6Opâ ruapie Paulozi qizec‐jeŋicko meticne râeme Tiri Mâro jaŋerao wahame miti marac furuo muhuc findaŋdâŋ mumbiŋ.
7Ŋic iŋuc embiŋ ʒare‐jeŋic 12 qâririŋ.
8Eme Paulo e Judaŋic jaŋere mitificko gâbâ fehuc miti memeŋgaru tâmiric mosa jahec â moc jazahuc juwec, erâ Anuture uucmaŋte jaŋehec mu bâtikic ehuc mu baafec ejarewec.
9Eme ŋic gâcne jaŋe maŋsanaŋ erâ Jesure miti râpeckehuc ŋic tutumaŋko musoriŋkepie Paulozi behec‐jopawec. Erâ mitire ejarewec jaŋe qâzuc‐joparâ ʒoaŋne ʒoaŋne ŋic moc ʒâŋene Tirano ere mamana ficko miti jaza qazuc ehuc juwec.
10Jara jajahec iŋuc ehuc juhame rârec rârec Judaŋic â Grikŋic jurambiŋ jaŋe mâmâc sasawa Wofuŋte dâŋ mana‐fârembiŋ.
11Erâ Anutuzi Paulo neŋgoc ŋesiŋ ŋecnehame mâsi ʒâŋe furu‐jeŋic bocjaha bawec.
12Eme irec ŋic jaŋe Paulozi gie qoruc â kereŋ bapa qoruc rojuwec i rorâ huchec jaŋerao barapie bâuarâ ɋiɋic qambiŋ â demoŋ maŋjeŋickonec wisembiŋ.
13Ehame Judaŋic riuc bapa gâcne mâreŋ râreckehuc domambiŋ jaŋe penaroŋ erâ Wofuŋ Jesure ʒâŋezi riuc ripa‐jeŋic eocte manasuhuc ŋic demoŋhec ʒiŋuc jazambiŋ: “Jesu ʒâŋe biŋe‐ticne Paulozi muekac ere micte wisezemec.”
14Taha bapa sâko moc ʒâŋene Sikeua ere ŋokâfâc 7 jaŋe iŋuc hâcne embiŋ.
15Iŋuc ehuc mupie demoŋzi dâŋ ʒiŋuc bâtikie‐jarewec: “Jesu manakopac â Paulo wâc manakopac, â ŋoŋe ine wenirec?”
16Iŋuc mume ŋic demoŋheczi momori wânʒâŋ erâ motec sasawa jopa tuŋtuŋ ejarehuc ŋaqi‐jeŋic bâsuc qâsuckeme biuctac â soc rurua fahare fickonec waha wisembiŋ.
17Eme wiac irec biŋe Efeso haeo Judaŋic â Grikŋic mana‐fârerâ hâbi‐jeŋic goroŋkewec. Ehuc Wofuŋ Jesu muteŋ bâteŋ ecnembiŋ.
18Eme miti mamana bocjahazi fisirâ qâpucko wiac ejumbieŋ i buafec jaha mufua‐fârembiŋ.
19Â mârâc qaŋgecte gie bajumbieŋ jaŋe qaŋgec papia amecke‐fârerâ hofao ʒocko rikembiŋ. Eme papia irec furine qâhâckepie siliwa moneŋ 50 tauseŋ qâririŋ ewec.
20Ŋic jaŋe iŋuc epie Wofuŋte dâŋzi ɋiɋicne jaha fua tâcnerâ ŋedâ qâdâmârewec.
21Paulo e gie iŋuc baku bafârerâ Makedonia â Akaia mâreŋ fotâc‐jofârâ Jerusalem haeo raocte muwec. Ehuc ʒiŋuc muwec: “No Jerusalem haeo fisirâ mocwâc ware raku Roma haeo fisizepac.”
22Eme raocte babafic jahecticne Timoteo â Erasto sorec‐jofame Makedonia mâreŋko bânierâ rapic. E jahacne ine Asia mâreŋkoa mocwâc piticne ʒuhuckerâ juwec.
