Text copied!
CopyCompare
Kâte Bible - Aposolo Jaŋere Binaŋ - Aposolo Jaŋere Binaŋ 17

Aposolo Jaŋere Binaŋ 17:2-26

Help us?
Click on verse(s) to share them!
2Eme Paulo e ejujec iŋuc erâ sabata hombaŋ jahec â moc mitific‐jeŋicko ferâ jaŋehec mitire muc manac ewec. Ehuc miti dâŋqâreŋ gâcne irec fuŋne jaza mutâc ehuc ʒiŋuc muwec:
3“Kristo e hâmorâ fahareocte mitio mukicne hâcne. Eme Jesure ʒâŋe biŋe ŋazaekopac e Kristo jâmbâŋ hâcne.”
4Eme tucne jaŋe dâŋ i mana ʒakierâ Paulo â Sila jaherao qohotambiŋ. Erâ Grikŋic Anutu araŋ bacnehuc jumbiŋzi bocjaha jaŋerao wâc ʒuhuckembiŋ, erâ ŋokac fekicne afecne mâcne.
5Eme ŋic bocjahazi miti manapie Judaŋic jaŋe mana sâqorerâ ŋic otec ɋeticne â râŋgeŋne henusuc‐joparâ mu ojowa sâko erâ Jasoŋte ficko Paulo â Sila ŋepicko tumaŋne‐fârembiŋ. Tumaŋne‐fârerâ ŋicjahec hâcne rocjofarâ ŋichofao râec‐jofazo mumbiŋ.
6Erâ basac‐jofarâ Jasoŋ â miti mamana gâcne rocjoparâ hae soŋaŋ jaŋerao fârec‐jopa rambiŋ. Ehuc ʒiŋuc muhuc owac owacke rambiŋ: “Mâreŋne mâreŋne maŋbâiŋ ejareeŋgopieŋ ŋic izi hâcne nâŋerao wâc fisipie
7Jasoŋzi hezu hewâneŋ ejarekac. Jaŋe Roma ŋicwofuŋte dâŋ qâsuahuc ŋicwofuŋ furune moc Jesu ere biŋe mupie haŋ baekac.”
8Dâŋ iŋuc muhuc haeŋic â soŋaŋ mu qafeŋ ejarembiŋ.
9Eme soŋaŋ jaŋe Jasoŋ â âgofâcne ejarepie sahac taha‐jeŋic qikiŋne‐jarepie râec‐jopapie rambiŋ.
10Eme miti mamana jaŋe Paulo â Sila ŋafeoa ejactepie Berea haeo rapic. Ira fisirâ Judaŋic jaŋere mitificko ferâ miti mupic.
11Eme hae irec Judaŋic jaŋe urucne, Tesalonike haeonec jaŋe iŋucne mâcne, irec miti maŋafec jaha manambiŋ. Erâ dâŋjekic jâmbomac me burec muhuc ʒoaŋne ʒoaŋne gufu koparic ehuc miti papia wose manac embiŋ.
12Eme jaŋeraonec bocjahazi Jesure kikefuŋ embiŋ, erâ Grikŋic â ŋokac fekicne gâcne sâkozi jaŋerao ʒuhuckembiŋ wâc.
13Paulozi Anuture dâŋ Berea haeo muromackeme biŋe Tesalonike haeo rame irec Judaŋiczi manambiŋ. Manarâ Berea haeo warerâ hae rune mu heinʒaŋ ejarehuc maŋjeŋic bâiŋnembiŋ.
14Iŋuc epie miti mamana jaŋe Paulo ecnepie hae i beherâ raku hâwecko fisiwec. Sila â Timoteo jahe ine ijaha jupic.
15Eme ŋic jaŋe Paulo jowa raku Ateŋ haeo râepie ʒiŋuc jazawec: “Ŋoŋe risierâ mupie Sila â Timoteo jahe biac warezepirec.” Eme ŋic jaŋe risiembiŋ.
16Eme Paulo e Ateŋ haeo jahere woŋec juhuc ɋâŋ qâqâtâc mâretec ŋerame honerâ maŋne ʒoc ʒawec.
17Erâ Judaŋic jaŋere mitificko ferâ Judaŋic jaŋacne â Grikŋic gâcne Judaŋic jaŋere qâjâpecne jumbiŋ jaŋehec mâmâc mitire muc manac embiŋ. Erâ wâc ʒoaŋne ʒoaŋne hae ʒoŋao ŋic bâfuac‐joparâ iŋuc jaha miti jazawec.
18Eme hae ira mamana ŋic jumbiŋ, ʒâŋe‐jeŋic Epikue ŋic â Stoike ŋic. Eme ŋic jaŋe hâcne Paulohec dâŋ mu bâtikic eec embiŋ. Ehuc gâcnezi Paulore ʒiŋuc mumbiŋ: “Ŋic keci mâc pacgoroŋ enârekac.” Â tucnezi ʒiŋuc mumbiŋ: “E nemu furunere biŋe mukac tinac i.” Paulo e Jesure biŋe â hâmockonec fafahare irec dâŋ mume jaŋe iŋuc mumbiŋ.
19Iŋuc murâ mâreŋ facne moc ʒâŋene Areo ira jowa ferâ mumbiŋ: “Go dâŋ furune mukomec i weniŋucte mukic,
20dâŋ i hazec furu‐nâŋec, irec fuŋnehec mutec mananaŋ.”
21Ateŋ haeonec ŋic, mafa â hae fâri, jaŋe dâŋ biŋe furune manarâ dâŋ ijaha qame qoŋgiŋ ehuc mu binaŋ mâretec ejumbieŋ.
22Eme Paulo e Areo dâŋtomao ra domahuc ŋic ʒiŋuc jazawec: “Ateŋ haeonec ŋicbureŋ, no fuŋne‐ŋeŋic ʒiŋuc honekopac, ŋoŋe nemu bocjaha jaŋere araŋ baeŋgopieŋ.
23No hae‐ŋeŋicko rac warec ehuc nemuɋâŋfâc‐ŋeŋic honec‐jopaku alata mocko qâreŋ ʒiŋuc fome wosepac: ‘Kecʒi nemu furune mocte biŋe.’ Eme nemu furune, mi manahuc kiŋaŋ qacneeŋgopieŋ, Anutu hâcne, ere fuŋne ŋazape mananiŋ.
24Anutu e mâreŋ bâfuarâ fainao wiac sasawa râe‐fârewec, eki hâcne sambâŋ â mâreŋ irec rune.
25E ufuŋ ŋicmezi bakicne ira ŋeŋe juju mi eekac, erâ wâc wiac moc basame ŋiczi gie bacnehuc wiac bâbâfuacne mi fokac. I aricne, ekizia ŋic nâŋâc juju â mâro â wiac sasawa nâre‐fâreekac.
26Erâ ŋic ukicne mocjaha bâfuarâ mume eraonec mâreŋ sâc ŋic gurune gurune fua rambeŋ. Erâ fuarâ juranaŋte dameŋ â gaŋ rukec i ekizia munârewec.

Read Aposolo Jaŋere Binaŋ 17Aposolo Jaŋere Binaŋ 17
Compare Aposolo Jaŋere Binaŋ 17:2-26Aposolo Jaŋere Binaŋ 17:2-26