Aposolo Jaŋere Binaŋ 19:32-38

³²Eme tutumaŋ tomao ira ŋic jaŋe dâŋ ojowa fetone fepie dâŋ sifuc gafuckewec, ehame gâcne sâkozi wemo wiacte eŋgopieŋ muhuc kâuc bambiŋ.

³³Ŋic jaŋe iŋuc ehuc domahapie Judaŋic jaŋe âgo‐jeŋic moc, ʒâŋene Alesande, e ŋicguru ʒâʒâŋiŋko domahame mu âke suec ecnepie dâŋʒaeo ferâ dâŋ mu bâʒâziŋ eocte ŋic me bazuc ejarewec.

³⁴Eme ŋic jaŋe e Judaŋic iŋuc hone tararâ micjeŋic sâc dameŋ ʒora owa ruruckehuc ʒiŋuc muhuc domambiŋ: “Efeso haeonec Atemis e fekicne sâko!”

³⁵Ekuhapie qâreŋŋic eki dâŋjeŋic bâniniŋkeku bâmâteŋ‐joparâ ʒiŋuc jazawec: “Efeso ŋicbureŋ, hae ʒirec ŋiczi Atemis sâko‐nâŋecte ufuŋ â sambâŋkonec ɋâŋticne wahawec irec soŋaŋ rau jueŋgopeneŋ, i mâreŋ wenirecnec moczi kâuc baocmu?

³⁶I aricne, irec ŋoŋe maŋŋeŋic fâre wahame wiac kosa mi enʒepieŋ.

³⁷Ŋic qoric‐jopaŋgopieŋ jaŋe nemu‐nâŋecte ufuŋkonec wiac moc ro soŋsoŋ me Atemis mu surec eecne i me embiŋ.

³⁸Me Demetrio â gieŋic âgofâcne jaŋe ŋic mocte manapie sâqorekacko dâŋbahac mumu ʒâfo maickeme kia juŋgopieŋ jaŋerao munʒepieŋ.