Aposolo Jaŋere Binaŋ 14:3-24

³Eme jahe sifu mosa dameŋ gâcne hae ira juhuctecne Wofuŋtao roweckerâ miti‐ticne hâwicmâc muhuc jupic. Ehapire Wofuŋzi akicdâŋ‐ticnere fuŋne bataniŋkehuc neŋgoc ŋesiŋ ŋejactehame mâsi fuŋne fuŋne bapic.

⁴Eme hae irec ŋic jaŋe fâuckehuc tucne Judaŋic jaŋerao qohotambiŋ â tucne jaŋe aposolo jaherao qohotambiŋ.

⁵Izi ʒâhecko ŋic qâpuc â Judaŋic gâcne jaŋe aposolo qânâzi he imac ejacteniŋte roroc epie

⁶manarâ wiserâ Likaonia mâreŋko rapic. Erâ ira Listera â Derebe â hae gâcnao

⁷Biŋebiaŋ murahuc jupic.

⁸Eme Listera haeo ira ŋic moc ŋewec, e kike jahec‐ticne ɋaŋakicne. E neŋgoc bumaŋko iŋucne fuarâ hata juju tâmiric mâc ŋejujec.

⁹Eme Paulozi miti mume manahuc ŋehame erao findendeŋnerâ fuŋne‐ticne ʒiŋuc manawec: Ŋic e bibiaŋte mamanasiŋ sâcne focnekac.

¹⁰Iŋuc manarâ dâŋ hahaŋne bahuc ʒiŋuc âzâcnewec: “Go kikegezi âterâ fahare hâŋ domac.” Mume ŋic e furutuc herâ fahare rac warec ewec.

¹¹Eme ŋic guru sâko jaŋe Paulozi mâsi bawec i honerâ micne micʒiriŋ Likaonia dâŋjeŋicko ʒiŋuc mumbiŋ: “Nemu jaŋe ŋicsahachec erâ ŋondeŋ‐nâŋecko fuambiŋ juŋgopieŋ.”

¹²Ehuc Banaba e nemu moc ʒâŋene Dia ere wase bambiŋ, â Paulo e dâŋ bâtâcnerâ mujujecte nemu moc ʒâŋene Hermes ere wase bambiŋ.

¹³Eme nemu Dia ere taha bapa eki mume bulimakao â reso eri wiac hae upeo nemure ufuŋ ŋewecko amecke hurâ ŋicjahec jahere bâzi rikezo embiŋ.

¹⁴Eme aposolo jahec Banaba â Paulo jahe i manarâ fâfâre sâqorehuc hemâtâc‐jofame ŋic bâfâuc bâfâuc‐jopa

¹⁵rarâ ʒiŋuc mupic: “Oi, ŋicbureŋ, ŋoŋe wemo eŋgopieŋ! Nâhe ŋic jaha wâc, ŋoŋere sâc. Ŋoŋe nemu burec burec râpec‐joparâ Wofuŋ jujune maickeniŋte Biŋebiaŋ‐ticne muekoperec hâcne. Eki sambâŋ â mâreŋ â hâwec wiac fuŋne fuŋne‐jeŋichec bâfua‐fârewec.

¹⁶Erâ juwefukicne dameŋ ira ŋic qâpuc mana‐jarehame maŋjeŋicte juju hata fuŋne fuŋne bâfuarâ jujumbieŋ.

¹⁷Erâ qâoma mi eŋarewec, fuŋne‐ticne mananiŋte âgo jauŋ eŋarehuc mume hoe ʒoaŋ sâckoa eme mâriri fuame nâ ʒeri ejumbieŋ.”

¹⁸Ŋicjahec jahe dâŋ iŋuc muhuc mu bâmâteŋ ejarehuc qatara‐jarekupire bâzi ririke‐jacte i behembiŋ.

¹⁹Eme ira juhapire Antiokia haeonec â Ikonioŋ haeonec Judaŋic fisirâ ŋic mu bâdoc ejarepie babafic erâ Paulo qânâzi hembiŋ. Erâ hâmokac muhuc hae râpeo fâre rambiŋ.

²⁰Eme ira fohame opâ ruac jaŋe fisirâ orâŋke âte sâoc ecnehapie ɋârerâ fahare haeo fewec.

²¹Erâ hae fureme Banabahec Derebe haeo rapic. Rarâ ira Biŋebiaŋ mupire ŋic bocjahazi mana ʒakiepie Jesure kikefuŋ bacjopapic. Iŋuc erâ hata rapicko ijaha mocwâc risiehuc Listera â Ikonioŋ â Antiokia haeo fisi fisi warepic.

²²Hae sâc fisihuc Jesure kikefuŋ jaŋe mamanasiŋ heʒakierâ juniŋte mu basanaŋ ejare warehuc ʒiŋuc jazapic: “Nâŋâc ʒârâ hâriŋ faio juhuc Anuture uucmaŋko raʒinaŋte muʒâwe‐nârekicne.”

²³Erâ wâc kikefuŋ gurune gurune soŋaŋ bâwosâe‐jarerâ sowa juhuc numu jambuŋ ejarehuc, manasiŋkembiŋ Wofuŋ erao hâcne râec‐jopapic.

²⁴Eme Pisidia mâreŋ fotâcnerâ raku Pamfilia mâreŋko fisipic.