Aposolo Jaŋere Binaŋ 27:16-44

¹⁶Eku nuc piticne moc ʒâŋene Kauda, irec ŋifecnao rahapene woke gombazi hâwecko huzo eme

¹⁷gie sâko baku fârepene woke faio fewec. Erâ woke fâuckezacte repazi rowaŋauckehuc bândeŋnembeŋ. Eme haroŋaŋ moc ʒâŋene Siriti, ira fenʒipeŋte rac fârepie wahame mâŋâŋzi qâsoriec‐nâpome rambeŋ.

¹⁸Eme mâŋâŋ tâpirinehec qahuc fowecte hae fureme mafa gâcne hâwecko behepie huwec.

¹⁹Eme hae mocwâc fureme wokere wâcwiac gâcne iŋuc jaha ropie huwec.

²⁰Ŋafe ʒoaŋ gâcnao mâŋâŋ hâhâwicnehec qahuc domahame ʒoaŋ me bâpiŋ moc mi fuame honerâ maŋ mamanasu‐nâŋec ʒickeme ʒi ine mi junaŋmu mumbeŋ.

²¹Eme ŋic jaŋe nânâ qikiŋne‐fârerâ juhapie Paulozi ra ŋondeŋ‐jeŋicko domahuc ʒiŋuc jazawec: “Ŋicbureŋ, ŋoŋe dâŋnane manapie muzac, ine Kreta nucko junʒapeŋ. Eme wiac hâhâwicne â mafa sisipiric ine mi fua‐nârezac.

²²Ʒi ine sifu hâhâwic qamaseniŋ, ŋiczi mi sipirickenaŋmu, wokezi ine jâmbomac sipirickeocmu.

²³Jacne ŋafeo runane Anutu eki kiŋaŋ qaqa‐ticne norao aŋelo moc soreme fua‐narerâ

²⁴ʒiŋuc nazajec: ‘Paulo go mi hâwicguoc, go Roma ŋicwofuŋtao fisi‐jâmbâŋkecmu, erâ manakic, Anutuzi go ŋezicguhuc ŋic gohec wokeo juŋgopieŋ jaŋe mâmâc gore erâ ŋezic‐jopa‐fâreocmu.’

²⁵Irec, âgofâc‐nane, ŋoŋe buŋeŋic biaŋkezejec. No Anuture maŋjahec mi ekopac, dâŋ nazajec i sanaŋkeocmu.

²⁶Wokezi ine nuc mocko ferâ henʒaŋneocmu.”

²⁷Eme Adria hâwecko qac qâsoric ehuc juhapene ŋafe ʒoaŋ 14 eme wokeŋic jaŋe manapie mâreŋ bâqiŋkeŋgopeneŋ tinac ewec.

²⁸Iŋuc manahuc sâc behepie hume 30 meta ewec. Erâ ipec rarâ sâc mocwâc râepie hume 22 meta sawa ewec.

²⁹Eme haroŋaŋko fenʒipeŋ muhuc hâwic‐jopame woke ʒâhecnao aŋga 4 behepie hume hae fureocte hejâpehuc ŋembiŋ.

³⁰Ŋeku wokeŋic jaŋe woke beherâ wiseniŋte manasuhuc woke gomba râepie hume burec ehuc kecʒiŋuc mumbiŋ: “Nâŋe woke masunao aŋga moc behepene huocmu.”

³¹Iŋuc epie Paulozi momori soŋaŋ â ŋicfâc‐ticne ʒiŋuc jazawec: “Wokeŋic jaŋe wisepie ŋoŋe hâwecko hufâreniŋmu.”

³²Jazame momori jaŋe woke gombare niŋgiŋ hetâcnepie gomba hâwecko hume behembiŋ.

³³Eme hae fureocte woŋec juhuc Paulozi ŋic mâmâc sasawa ʒiŋuc jazawec: “Ŋoŋe maŋ sahac‐ŋeŋic soka fâkic eme nânâ mi nâhuc mâc juhapie miŋecgac ʒoaŋ 14 ekac.

³⁴Irec ʒi nânâ nâniŋte ŋazape mi qataraniŋ. Nânâ nâqiŋnerâ sâcne tiŋko ferâ juniŋmu. Qizec susuc‐ŋeŋic moc mi waharâ sifuckeocmu.”

³⁵Iŋuc murâ hone‐fârehapie poroŋ moc rorâ Anutu dâŋge âzâcnehuc bazurâ nâwec.

³⁶Nâme honerâ maŋjeŋic firieme iŋuc jaha nâfârembiŋ.

³⁷Ŋic wokeo jumbeŋ ʒare‐nâŋec 276.

³⁸Nânâ nâ gapec erâ wokemaŋkonec padi hâwecko behepie hume woke afeckerâ wefuwec.

³⁹Hae fure‐fâreme mâreŋ ʒâŋitaniŋte hone‐bipiembiŋ. Ehuc hâwec kenʒuŋne moc haroŋaŋ tâmiric honerâ wokezi ira raʒirâ moŋgeŋko feocte

⁴⁰ŋic jaŋe aŋga niŋgiŋne hetâcnepie hâwecko hume rac fârepie feme guriŋ goroŋkerâ moŋgeŋkopec ma bahuc rambiŋ.

⁴¹Guriŋ bâipiehapie woke mâreŋ masunao fewec. Ehuc woke masune kindeŋnerâ sanaŋkehame hâwec siri sâkozi woke ʒâhecne qanʒaŋnewec.

⁴²Woke ʒaŋkeme kâpâcwâru ŋic jaŋe fifia bahuc wisenʒipiŋte momori jaŋe qâhâmoc‐jopazo mumbiŋ.

⁴³Soŋaŋ‐jeŋiczi ine Paulore erâ qatara‐jarewec. Erâ mume fifia bapa jaŋe qanaŋ hâwecko rucnerâ fifia bahuc tiŋko fembiŋ,

⁴⁴â gâcne jaŋe palaŋ faio â wokere dâkâ faio ferâ rambiŋ. Iŋuczi iŋuc ehuc furu jaha tiŋko fefârembiŋ.