Aposolo Jaŋere Binaŋ 2:2-25

²Ŋehapie sambâŋkonec fânâŋ moc mâŋâŋ hâhâwicne ere fânâŋ tinac ɋeŋfâfâc jaha fânâŋke wahawec. Waharâ fic ŋembiŋ ira raʒirâ fusucmawec.

³Ehame jaŋerao wiac moc hawarine ʒocnameŋ tinac fuarâ domahuc ŋeratierâ ŋic ŋokac qizec‐jeŋic sâc biricke rawec.

⁴Eme Tiri Mârozi maŋjeŋicko hurâ fusucmame dâŋmarac fuŋne fuŋne dâŋembiŋ, Mârozi ru sâc bâfua‐jareme dâŋe rambiŋ.

⁵Eme dameŋ ira Jerusalem haeo mâreŋ sâc irecnec Judaŋic mitine jumbiŋ.

⁶Eme jaŋe fânâŋ sâko i manarâ mâretec fisirâ tumaŋnehuc bipic tatara embiŋ. Ehuc aposolo jaŋe dâŋjeŋic sâc dâŋepie

⁷manarâ maŋjeŋic goroŋkeme wareckerâ mumbiŋ, “Ŋic dâŋeŋgopieŋ ʒi jaŋe Galilaia ŋic sasawa,

⁸jaŋe weniŋuc erâ dâŋnâŋec sâc dâŋepie manapene dâŋrune marac efârekac?

⁹Nâŋâc ʒi Pataŋic â Medeŋic â Elamŋic, erâ Mesopotamia mâreŋkonec â Judaia mâreŋkonec â Kapadokia mâreŋkonec â Ponto mâreŋkonec â Asia mâreŋkonec

¹⁰â Frigia mâreŋkonec â Pamfilia mâreŋkonec â Aigita mâreŋkonec â Africa mâreŋkonec Kirene hae rârec rârec irecnec, nâŋâc Romaŋic

¹¹â Judaŋic mafa â hae fâri erâ Kretaŋic â Arabia ŋic. Nâŋâc iŋuczi juhuc dâŋnâŋec sâc Anutu mâsi sâko‐ticnere biŋedâŋ mupie manaŋgopeneŋ.”

¹²Ŋic jaŋe iŋuc murâ maŋjeŋic goroŋkeme kâuc barâ nazaŋ gazaŋ erâ mumbiŋ, “I wemo mâsi mo?”

¹³Gâcnezi ine aposolo mufec muriŋ ejarehuc mumbiŋ, “Jaŋe waiŋ opâ gapecmâc nâmbieŋte maŋjeŋic bibiriwakac.”

¹⁴Eme Petoro e âgofâcne 11 jaŋehec domahuc dâŋ hahaŋne barâ ʒiŋuc jazawec: “Judaŋic â Jerusalem haeo juŋgopieŋ sasawa, no dâŋ ŋazape hazec‐ŋeŋic râerâ mananiŋ.

¹⁵Ŋoŋe ŋic kecʒi jaŋere muŋgopieŋ ‘Waiŋ opâ nâku maŋjeŋic bibiriwakac.’ Iŋuc aricne. Hae miŋecne furekacte wemocko waiŋ opâ nanʒapeŋ.

¹⁶Porofete Joelezi findaŋdâŋ kecʒiŋuc qâreŋkewec i sanaŋkekac hâcne:

¹⁷‘Anutuzi mukac: Juku mâreŋ dameŋne bembeŋkeha, no Mâro‐nane ŋic ʒeŋgoma sâcke‐jarepemu; eme otâ ŋokâfâc‐ŋeŋic findaŋdâŋ muniŋmu, socɋârifâc‐ŋeŋic wiac ʒâŋe furu honeniŋmu, â ŋic ŋokac qizecfâc‐ŋeŋic guŋ fârine mananiŋmu.

¹⁸Erâ kiŋaŋ qaqa ŋic ŋokacfâc‐nane dameŋ ira Mâro‐nane sâcke‐jarepe findaŋdâŋ muniŋmu.

¹⁹Erâ mupe faic sambâŋko ʒâŋe furu wiac fuaocmu, â juwic mâreŋko fuŋne qaqa mâsi fuaocmu, soc â ʒoc â hosâc rombâŋ.

²⁰Ʒoaŋ ʒâŋene hâpoocmu, â mosa ʒâŋene socsoc eocmu, ehame Wofuŋte dameŋ maickeocmu, dameŋ biaŋ sâko hâcne.

²¹Eme ira Wofuŋte ʒâŋe riwaseckeniŋmu, jaŋe sisipirickonec batarac‐jopazo.’

²²“Israe ŋicbureŋ no ŋazape mananiŋ: Jesu Nazarete haeonec e Anutuzi neŋgoc ŋesiŋ ŋecnehame ŋondeŋ‐ŋeŋicko tâpiri sâko‐ticnezi mâsi â wiac ʒâŋe furu bahuc, Anuturaonec wahawec, irec fuŋne‐ticne bataniŋkeme honembiŋ.

²³E hâcne Anutuzi mârâc jaha maname fowecte hata mutaracnewec irec sâcko ŋoŋe wiac ecnehuc doc barâ ŋic qâpuc jaŋerao râepie maripoŋko qapie hâmowec.

²⁴E hâcne hâmoczi gozi kime Anutuzi gozi bacneme ɋârerâ faharewec. Hâmoczi e wemocko sakarezac.

²⁵Dawidizi ere hâcne kecʒiŋuc muwec: ‘No Wofuŋ hone dendeŋnehuc mi beheekopac, e fâre‐naneo domahame biric boroc mi epemu.