27Erâ i maŋnâŋeczi basac qasac eraku Anutu e jahacne bâfuanaŋte manasuhuc iŋuc ewec. E ʒoricko mâcne, ŋondeŋ‐nâŋecko ŋic sâcnâporâ juekac.
28‘Nâŋâc ere jujumaŋko juhuc wiac ebac eeŋgopeneŋ.’ Ŋoŋere mamana ŋic gâcnezi wâc ʒiŋuc mumbiŋ: ‘Nâŋâc Anuturaonec fuakicne.’
29Eme ŋic jaŋe maŋjeŋicte erâ gol me siliwa me qânâzi ɋâŋ qâqâtâc ba eric eeŋgopieŋ, ine Anuturaonec fuakicne nâŋâc Anuture manapene irec sâc mi ezejec.
30Qâpuc juwefuhapie hone akic eŋare warehuc juwec, irec dameŋ tarawec. Ʒi ine mâreŋ sâc ŋic mâmâc sasawa maŋjeŋic bârisieniŋte mujarekac.
31E dameŋ bawec fokac, ira mâreŋne mâreŋne ŋic fuŋne‐nâŋec bataniŋkerâ okacne sâckoa nâreocmu. Erâ ŋic moc e gie i hâcne baocte âkendâŋnewec, erâ mâreŋŋic sasawa e manapaŋkenaŋte hâmockonec bâɋârewec jukac.”
32Paulo e hâmockonec fafahare irec dâŋ mume gâcnezi mu surec embiŋ, â gâcnezi mumbiŋ, “Dâŋ i dameŋ mocte wâc mutec mananʒepeneŋ.”
33Iŋuc epie Paulozi behec‐joparâ rawec.
Aposolo Jaŋere Binaŋ 17
Aposolo Jaŋere Binaŋ 17:27-33