Aposolo Jaŋere Binaŋ 18:4-27

⁴Erâ Paulo e sabata hombaŋ sâc Judaŋic jaŋere mitificko ferâ Judaŋic â Grikŋic miti jazahuc mu bâŋgoroŋ ejarewec.

⁵Eme Sila â Timoteo jahe Makedonia mâreŋkonec warepire Paulozi miti gie paŋʒâic bawec, ehuc Jesu e Kristo jâmbâŋ irec fuŋne Judaŋic ritu ɋaɋacke‐jarewec.

⁶Iŋuc ejareme jaŋe dâŋticne bâsuehuc mu supaic ecnepie ŋaqi‐ticne itiriŋkeme gâc wândoc wahame ʒiŋuc jazawec: “Sipirickeniŋmu irec kiŋ nore mâcne, ŋaŋacne eocmu. Irec ʒi râpec‐ŋoparâ qâpuc jaŋerao sawa gie bapemu.”

⁷Iŋuc murâ ŋic moc ʒâŋene Titio Justo, e Grikŋiczi Judaŋic jaŋere qâjâpecne juwec, ere ficko ferâ ŋeŋe juju ewec. Ficticne Judaŋic jaŋere mitific heririŋ ŋewec.

⁸Eme mitificte soŋaŋ ʒâŋene Krispo e â wiacfâcne jaŋe miti manarâ Jesure kikefuŋ embiŋ. Eme Korinti ŋic jaŋeraonec wâc bocjahazi miti manambiŋ i mana ʒakierâ Miti Opâ ruambiŋ.

⁹Eme ŋafe mocko Wofuŋzi Paulo maŋko fuac ecnehuc ʒiŋuc âzâcnewec: “Go hâhâwic qamaserâ miti murâ mi behezemec, muhuc jaha juzemec.

¹⁰No sabecguhape ŋic jaŋe wiac kosa mi egareniŋmu. Hae ʒira nore ŋicfâc guru sâko juŋgopieŋ.”

¹¹Iŋuc muhuc âzâcneme Paulo e hae irec ŋic Anuture dâŋ jaza qazuc ehuc juhame mosa 18 wahawec.

¹²Eme Galioŋ e Akaia mâreŋko kia sâko erâ juhame Judaŋic jaŋe ʒâʒâfic erâ Paulo râsi ecnehuc kiarao barambiŋ.

¹³Bararâ ʒiŋuc muhuc qorickembiŋ: “Ŋic kecʒi e sâcmutâc dâŋnâŋec qâsuarâ hata furume moc âtehuc Anutu sâseniŋte ŋic qafeŋ‐jopaekac.”

¹⁴Eme Paulo e dâŋ ŋifecne muzo ehame Galioŋzi Judaŋic ʒiŋuc jazawec: “O Judaŋic, ŋic e kiŋbahac wiac ŋemâcne bâfuame muzac dâŋŋeŋic manazapo.

¹⁵Ŋoŋe ine ŋaŋacne mu qaqazuc dâŋ â ŋicʒâŋe wiac â sâcmutâc dâŋ irec dâŋgie râcneŋgopieŋte ŋaŋac mutaranʒepieŋ, i nore gie mâcne.”

¹⁶Iŋuc murâ jâpec‐jopame wahambiŋ.

¹⁷Eme jaŋe ʒeŋgoma mitificte soŋaŋ Sostene hâporâ kiare maio qa imac ecnembiŋ. Eme kiazi hone qâoma ejarewec.

¹⁸Paulo e Korinti haeo jufehuc juku opâ ruac mâzoc‐joparâ Siria mâreŋko raocte wokeo fewec. Erâ Prisila â Aqila jahe ehec mâmâc rambiŋ. Wokeo fezo ehuc Keŋkereai haeo qizec‐ticne rowec. I juwicnao Anuturao mumupaŋ‐ticne râerâ qizec mi roro mâc juhame mumupaŋ dameŋ‐ticne tarawecte iŋuc ewec.

¹⁹Eme irecnec wokeo raku Efeso haeo fisirâ râwiŋnembiŋ. Eme Paulozi Judaŋic jaŋere mitificko ferâ jaŋehec mitire mu bâtikic embiŋ.

²⁰Erâ jaŋehec juocte Judaŋic jaŋe sakarezo mupie qatara‐jarehuc ʒiŋuc jazawec:

²¹“No Anutuzi maname ŋoŋerao mocwâc risiepemu.” Iŋuc murâ jaŋehec mâmâzoc erâ Efeso haeo wokeo mocwâc ferâ raku

²²Kaisarea haeo fisiwec. Ira fisirâ feraku opâ ruac kikefuŋ jaŋehec âgo sahac hâroŋ eec embiŋ. Erâ Antiokia haeo risiewec.

²³Paulo e Antiokia haeo piticne jurâ miti kiŋaŋ mocwâc rawec. Ehuc Galatia â Frigia mâreŋ fotâc‐jofahuc Jesure kikefuŋ sasawa mu âkesiŋ ejare rawec.

²⁴Ehame Efeso haeo Judaŋic moc fisiwec, ʒâŋene Apolo. E Alesandria haeo fuawec, ŋic e mamana sâkohec, miti papia woseku mana tara‐fârewec.

²⁵Erâ Wofuŋte miti hata qazucnepie i mâmâc manawec. Miti Opâ i Johanere Miti Opâ sawa manaweczi sifu Jesure binaŋ ʒocmâsâc bâruŋhec ninic jaha ŋic jaza qazuc ewec.

²⁶E Judaŋic jaŋere mitificko fuŋkerâ miti acmeruŋ tâmiric munʒiriŋnehuc muwec. Ira miti mume Prisila â Aqila jahe manarâ âgo jauŋ ecnerâ Anuture miti gâcne âzâcne mutâc epic.

²⁷Eme Akaia mâreŋko razo mume mitiŋic jaŋe ocnirec opâ ruac jaŋere papia kecʒiŋuc qâreŋkembiŋ: “Ŋic e ŋoŋerao fâme âgo ecnenʒepieŋ.” Papia iŋuc qâreŋkerâ râcnepie rawec. Eme raku Korinti haeo fisirâ opâ ruac miti giere mâretec bafic‐jopawec.