1Dâŋ ojowa sâko arictac eme Paulozi opâ ruac hefârec‐joparâ jaza mâzoc erâ Makedonia mâreŋko rawec.
2Mâreŋ i fotâcnehuc opâ ruac jurambiŋ jaŋe mu keteŋ bocjaha ejare rawec. Raku Grik mâreŋko fisiwec.
3Ira mosa jahec â moc juku hâwecko hurâ wokeo ferâ Siria mâreŋko razo mume Judaŋic jaŋe somâ râecnepie manarâ Makedonia mâreŋko rawec.
4Eme ŋic ʒiŋuczi hatao bâjâpembiŋ: Berea haeonec Sopate, e Pirore ŋokâ, Tesalonike haeonec Aristako â Sekundo, Derebenec Gaio, erâ Timoteo, â Asia masunaonec Tikiko â Trofimo.
5Ŋic izi bânierâ Troa haeo woŋec‐nâŋec jumbiŋ.
6Nâŋe ine goreŋ sowa hombaŋ tarame Filipi haeo wokeo ferâ ʒoaŋ 5 raku Troa haeo fisimbeŋ. Ira fisirâ ʒoaŋ gie bapa 7 jumbeŋ.
7Eme nâŋe Sondao Ŋafe Tiwâ nanaŋte tumaŋnembeŋ. Ehuc Paulo e hae fureme raocte murâ miti muhuc juhame ŋafe ʒâŋiŋke‐jâmbâŋkewec.
8Fic maŋne ŋembeŋ ira lambe bocjaha ʒawec.
9Ehame motec moc ʒâŋene Eutiko, e Paulozi miti mume ʒorame qâqâtâc kataŋko ŋeku guŋ qâmâckewec. Erâ guŋko qâqâtâc kataŋkonec hurâ mâreŋko qarâ fohame bafaharepie hâmocne ewec. Fic maŋne jahec â moc hâŋ bafehuc âke tâcne fekicne irecnec hâcne hurâ qawec.
10Eme Paulozi hurâ motec fofackerâ hâporâ ŋic ʒiŋuc jazawec: “Ŋoŋe ki ojowa mi eniŋ, e mâro‐ticne fuakac.”
11Iŋuc murâ ficmaŋko ferâ Ŋafe Tiwâ gumec‐joparâ nânâ piticne nâwec. Nânâ nârâ jaŋehec mitire muc manac ehuc juhapie hae furewec. Hae fureme behec‐joparâ rawec.
12Ŋic jaŋe ine motec ɋâreme ficticnao jowa rarâ bujeŋic boc urue biaŋ ewec.
13Gâcne nâŋe Paulozi mume wokeo ferâ Aso haeo rambeŋ. E jahacne ine tiŋko fâwec.
Aposolo Jaŋere Binaŋ 20
Aposolo Jaŋere Binaŋ 20:1-13