2wio‐jarehuc muwec, “Ŋoŋe miti manahuc Tiri Mârohec embiŋ me mâcne?” Eme jaŋe mumbiŋ, “Aricne, Tiri Mâro jukac biŋene moc mi manambeŋ.”
3Iŋuc mupie mocwâc wio‐jarewec, “Eme ŋoŋe more ʒâŋe biŋeo Miti Opâ ruambiŋ?” Mume ʒiŋuc âzâcnembiŋ: “Nâŋe Johanere Miti Opâ ruambeŋ.”
4Mupie Paulozi ʒiŋuc jazawec: “Johane eki ŋic jaŋe maŋjeŋic bârisieniŋte opâ rua‐jarehuc ʒiŋuc jazawec: ‘Râpefuŋ‐naneo warehuc jukac e manasiŋkenʒepieŋ.’ Dâŋ i Jesure muwec.”
5Ŋic jaŋe dâŋ i manarâ Wofuŋ Jesu ere ʒâŋeo ʒuhuckehuc Miti Opâ ruambiŋ.
6Opâ ruapie Paulozi qizec‐jeŋicko meticne râeme Tiri Mâro jaŋerao wahame miti marac furuo muhuc findaŋdâŋ mumbiŋ.
7Ŋic iŋuc embiŋ ʒare‐jeŋic 12 qâririŋ.
8Eme Paulo e Judaŋic jaŋere mitificko gâbâ fehuc miti memeŋgaru tâmiric mosa jahec â moc jazahuc juwec, erâ Anuture uucmaŋte jaŋehec mu bâtikic ehuc mu baafec ejarewec.
9Eme ŋic gâcne jaŋe maŋsanaŋ erâ Jesure miti râpeckehuc ŋic tutumaŋko musoriŋkepie Paulozi behec‐jopawec. Erâ mitire ejarewec jaŋe qâzuc‐joparâ ʒoaŋne ʒoaŋne ŋic moc ʒâŋene Tirano ere mamana ficko miti jaza qazuc ehuc juwec.
10Jara jajahec iŋuc ehuc juhame rârec rârec Judaŋic â Grikŋic jurambiŋ jaŋe mâmâc sasawa Wofuŋte dâŋ mana‐fârembiŋ.
11Erâ Anutuzi Paulo neŋgoc ŋesiŋ ŋecnehame mâsi ʒâŋe furu‐jeŋic bocjaha bawec.
12Eme irec ŋic jaŋe Paulozi gie qoruc â kereŋ bapa qoruc rojuwec i rorâ huchec jaŋerao barapie bâuarâ ɋiɋic qambiŋ â demoŋ maŋjeŋickonec wisembiŋ.
13Ehame Judaŋic riuc bapa gâcne mâreŋ râreckehuc domambiŋ jaŋe penaroŋ erâ Wofuŋ Jesure ʒâŋezi riuc ripa‐jeŋic eocte manasuhuc ŋic demoŋhec ʒiŋuc jazambiŋ: “Jesu ʒâŋe biŋe‐ticne Paulozi muekac ere micte wisezemec.”
14Taha bapa sâko moc ʒâŋene Sikeua ere ŋokâfâc 7 jaŋe iŋuc hâcne embiŋ.
15Iŋuc ehuc mupie demoŋzi dâŋ ʒiŋuc bâtikie‐jarewec: “Jesu manakopac â Paulo wâc manakopac, â ŋoŋe ine wenirec?”
16Iŋuc mume ŋic demoŋheczi momori wânʒâŋ erâ motec sasawa jopa tuŋtuŋ ejarehuc ŋaqi‐jeŋic bâsuc qâsuckeme biuctac â soc rurua fahare fickonec waha wisembiŋ.
17Eme wiac irec biŋe Efeso haeo Judaŋic â Grikŋic mana‐fârerâ hâbi‐jeŋic goroŋkewec. Ehuc Wofuŋ Jesu muteŋ bâteŋ ecnembiŋ.
18Eme miti mamana bocjahazi fisirâ qâpucko wiac ejumbieŋ i buafec jaha mufua‐fârembiŋ.
Aposolo Jaŋere Binaŋ 19
Aposolo Jaŋere Binaŋ 19:2-18