23Eme dameŋ ira Efeso haeo mitire erâ hâpo ojowa sâko fuawec.
24Siliwazi eri wiac bapa ŋic moc juwec, ʒâŋene Demetrio. Ŋic eki Atemis nemu ufuŋ‐ticnere hawari piic piic siliwazi bame feme ŋic jaŋe furine bapie e â gieŋic âgofâcne moneŋ bocjaha fua‐jare jujec.
25Eme Demetrio e gieŋic âgofâcne hetumaŋ‐joparâ ʒiŋuc jazawec: “Ŋicbureŋ, ŋoŋe gie‐nâŋec izi hâcne moneŋ mafa bâfua‐nâreekac i manaŋgopieŋ.
26Eme ŋic moc warewec jukac, Paulo hâcne, ŋoŋe ere fuŋne hone manac eeŋgopieŋ, e Efeso haeonec â Asia mâreŋ gâcnaonec ŋic wemo afecne maŋ bâsifuc ejarehuc ʒiŋuc jazaekac: ‘Ŋicmezi bakicne nemuɋâŋ i wiac fâri tâmiric.’
27E iŋuc eme gie‐nâŋec ʒâŋemâc eocmu sawa mâcne, nemu sâko‐nâŋec Atemis ere ufuŋ i qoroc heocmu, erâ Atemis e jahacne ʒâŋe biŋe wâc rârâŋneocmu. Eme Asia mâreŋkonec â mâreŋ gâcnaonec ŋic mâmâc sasawa araŋ bacneeŋgopieŋ iŋucnere ʒâŋe biŋe weniŋuc omaeocmu?”
28Demetriozi dâŋ iŋuc jazame manarâ maŋjeŋic aaric fusucmame owackehuc ʒiŋuc mumbiŋ: “Efeso haeonec Atemis e fekicne sâko!”
29Dâŋ oowac sâko epie haeŋic mâmâc sasawa maŋjeŋic iŋneme kike saoŋ qajareme fisi qâture‐fârerâ tutumaŋ toma‐jeŋicko rafârembiŋ, ehuc Makedonia ŋic jajahec Paulo bâjâpepic, ʒâŋe‐jekic Gaio â Aristako, jahe rocjofarâ fârec‐jofa rambiŋ.
30Eme Paulozi manarâ ŋic tutumaŋko razo mume opâ ruac jaŋe sakarembiŋ.
31Erâ wâc ŋic fekicne gâcne Paulore âgofâc jumbiŋ jaŋe ŋic tutumaŋko mi raocte mumuac dâŋ erao râepie rawec.
32Eme tutumaŋ tomao ira ŋic jaŋe dâŋ ojowa fetone fepie dâŋ sifuc gafuckewec, ehame gâcne sâkozi wemo wiacte eŋgopieŋ muhuc kâuc bambiŋ.
33Ŋic jaŋe iŋuc ehuc domahapie Judaŋic jaŋe âgo‐jeŋic moc, ʒâŋene Alesande, e ŋicguru ʒâʒâŋiŋko domahame mu âke suec ecnepie dâŋʒaeo ferâ dâŋ mu bâʒâziŋ eocte ŋic me bazuc ejarewec.
34Eme ŋic jaŋe e Judaŋic iŋuc hone tararâ micjeŋic sâc dameŋ ʒora owa ruruckehuc ʒiŋuc muhuc domambiŋ: “Efeso haeonec Atemis e fekicne sâko!”
35Ekuhapie qâreŋŋic eki dâŋjeŋic bâniniŋkeku bâmâteŋ‐joparâ ʒiŋuc jazawec: “Efeso ŋicbureŋ, hae ʒirec ŋiczi Atemis sâko‐nâŋecte ufuŋ â sambâŋkonec ɋâŋticne wahawec irec soŋaŋ rau jueŋgopeneŋ, i mâreŋ wenirecnec moczi kâuc baocmu?
Aposolo Jaŋere Binaŋ 19
Aposolo Jaŋere Binaŋ 19:6-35