Aposolo Jaŋere Binaŋ 20:10-35

¹⁰Eme Paulozi hurâ motec fofackerâ hâporâ ŋic ʒiŋuc jazawec: “Ŋoŋe ki ojowa mi eniŋ, e mâro‐ticne fuakac.”

¹¹Iŋuc murâ ficmaŋko ferâ Ŋafe Tiwâ gumec‐joparâ nânâ piticne nâwec. Nânâ nârâ jaŋehec mitire muc manac ehuc juhapie hae furewec. Hae fureme behec‐joparâ rawec.

¹²Ŋic jaŋe ine motec ɋâreme ficticnao jowa rarâ bujeŋic boc urue biaŋ ewec.

¹³Gâcne nâŋe Paulozi mume wokeo ferâ Aso haeo rambeŋ. E jahacne ine tiŋko fâwec.

¹⁴Eme Aso haeo fârâ bâfuac‐nâporâ wokeo hefârâ qâsuec‐nâpome mâmâc rambeŋ. Raku Mitilene haeo raʒimbeŋ.

¹⁵Irecnec raku hae fureme Ʒintacko Kio nucko fisirâ jâurumbeŋ. Izi raku Mituoc Samo nucko fisimbeŋ. Eme irecnec raku Sekiqanâcko Milete haeo fisimbeŋ.

¹⁶Paulo e Mâro hombaŋko Jerusalem haeo ra fisiocte muwec. Irec Efeso haeo wokeonec waharâ Asia masunao juhame dameŋ qâtirizacte fofotâc raku Milete haeo fisiwec.

¹⁷Ira fisirâ kiŋaŋ sorec‐jopame Efeso haeo rarâ mitire micne bapa jowac‐jopapie warembiŋ.

¹⁸Fisipie Paulozi dâŋ ʒiŋuc jazawec: “No Asia mâreŋko fisirâ izia ŋoŋerao gie‐nane fuŋkerâ wiac ehuc jupo, i fuŋnaonecteaŋ mana wareeŋgopieŋ.

¹⁹No hone suŋgiŋnezi ki busâqochec Wofuŋte kiŋaŋ qahuc jupo, ehuc Judaŋic jaŋe keke suec suec enarehapie râsi faio jupo.

²⁰Erâ dâŋ ŋoŋe ŋaŋazane moc mi bâtiripe fowec, ŋoŋe biaŋkeniŋte mitidâŋ bocjaha hofao â ficne ficne ŋaza qazuc ehuc jupo.

²¹Ehuc Judaŋic â Grikŋic Anutu maickerâ Wofuŋ‐nâŋec Jesu Kristo manasiŋkeniŋte maŋqaqa eŋarehuc jupo.

²²Eme ʒi Mârozi maŋnane niŋgiŋko fâreme Jerusalem haeo rakopac. Erâ ocna ra fisipe wiac weniŋucne moc fua‐nareocmu i mi mana‐hâmokopac.

²³Mâc kâpâcwâru â buʒâic ocna woŋec‐nane fokac, i hae sâc fisi fisi jupe Tiri Mârozi mufua‐nareekac.

²⁴No ine juju‐nanere manape furi sâko mi ekac, mâc hata muʒâwe‐narekicne i buafec jaha âte tarapemurâ enarekac, â Anutu aki anonoc‐ticnere Biŋebiaŋ muiŋnepemurâ Wofuŋ Jesuzi munarewec, gie i baku bâjomirepemurâ maŋnane domakac.

²⁵Erâ ʒi moc mupe mananiŋ, no uucmaŋte biŋedâŋ ŋazahuc ŋondeŋ‐ŋeŋicko ŋeŋe juju epe honecnueŋgopieŋ izi ʒâhec ʒâŋe mai‐nane mocwâc mi honeniŋmu.

²⁶No Anutuzi mitire dâŋ ʒaeckewec i furu jaha ŋaza‐fârepo, moc mi hetarape fowec;

²⁷irec miŋecgac hazec qâuŋ ŋazape mananiŋ, moc e sipirickeme kiŋticne norao mi foocmu.

²⁸“Ŋoŋe ŋaŋac soŋaŋ babac ehuc lama gurufâc‐ŋeŋic iŋuc jaha sâcne soŋaŋ‐jopanʒepieŋ. Tiri Mârozi jaŋere micne bapa mucŋopawecte ŋoŋe Wofuŋte kikefuŋfâc, e jahacne soczi kitâc‐jopawec, jaŋe hone maiŋ ejarehapie aimuŋ junʒepieŋ.

²⁹No manakopac, no behec‐ŋopape kâte qâto mimicne ŋoŋerao fisirâ lama mi akic‐jopaniŋmu,

³⁰erâ wâc ŋaŋacne ŋondeŋko ŋic fuarâ miti bâsifuckerâ opâ ruaczi jaŋacne eniŋte hume gegetâc ejareniŋmu.

³¹Irec ŋoŋe rucgereŋ‐ŋeŋic junʒepieŋ, erâ jara jahec â moc ŋafe furec ki busâqochec uŋsawaŋ buc buc ŋaŋaza i moc mi behepe wahawec, ŋoŋe irec manasuhuc junʒepieŋ.

³²Eme ʒi Anuturao râec‐ŋopahuc uruc jauŋ dâŋticnao guruc‐ŋopakopac; e tâpiri runezi hofâ ɋâcgie sâcne eŋareocmu, erâ juku maŋfuru bacjopakicne sasawa jaŋehec sambâŋte huhure i tahac‐ŋopame rauckenʒepieŋ.

³³No moneŋ mafare mubâre mi eŋarepo,

³⁴no nahacne â ŋicfâc‐nane nâŋere wiac piticne mejahec‐nane ʒizi hotâckepe fua‐narewec, i manaŋgopieŋ.

³⁵No wiac fuŋne fuŋne qaŋeŋke‐ŋarepo, ehuc gie ɋicwânʒâŋ bahuc gegec dodocne jaŋe bâmec bajarezo irec hatane wâc âtehuc ŋowatupo. Eme ŋoŋe ijaha âtehuc Wofuŋ Jesuzi dâŋ kecʒiŋuc muwec i manasunʒepieŋ: ‘Bâmec ro nâc eere bubiaŋzi mâcne, bâmec babajare irec bubiaŋzi fârine jâmbâŋ eekac.’”