banaba se lauwataidi: se heribadi, eo se headidiridi, isi Eaubada ena ainauia eai abo se lauesegai.

⁴⁴Asubena sabati matadi eai wa eanua tataodi gamagaridi se oigogo Eaubada ena riba bena se ataatai.

⁴⁵Iudea tataodi moutuadi we se itadi isi se aiaromagigiriedi, Paulo ena riba se hetataguduguduidi, se haiawayagara eo se arina baaea hinage.

⁴⁶Paulo eo Banaba abo se riba‐adiadidiri, si ene, “I lolo Eaubada ena riba ai heribabagunaemiuo: na omi au otaotaeyao, omibom hinage au ene mauri nige nosina taba nige au abi, arinai ina ai sinibui Murimuri‐tataodi aridi eai

⁴⁷Mamohoi Guiau i hetaladuimai, doha i ene, ‘Ea torem ta, Etene tau‐hemaradi eai abo u lau, oa edi mauri paana eai abo u lau, i lau e, tanoubu sigasigana eai’ (Isa. 49.6).

⁴⁸Teina riba ta Murimuri‐tataodi se ataiei abo se kode, Guiau ena riba se hatoei: isi headi mauri nige nosina eai se nuatunonohaidi, isi ede se awamamohoi.

⁴⁹Guiau ena riba se wasaduaiei dimo gamagamagari eai ne.