13Wofuŋ e dâŋ iŋuc muhuc âzâcneme Ananiazi ʒiŋuc muwec: “Wofuŋ, ŋic ere mâretec mupie manaekopac, e fuŋfuŋfâcge Jerusalem haeo ba imac wemo afecne ejareekac.
14Erâ ʒira iŋuc jaha ʒâŋege riwaseckeeŋgopeneŋ nâŋe repac‐nâporâ bacnâpo raocte taha bapa micne jaŋe mucnembiŋ.”
15Mume Wofuŋzi ʒiŋuc âzâcnewec: “Go sifu rac, ŋic e mefâro‐nane, eki hâcne ʒâŋe biŋe‐nane ŋic qâpuc â ŋicwofuŋ â Israe guru jaŋerao barahuc juzejec.
16Iŋuc ehame no ʒâŋe biŋe‐nanere erâ ʒârâ hâriŋ faio juocte qazucnepemu.”
17Eme Anania e rarâ fic mukicne ira ferâ Saulore qizecko meticne râehuc muwec, “Saulo qomâ‐nane, Wofuŋ Jesu hatao fua‐garewec, eki hâcne sorecnume warekopac, go ʒâŋe fifi ehuc Tiri Mârohec ecmurâ mukac.”
18Iŋuc muhuc âzâcneme izia ʒâŋenaonec wiac gagara tinac wahame ʒâŋe fifi erâ faharerâ mume Miti Opâ ruacnewec.
19Ehame nânâ nârâ sanaŋkewec. Saulo e Jesure kikefuŋ Damasko haeo jumbiŋ jaŋehec piticne jurâ
20izia biac Judaŋic jaŋere mitificko ferâ Jesure biŋe muropiehuc kecʒiŋuc jazawec: “Jesu e Anuture Ŋokâ.”
21Iŋuc jazame manarâ quŋkecnehuc ʒiŋuc mumbiŋ: “Jerusalem haeo ʒâŋe i hâcne riwaseckepie ima bacjopaku ʒira iŋuc jaha repac‐joparâ taha bapa micne jaŋerao bacjopa raocte warewec, izi weniŋuc erâ hec hetikic ekac?”
22Eme Saulo e samandiŋkerâ, Jesu e Kristo jâmbâŋ, irec dâŋfuŋne muritu‐hâmohuc Damasko haeo Judaŋic jumbiŋ jazame manapie guguru ewec.
23Iŋuc eku Judaŋic jaŋe Saulo qaniŋte mumockembiŋ.
24Mumockepie Saulozi biŋe manarâ juhame jaŋe qaniŋte haesac motâcko ŋafe furec soŋsoŋ domambiŋ.
25Iŋuc epie Jesure qâjâpecfâc jaŋe ŋafeo sasacko ŋiherâ sacrâpeo âke suepie hurâ wisewec.
26Eme raku Jerusalem haeo fisirâ Jesure kikefuŋ jaŋerao ʒuhuckeocte mume araŋ bacnembiŋ. Ehuc e Jesure motec ewec i manapie jâmbomac mi ewec.
27Eme Banabazi âgo ecnehuc aposolo jaŋerao jowa rarâ, Wofuŋzi Saulo hatao fuacnerâ dâŋ âzâcneme Damasko haeo Jesure biŋe mutaniŋkewec, irec dâŋ binaŋ ejarewec.
28Eme jaŋehec Jerusalem haeo ŋeŋe juju ewec.
29Ehuc Wofuŋte ʒâŋeo âtesiŋnehuc ŋic miti acmeruŋ tâmiric jazawec. Eme Judaŋiczi Grikdâŋ mumu jaŋehec wâc mitire muc manac ehuc dâŋ bâbârisiec embiŋ. Eme ŋic i jaŋe hâcne qazo mupie
30âgofâcne jaŋe manarâ Kaisarea haeo jowa hurâ râepie raku Taso haeo fisiwec.
31Eme opâ ruac kikefuŋ Judaia â Galilaia â Samaria mâreŋko jurambiŋ jaŋerao wama fuawec. Wamao juhuc heheʒakiec erâ qaboc‐jeŋic qapie hume Wofuŋte maio rumehuc jumbiŋ. Ehuc Tiri Mârozi neŋgoc ŋesiŋ ŋejarehame miti soka ŋedâmârec eme guru‐jeŋic ɋâriŋ qawec.
32Petoro e hata juku Jesure fuŋfuŋfâc Lida haeo jumbiŋ jaŋerao wâc fisiwec.
33Erâ ira ŋic moc honewec, ʒâŋene Ainea, e puriŋ erâ fohuc juha jara 8 ewec.
34Eme Petorozi ʒiŋuc âzâcnewec: “Ainea, Jesu Kristozi ɋiɋicne bacgukacte faharerâ fofoge gahac bâpiaŋkec.” Mume izia faharewec.
35Iŋuc eme Lida â Saroŋ heaoneczi honerâ maŋjeŋic bârisierâ Wofuŋte kikefuŋ embiŋ.
36Jope haeo opâ ruac naru ŋokac moc juwec, ʒâŋene Tabita, Kâtedâŋko Sâec. E gâcne ehâmo‐jarehuc bâmec bocjaha bajarehuc juwec.
37Eme Petoro mâreŋ ira juhame Tabita e huc fuacneme hâmowec. Hâmome qâŋɋâŋ‐ticne ʒurerâ ficmaŋne mocko baferâ râembiŋ.
38Lida i Jope hae bembeŋko ŋewecte opâ ruac jaŋe Petorore biŋe manarâ ŋic jajahec erao sorec‐jofapie rarâ ʒiŋuc âzâcnepic: “Go jowacgupere nâŋere haeo biac ranaŋ.”
39Eme Petoro e manarâ ʒawieme jahehec rambiŋ. Ra fisime qâŋɋâŋ fowecko jowa fembiŋ. Feme ŋokac hozec sasawa jaŋe e orâŋkerâ ki busâqoc ehuc Tabita ɋâricne juhuc ŋaqi ɋâtâ‐jarewec i jâutu‐fârembiŋ.
40Eme Petorozi ejareme hufârepie dieŋzi herâ numuwec. Numu tararâ qâŋɋâŋ maickeme ʒiŋuc âzâcnewec: “Tabita go faharec.” Mume ʒâŋe fitâcnehuc Petoro honerâ fahare ŋewec.
41Ŋehame Petorozi menao rohuc âzâcneme fahare domawec. Eme opâ ruac â hozec wira‐jareme fepie Tabita ɋâricne bârisie‐jarewec.
42Eme irec biŋe Jope haeo haŋ bame bocjahazi Wofuŋtao qohotambiŋ.
Aposolo Jaŋere Binaŋ 9
Aposolo Jaŋere Binaŋ 9:13-42