Aposolo Jaŋere Binaŋ 16:20-37

²⁰hae ʒâʒâŋiŋko kia jaŋerao fârec‐jofa rarâ qoric‐jofahuc ʒiŋuc mumbiŋ: “Jahe Judaŋiczi hae‐nâŋecko warerâ maŋbâiŋ enârekopirec,

²¹ehuc mâsi qâreŋ furune, Romaŋiczi mi eene â mi babajune, i hâcne bâfuakopirec.”

²²Eme ŋic guru sâko domambiŋ jaŋe aaric mana‐jactehuc râsi ʒâŋe honec‐jofapie kiazi ŋaqi‐jekic heuc qâunuckerâ mume kâcbiŋzi jofambiŋ.

²³Kâcbiŋzi mâretec qâtâc bâtâc‐jofarâ kâpâcwâru ficko râec‐jofarâ soŋaŋ e motâc basanaŋkerâ aimuŋ soŋaŋ‐jofaocte âzâcnembiŋ.

²⁴Âzâcnepie kâpâcwâru fic maŋne ʒâʒâŋiŋko râec‐jofarâ kike‐jekic jâc fifitacko râeme kindeŋneme fopic.

²⁵Ŋafe ʒâʒâŋiŋko Paulo â Sila jahe Anutu gae nunumu ecnehuc muteŋkepic. Epire kâpâcwâru ŋic gâcnezi micfânâŋ‐jekic manambiŋ.

²⁶Ehame homeŋ sâko ututuŋ bame kâpâcwâru fic sâpene qiriŋ qame motâc aŋke‐fârewec â ŋic sasawa kâpâcwâru‐jeŋic ŋeŋgoroŋkewec.

²⁷Eme kâpâcwâru ficsoŋaŋzi guŋkonec mana ɋâɋârerâ faharerâ motâc aaŋ doma‐fâreme honerâ, kâpâcwâru ŋic wise‐fârembieŋ muhuc sâqe‐ticne becsahackonec unuckerâ sahac‐ticne âeckezo ewec.

²⁸Iŋuc ezo eme Paulozi owackerâ muwec, “Sahacge mi sipirickec, nâŋe furu jaha ŋeŋgopeneŋ.”

²⁹Eme soŋaŋ e lambere mume wiacfâcne jaŋe râcnepie ficmaŋko ferâ ɋarac ɋarac qahuc Paulo â Sila jahere kikefuŋko fodapewec.

³⁰Erâ ficmaŋkonec jowacjofa waharâ wio‐jacterâ muwec, “Ŋicbomboŋ jahec‐nane, no weniŋuc erâ biaŋkepemu?”

³¹Eme jahe ʒiŋuc âzâcnepic: “Wofuŋ Jesu Kristo manasiŋkehuc go â wiacfâcge biaŋkeniŋmu.”

³²Iŋuc murâ e â wiacfâcne Wofuŋte dâŋ jazapic.

³³Jazapire soŋaŋzi ŋafeoa hefârec‐jofarâ kâcbiŋ micrâfâcne ʒure‐jactewec. Erâ mume e jahacne â wiacfâcne Miti Opâ rua‐jarepic.

³⁴Eme e jahacne ficmaŋko râec‐jofarâ mume nânâ rike bâmoc ejactembiŋ. Eme e â wiacfâcne Anuture biŋe embiŋte bujeŋic biaŋkewec.

³⁵Hae fureme kia jaŋe polisman ʒiŋuc muhuc jaza sorec embiŋ: “Ŋic jahec firuec‐jofazo.”

³⁶Eme soŋaŋzi manarâ Paulo ʒiŋuc âzâcnewec: “No sorec‐ŋofape ranicte kia jaŋe dâŋ râepie warekac, irec ŋohe waha rarâ wamao juzepirec.”

³⁷Mume Paulozi ʒiŋuc âzâcnewec: “Jaŋe Romaŋic guruonec fuakicne nâhe dâŋficko mi râec‐nâfohuc ŋichofao qâtâc bâtâc‐nâforâ kâpâcwâru ficko râec‐nâfombieŋ. Eme ʒi wemocte kamicnea sorec‐nâfoŋgopieŋ? Iŋuc aricne, jaŋac ware jowac‐nâfopie razeperec.”