Aposolo Jaŋere Binaŋ 9:2-25

²Damasko haeo Judaŋic jumbiŋ jaŋere papia qâreŋkerâ râcnewec. Râcneme rorâ ocna hata ɋârio moc jupie bâfuac‐joparâ ŋic mecne ŋokac mecne mejeŋic qarâ Jerusalem haeo bacjopa wareocte rawec.

³Izi raku Damasko hae bâqiŋkezo ehame sambâŋkonec ʒoc tatamaczi uŋ herâ waha âeckewec.

⁴Âeckeme mâreŋko rândiŋke qarâ fohuc dâŋ moc ʒiŋuc manawec: “Saulo, Saulo, go wemocte nu jâpec enarehuc juekic?”

⁵Mume Saulozi wiohuc muwec, “Wofuŋ go mo?” Eme muwec, “Nu jâpec enarehuc juekic Jesu no hâcne.

⁶Go faharerâ haeo ratec ira wiac ecmurâ dâŋne gazaniŋmu.”

⁷Eme ŋic ehec jumbiŋ jaŋe dâŋwe tâmiric mâc fâsâerâ domambiŋ, jaŋe dâŋ sawa manambiŋ, â ŋic ine moc mi honembiŋ.

⁸Eme Saulo e faharerâ ʒâŋe fiocte fi qeruruc ewec. Iŋuc eme ŋicfâcne jaŋe menao rorâ Damasko haeo barambiŋ.

⁹Eme ira ʒoaŋ gie bapa jahec â moc tiŋtuŋ jaha fohuc nânâ opâ mi nâwec.

¹⁰Damasko haeo Jesure qâjâpec moc juwec, ʒâŋene Anania, e Wofuŋzi maŋko fuac ecnehuc wiracnewec, “Anania.” Eme muwec, “Wofuŋ no ʒi.”

¹¹Mume Wofuŋzi ʒuhuckerâ ʒiŋuc muwec: “Go hata ʒâŋene Dândâŋne mueŋgopieŋ ira rarâ Judare ficko ferâ ŋic moc ʒâŋene Saulo, Taso haeonec, e bâfuazemec. Manakic, e numu‐narehuc fokac.

¹²Erâ maŋticnezi wiac ʒiŋuc honejec: Ŋic moc ʒâŋene Anania erao fisirâ ʒâŋe fifihec eocte mene qizecnao râejec.”

¹³Wofuŋ e dâŋ iŋuc muhuc âzâcneme Ananiazi ʒiŋuc muwec: “Wofuŋ, ŋic ere mâretec mupie manaekopac, e fuŋfuŋfâcge Jerusalem haeo ba imac wemo afecne ejareekac.

¹⁴Erâ ʒira iŋuc jaha ʒâŋege riwaseckeeŋgopeneŋ nâŋe repac‐nâporâ bacnâpo raocte taha bapa micne jaŋe mucnembiŋ.”

¹⁵Mume Wofuŋzi ʒiŋuc âzâcnewec: “Go sifu rac, ŋic e mefâro‐nane, eki hâcne ʒâŋe biŋe‐nane ŋic qâpuc â ŋicwofuŋ â Israe guru jaŋerao barahuc juzejec.

¹⁶Iŋuc ehame no ʒâŋe biŋe‐nanere erâ ʒârâ hâriŋ faio juocte qazucnepemu.”

¹⁷Eme Anania e rarâ fic mukicne ira ferâ Saulore qizecko meticne râehuc muwec, “Saulo qomâ‐nane, Wofuŋ Jesu hatao fua‐garewec, eki hâcne sorecnume warekopac, go ʒâŋe fifi ehuc Tiri Mârohec ecmurâ mukac.”

¹⁸Iŋuc muhuc âzâcneme izia ʒâŋenaonec wiac gagara tinac wahame ʒâŋe fifi erâ faharerâ mume Miti Opâ ruacnewec.

¹⁹Ehame nânâ nârâ sanaŋkewec. Saulo e Jesure kikefuŋ Damasko haeo jumbiŋ jaŋehec piticne jurâ

²⁰izia biac Judaŋic jaŋere mitificko ferâ Jesure biŋe muropiehuc kecʒiŋuc jazawec: “Jesu e Anuture Ŋokâ.”

²¹Iŋuc jazame manarâ quŋkecnehuc ʒiŋuc mumbiŋ: “Jerusalem haeo ʒâŋe i hâcne riwaseckepie ima bacjopaku ʒira iŋuc jaha repac‐joparâ taha bapa micne jaŋerao bacjopa raocte warewec, izi weniŋuc erâ hec hetikic ekac?”

²²Eme Saulo e samandiŋkerâ, Jesu e Kristo jâmbâŋ, irec dâŋfuŋne muritu‐hâmohuc Damasko haeo Judaŋic jumbiŋ jazame manapie guguru ewec.

²³Iŋuc eku Judaŋic jaŋe Saulo qaniŋte mumockembiŋ.

²⁴Mumockepie Saulozi biŋe manarâ juhame jaŋe qaniŋte haesac motâcko ŋafe furec soŋsoŋ domambiŋ.

²⁵Iŋuc epie Jesure qâjâpecfâc jaŋe ŋafeo sasacko ŋiherâ sacrâpeo âke suepie hurâ wisewec.