Aposolo Jaŋere Binaŋ 23:14-22

¹⁴Ŋic jaŋe hâcne taha bapa micne â soŋaŋ jaŋerao rarâ mufua‐jarerâ ʒiŋuc jazambiŋ: “Nâŋe nânâ sowa jujâmbâŋkeku Paulo qarâ wiac nanaŋte mumundeŋ embeneŋ;

¹⁵irec micne bapa ŋoŋe momori soŋaŋ sâkorao dâŋ ʒiŋuc râepie razejec: ‘Go Paulo nâŋere tutumaŋko soretec wareme dâŋticne mocwâc muhâmonʒepeneŋ.’ Eme dâŋŋeŋic manarâ iŋuc eme nâŋe Paulo hatao qanaŋmu.”

¹⁶Eme Paulo baŋec‐ticnezi ʒikadâŋ i manawec. Manarâ momori ficko rarâ wawa‐ticne âzâcnewec.

¹⁷Âzâcneme Paulozi momori jaŋere micne moc wiracnerâ ʒiŋuc âzâcnewec: “Go motec ʒi momori soŋaŋ sâkorao jowa ratec dâŋ moc âzâcneoc.”

¹⁸Mume ŋic eki motec soŋaŋ sâkorao jowa rarâ ʒiŋuc âzâcnewec: “Kâpâcwâru ŋic Paulo eki wira‐narerâ nazame motec ʒi dâŋ gazaocte jowape warekoperec.”

¹⁹Iŋuc muhuc âzâcneme soŋaŋ sâkozi motec menao rorâ herâricnao bararâ wiocnerâ muwec, “Dâŋ weniŋuc nazacmu?”

²⁰Eme moteczi ʒiŋuc âzâcnewec: “Judaŋic jaŋe gorao dâŋ râepie wareocte muc manac embieŋ, jaŋe go Paulo tutumaŋ‐jeŋicko jowa rarâ fuŋne‐ticne bataniŋke‐hâmocmurâ gazaniŋmu.

²¹Gazapie dâŋjeŋic mi manazemec. Ŋic ʒare‐jeŋic 40 jâurukac, iŋuczi Paulo qâhâmoniŋte muŋgopieŋ. Jaŋe nânâ sowa jujâmbâŋkeku Paulo qarâ wiac nâniŋte mumundeŋ embieŋ, erâ biac ʒawierâ gore dâŋte woŋec juŋgopieŋ.”

²²Motec e dâŋ iŋuc mume soŋaŋ sâkozi ʒiŋuc muhuc sorewec: “Go dâŋ mufuarâ nazakomec i ŋic moc mi jazazemec.”