Aposotolo Adi Hewau 12:3-24

³Iudea tataodi i itadi, nuadi se lolo, arinai abo Petero hinage bena i unui (nei asubenadi ne areto‐nige‐se‐sese huiana ede).

⁴Ia Petero i toai nonohai, abo ie tore numa tutugudu alona eai, ia se moselaei iala bodadi hasi aridi eai se itawatai edi nuatu bena Pasova murina eai abo se woeai tatao matadi eai.

⁵Arinai Petero numa tutugudu eai se abididini: ekalesia se uura adiadidiri huia gamagamagari bena Eaubada ia abo i sagui.

⁶Huiana ne Heroda bena Petero i woeahemasaraha, maionana ne ie eno iala tataodi labui ia se heduheduari, maina poasi labui ia arinai se auaui: tauitaitawata numa tutugudu dobilana awamatana eai se itawatai;

⁷Guiau ena aneru esau i taumasaraha ia arinai, eo marana numa tutugudu i hemahemaraisini: ia Petero lisilisina eai i oitagulaei, eo i abihetoro, i ene, “U toro heuheula.” Maina poasi ia nimana eai abo se beuhaima.

⁸Aneru abo i ribalau ia arinai, i ene, “Em nogi u lio, eo am ae’um u audi.” I ginauri nonohaidi: ia abo i heriba, i ene, “Am lulu u aboboei, u lauwataiguma.”

⁹Aneru wa abo i lauwatai i lulage murimuri eai; aneru i woeai wa nige i nuatulobai, i ene bena i enoliuliua.

¹⁰Biri esau se laugabaei eo biri helabuina hinage, abo se lage dobila ana gudu poasi wa baubauna eai; dobila guduna wa iabom abo i tasoe: se lau murimuri eai dobila esau se lauwatai, arinai aneru wa Petero i laugabaei.

¹¹Petero abo nuana i sae, i ene, “Abo ea ita mamohoi hedeomi Guiau ena aneru i hetamariama, Heroda nimana eai i hemaurigu ta, Iudea tataodi edi gadosisi taba nige ena aba tubu.”

¹²Ena dobila i nuatui, abo i ene ea lau Maria, Ioane Mareko sinana, ena numa eai, nei eai tatao gamagaridi se oigogo se laulau‐uura.

¹³Petero dobila guduna murimurina eai i ipeipesi: siu esau esana Roda i laoma i ataatai.

¹⁴Ia Petero arinana i atailobai, dobila wa nige i soe ma kodena mo i aitautau ie lau i heribadi, i ene, “Petero kalau nei dobila murimurina eai i totoro.”

¹⁵Se ribalau ia arinai, si ene, “Oa u eauyaure.” Na ia mo i riba adidiri, i ene, Mamohoi. Isi abo si ene, “Ata bena ena aneru meta!”

¹⁶Petero i ipeipesi mo: isi dobila se soe ia abo se ita se noo.

¹⁷Ia nimana eai i oitawaidi, i ene abo se monou, abo i heribadi, i ene Guiau numa tutugudu eai i woeahelulageguma. Abo i ene, “Au lau Iamesi eo tataoyao hinage teina ginauridi ta au heribadi.” Arinai abo i laugabaedi, ie lau dimo esau eai.

¹⁸Mara‐ie‐tom iala bodadi se hetalagegagegausi, si ene Petero edohana, haedi i laulau?

¹⁹Heroda hinage Petero i eooi, eo nige i lobai, ia i hesio tauitawataina aridi eai, abo i lauhesomdi i ene tauitawataina bena se unuidi. Ia abo Iudea i laugabaei i dobi Kaisaria eai, arinai i miahai.

²⁰Heroda Turia eo Sidona tataodi i ouyalayalaedi; na isi nuadi esega se laoma ia arinai, ena numa tauitawataina Belaseto arinai se awaheriam baguna, wasawasa arinai bena se awa‐loni, paana adi aiai ia ena oea eai i laoma, to se duihasari ia arinai.

²¹Asubena esau se ribanonohai, Heroda ana pasa ie lui, ena terona potana eai ie bawa i lauguguiaidi.

²²Abo tatao wa se wowo gogo, si ene, “Arinana ta eaubada arinana, nige tau arinana!”

²³Ma‐esega abo Guiau ena aneru Heroda ie talailaei, paana ede Eaubada nige i heasisiei: motamota ia se ai, to ie mate.

²⁴Eaubada ena riba abo ie tubu, abo i tadada lailai.