Aposolo Jaŋere Binaŋ 1:10-25

¹⁰Eme sambâŋko fehame firâ râqârehuc domahapie ŋic jajahec ŋaqi qaŋqaŋhec mi jaŋerao fuarâ domazepirec i!

¹¹Erâ ʒiŋuc jazapic: “Galilaia mâreŋkonec ŋicbureŋ, ŋoŋe wemocte sambâŋko fihuc jaha domaŋgopieŋ? Jesu ŋoŋe honehapie behec‐ŋoparâ sambâŋko fekac, eki hâcne juku iŋuc jaha wahazokac.”

¹²Eme aposolo jaŋe Oliwa tikionec risie waharâ raʒimicnao Jerusalem hae ŋewec ira raʒimbiŋ. Sawane i sabata hombaŋko hata rarane irec sâc.

¹³Raʒirâ haeo ferâ ŋeŋe juju ehuc jumbiŋ fic ira fembiŋ. Jumbiŋ ine ʒiŋuc: Petoro â Johane, Jakobo â Anderea, Filipo â Toma, Batolomaio â Mataio, Jakobo Alifaiore ŋokâ, Simoŋ Ʒelote, erâ Juda Jakobore ŋokâ.

¹⁴Ŋic i jaŋe hâcne maŋ mocjaha erâ nunumu gie ʒuʒuhuc jaha bahuc jumbiŋ. Iŋuc ehapie Jesure neŋgoc Maria â ŋokac gâcne â Jesu ɋafâc‐ticne jaŋe mâmâc bafic‐jopambiŋ.

¹⁵Dameŋ ira Jesure qâjâpecfâc ʒare‐jeŋic 120 qâririŋ iŋuczi tumaŋnerâ ŋehapie Petoro e ŋondeŋ‐jeŋicko faharerâ dâŋ ʒiŋuc jazawec:

¹⁶“Âgo bureŋ, Juda râsi jowac‐jopame Jesu rombiŋ ere dâŋ Tiri Mârozi Dawidi mic ba afec ecneme mu qâreŋ ewec i wemocko mâc fozac.

¹⁷Juda e nâŋâcnaonec hâcne, â miti gie i e mâmâc mucnekicne.

¹⁸Eme ŋic eki ʒika furizi mâreŋ kitâcnecnewec ira ra qizeczi qârisic hurâ bune qâfâuckeme hone waha‐fârewec.

¹⁹Eme biŋe i Jerusalem haeoneczi mana‐fârerâ mâreŋ irec ʒâŋe Akedama mumbiŋ, nâŋâcne dâŋko Ʒikamâreŋ.

²⁰Miti mânecko ʒiŋuc hâcne qâreŋkekicne fokac: ‘Hae‐ticne tuhu fuazejec, â ficticnao ŋic moc mi juzejec.’ Erâ moc ʒiŋuc: ‘Mafa‐ticne i furunezi rauckezejec.’

²¹Eme Jesu ŋondeŋ‐nâŋecko jume ju ecnepene ŋic gâcnezi qâsuec‐nâpombiŋ,

²²ehuc Johanezi Jesu Miti Opâ ruacneme gie‐ticne fuŋkewec dameŋ ira erao ʒuhuckerâ bâjâpehuc juhapene sambâŋko fewec, ŋic iŋucne moczi fuarâ bafic‐nâpome, Jesu hâmockonec faharewec irec biŋe mupene haŋ bazejec.”

²³Petorozi iŋuc jazame ŋic jajahec bâfuac‐jofambiŋ. Moc ʒâŋene Josefe, Basaba mucne jumbieŋ, ʒâŋene moc Jusito, erâ âgone Matia.

²⁴Bâfuac‐jofarâ ʒiŋuc muhuc numumbiŋ: “O Wofuŋ maŋ hohone, go ŋicjahec ʒi jaheraonec wenimoi bâwosâekomec i nâwotutec mucnepene

²⁵Juda miti â aposolo gie‐ticne hetararâ e jahacne hatao rawec ere jujutacko juzejec.”