Aposolo Jaŋere Binaŋ 16:13-24

¹³sabata hombaŋ maickeme hae upeo opâ moc fowec ira ʒiŋuc muhuc humbeŋ: “Judaŋic numueŋgopieŋ irec toma opâo moc fokacko hurâ honenaŋ.” Iŋuc muhuc hurâ ŋokac tumaŋnerâ juhapie bâfuac‐joparâ waha ŋehuc miti jazambeŋ.

¹⁴Eme jaŋere guruo ŋokac moczi Anutu araŋ bacnehuc juwec, ʒâŋene Lidia, e qoruc situâc rune, Tiatira haeonec. Ŋokac e hâcne Wofuŋzi maŋne bâuŋtome Paulole dâŋ hazec hâric manawec.

¹⁵Erâ e jahacne â wiacfâc‐ticne Miti Opâ ruarâ ʒiŋuc nâzâwec: “Ŋoŋe honecnupie Wofuŋte biŋe ekopacko nore ficko wefurâ ŋeŋe juju enʒepieŋ.” Iŋuc muhuc hota‐nâreme fembeŋ.

¹⁶Dameŋ mocko nunumure tomao huhapene kiŋaŋ naru moczi bâfuac‐nâpowec. Naru e faŋfaŋ demoŋ‐ticnehec juhuc ŋic jaŋere fuŋne mufua jujec, ehuc rufâc‐ticne moneŋ mafa bocjaha hure‐jare jujec.

¹⁷Eme eki hâcne bâfuac‐nâporâ Paulo â nâŋe bâjâpec‐nâpohuc dâŋ wiwira kecʒiŋuc ewec: “Ŋic kecʒizi Anutu femicne sâko ere kiŋaŋ qaqa juhuc biaŋkeniŋte hata muʒâwe‐ŋareeŋgopieŋ.”

¹⁸Dâŋ wiwira i sasawa ʒoaŋne ʒoaŋne enârekume Paulo e irec takickeme forisierâ demoŋ ʒiŋuc âzâcnewec: “No Jesu Kristo ere micte gazape ŋokacte maŋkonec wefu rac.” Iŋuc mume izia wefurâ rawec.

¹⁹Eme naru rufâc‐ticne jaŋe moneŋ mafa fufua‐jeŋic arictac eme manarâ Paulo â Sila rocjofarâ

²⁰hae ʒâʒâŋiŋko kia jaŋerao fârec‐jofa rarâ qoric‐jofahuc ʒiŋuc mumbiŋ: “Jahe Judaŋiczi hae‐nâŋecko warerâ maŋbâiŋ enârekopirec,

²¹ehuc mâsi qâreŋ furune, Romaŋiczi mi eene â mi babajune, i hâcne bâfuakopirec.”

²²Eme ŋic guru sâko domambiŋ jaŋe aaric mana‐jactehuc râsi ʒâŋe honec‐jofapie kiazi ŋaqi‐jekic heuc qâunuckerâ mume kâcbiŋzi jofambiŋ.

²³Kâcbiŋzi mâretec qâtâc bâtâc‐jofarâ kâpâcwâru ficko râec‐jofarâ soŋaŋ e motâc basanaŋkerâ aimuŋ soŋaŋ‐jofaocte âzâcnembiŋ.

²⁴Âzâcnepie kâpâcwâru fic maŋne ʒâʒâŋiŋko râec‐jofarâ kike‐jekic jâc fifitacko râeme kindeŋneme fopic.