15irec micne bapa ŋoŋe momori soŋaŋ sâkorao dâŋ ʒiŋuc râepie razejec: ‘Go Paulo nâŋere tutumaŋko soretec wareme dâŋticne mocwâc muhâmonʒepeneŋ.’ Eme dâŋŋeŋic manarâ iŋuc eme nâŋe Paulo hatao qanaŋmu.”
16Eme Paulo baŋec‐ticnezi ʒikadâŋ i manawec. Manarâ momori ficko rarâ wawa‐ticne âzâcnewec.
17Âzâcneme Paulozi momori jaŋere micne moc wiracnerâ ʒiŋuc âzâcnewec: “Go motec ʒi momori soŋaŋ sâkorao jowa ratec dâŋ moc âzâcneoc.”
18Mume ŋic eki motec soŋaŋ sâkorao jowa rarâ ʒiŋuc âzâcnewec: “Kâpâcwâru ŋic Paulo eki wira‐narerâ nazame motec ʒi dâŋ gazaocte jowape warekoperec.”
19Iŋuc muhuc âzâcneme soŋaŋ sâkozi motec menao rorâ herâricnao bararâ wiocnerâ muwec, “Dâŋ weniŋuc nazacmu?”
20Eme moteczi ʒiŋuc âzâcnewec: “Judaŋic jaŋe gorao dâŋ râepie wareocte muc manac embieŋ, jaŋe go Paulo tutumaŋ‐jeŋicko jowa rarâ fuŋne‐ticne bataniŋke‐hâmocmurâ gazaniŋmu.
21Gazapie dâŋjeŋic mi manazemec. Ŋic ʒare‐jeŋic 40 jâurukac, iŋuczi Paulo qâhâmoniŋte muŋgopieŋ. Jaŋe nânâ sowa jujâmbâŋkeku Paulo qarâ wiac nâniŋte mumundeŋ embieŋ, erâ biac ʒawierâ gore dâŋte woŋec juŋgopieŋ.”
22Motec e dâŋ iŋuc mume soŋaŋ sâkozi ʒiŋuc muhuc sorewec: “Go dâŋ mufuarâ nazakomec i ŋic moc mi jazazemec.”
23Eme soŋaŋ sâkozi momori jaŋere micne jajahec hefârec‐jofarâ ʒiŋuc jasawec: “Ŋohe mupire momori kikezi hata rara 200 â becâsicko rara 70 â damu bapa 200 izi ʒawierâ ŋafere 9 kilok ehame Kaisarea haeo ranʒepieŋ.
24Erâ Paulore becâsic moc sate hecnenʒepieŋ. Eme aimuŋ soŋaŋkehuc kia Feliki erao baranʒepieŋ.”
25Iŋuc murâ kiare papia moc ʒiŋuc muhuc qâreŋkewec:
26“Klaudio Lisia noni kia biaŋ‐nane Feliki gore papia ʒi qâreŋkekopac.
27Momori jaŋe ŋic moc bafâŋgopieŋ e Judaŋic jaŋe qazo embiŋ. Eme noni e Romaŋic jâmbâŋ ere iŋuc manahuc momori jaŋehec rarâ mejeŋickonec batarambeŋ.
28Eme dâŋko râembiŋ irec fuŋne manapemurâ micne bapa tutumaŋ‐jeŋicko barapo.
29Bararâ sâcmutâc dâŋjeŋicte qorickepie ʒiŋuc manapo: Wiac ewec izi ferâ ʒika kâpâcwâru bâbâfuane mi ekac.
30Eme ŋic gâcne jaŋe somâ barâ Paulo qaniŋte mupie manarâ gorao sorepe fakac hâcne. Â qorickeeŋgopieŋ ŋic i jaŋe iŋuc jaha ejarepe gorao fârâ dâŋticne gazanʒepieŋ.”
31Eme momori jaŋe soŋaŋ‐jeŋicte mic reŋkehuc Paulo ŋafeoa jowa raku Antipatri haeo fisimbiŋ.
32Hae fureme momori gâcne jaŋe ficjeŋicko risiehapie becâsicko ŋeŋe jaŋe buc Paulo jowa raku Kaisarea haeo fisimbiŋ.
Aposolo Jaŋere Binaŋ 23
Aposolo Jaŋere Binaŋ 23:15-32